Printzipioz irailaren 6an egitekoa zen erreferenduma urriaren 4era atzeratzea adostu du Frantziako Gobernuak. Autonomia hein batekin bada ere, Frantziaren menpe izaten segitzen du independentistek Kanaky ere deituriko Kaledonia Berriak.

https://www.argia.eus/albistea/koronabirusa-dela-eta-urriaren-4era-atzeratu-dute-kaledonia-berriaren-independentziari-buruzko-erreferenduma

Kolore berdea mantentzen duten Frantziako Estatuko lurraldeetan –bi departamendutan izan ezik, gainerako guztietan–, deseskalatzearen bigarren fasea abiatuko dute datorren asteartean. “Bigarren fase honetan, askatasuna arau bihurtuko da eta debekua salbuespen izango da”, iragarri du Edouard Philippe lehen ministroak. 

Ostegun honetan Patxi Ruiz euskal presoarekin elkartasunez Lizarran deituta zuten elkarretaratzea debekatu dietela salatu du Amnistia Osoa mugimenduak. Gobernuko delegaritzak debekatu du ekintza, Guardia Zibilaren bitartez. “Ustez, osasun neurrietan oinarritzen da debekua, nahiz eta lehenengo elkarretaratzean guztiz bete genituen”, diote. 

Eusko Jaurlaritzak zabaldu duenez, Euskadiko Autonomia Erkidegoan 2 pertsona gehiago hil dira koronabirusak jota azken egunean eta Nafarroan beste 1. Denetara Euskal Herrian maiatzaren 28a arte 2.036 pertsona hil ditu Covid-19ak, Euskal Autonomi Erkidegoan 1.513, Nafarroan 514 eta Ipar Euskal Herrian 10.

Euskal herritarrok azken estatistiken arabera 3,17 milioi biztanle garenez, gure arteko hilkortasun tasa da milioi 1 biztanleko 642.

Eusko Jaurlaritzak EAE osoko datuak bai baina Araba, Bizkaia eta Gipuzkoako hildakoen kopururik ez duela ematen maiatzaren 14tik eta gaur ere informazio hau ez du erakutsi. Probintziaka zenbat testeatu diren eta zenbat positibo agertu diren bai aipatzen du Jaurlaritzak, baina ez hildako kopururik.

Gasteizko Lan Arloko Epaitegiak legez kanpokotzat jo du autobus konpainiako zuzendaritzak bere langileei aplikatu dien ERTa. Enpresa-batzordeak ERTa altxatzeko eta ohiko zerbitzuen % 100era berehala itzultzeko eskatzen du. Halaber, ordaintzeari utzi zaizkion soldata guzti-guztiak ordaintzeko eskatu du. Gainera, "udal gizartearen kudeaketa negargarria" salatu du, eta, aldi berean, Amaya Barredo Kontseiluko presidentearen eta Marijo Ajuriaguerra Elkarteko gerentearen dimisioa eskatu du. 

Kutsatuen kateari jarraipena egiteko erabiltzen diren teknologiek pribatutasun eta datuen babeserako eskubideak urratu ditzaketela adierazi du Europar Batasunak, baita mugimendu eta erlijio eskubideak ere. EBko ia herrialde guztiek erabiltzen dute teknologia hau.

EITBk zabaldu duenez, Euskadiko Autonomia Erkidegoan 6 pertsona gehiago hil dira koronabirusak jota azken egunean. Arratsaldean jakin da Nafarroan beste heriotza bat gertatu dela. Denetara Euskal Herrian maiatzaren 27a arte 2.034 pertsona hil ditu Covid-19ak, Euskal Autonomi Erkidegoan 1.511, Nafarroan 513 eta Ipar Euskal Herrian 10.

Euskal herritarrok azken estatistiken arabera 3,17 milioi biztanle garenez, gure arteko hilkortasun tasa da milioi 1 biztanleko 641.

Nabarmentzekoa da (eta harrigarria edozein aldetatik begiratuta) Eusko Jaurlaritzak EAE osoko datuak bai baina Araba, Bizkaia eta Gipuzkoako hildakoen kopururik ez duela ematen maiatzaren 14tik. Probintziaka zenbat testeatu diren eta zenbat positibo agertu diren bai aipatzen du Jaurlaritzak, baina ez hildako kopururik.

Albiste hau 18:35ean editatu da.

EBko kide diren estatuen artean eztabaida handiak izan dira COVID-19ari aurre egiteko moduaz. Gaur aurkeztuko du Europako Batzordeak datozen urteak markatu ditzakeen plana.

Worldometers estatistika zerbitzuak gaur arratsaldeko 17:55etan (GMT) eguneratutako kontabilitatean, Amerikako Estatu Batuek gainditu dute 100.000 hildakoen marka. Denetara gaur arte 350.000 heriotza zenbatu dituen munduan beste ezein herrialdetan baino gehiago eragin ditu COVID-19ak AEBetan. Kutsatu eta testeaturik positibo eman duten iparramerikarrak 1.734.000 dira. Herrialdeak alderatzen hasita, erreferentzia onena erabiliz milioi 1 biztanleko 303 da AEBen heriotza tasa. Horren aldean, Euskal Herriak milioi 1eko 639 heriotza sufritu ditu gaur arte, Espainiak 580 eta Frantziak 436. Kopuru horietatik oso urrun, egunotan hainbeste aipatzen den Errusiak gaur arte 3.807 heriotza dauzka, milioi 1 pertsonako 26.

“Berehala eta modu iraunkorrean” migratzaileen egoera erregularizatzeko eskatu diote 642 eragilek Frantziako Gobernuari. Etorkinekin elkarteak Pirinio Atlantikoetako suprefetari helarazi dio eskaera.

"Orain ardura" ekimena aurkeztu eta manifestu bat egin dute publiko hainbat elkarte, sindikatu, erakunde eta norbanakok, administrazio publikoei AHTren proiektuak geldiarazteko eskatuz.

Txinan eta Japonian egindako ikerketek erakusten dutenez, aire zabalean koronabirusa transmititzea zailagoa da leku itxietan baino.

Italiako Gobernuak "Laguntzaile zibikoen" figura martxan jartzeko boluntarioak bilatzen ditu. Kritikak jaso ditu ekimenak, kontrol sozialerako erabiliko direla uste izan delako

.

AEBetan udaren hasiera markatzen duen Erorien Eguna pasa berri da eta COVID-19a herrialdean eragiten ari den sarraskiari entzungo eginez, herritarrak hondartzetan eta igerilekuetan bildu dira.

Eskola presentzialetara itzultzean, ahal den neurrian klaseak aire zabalean izatea gomendatu du Osasunaren Mundu Erakundeak, leku itxietan errazago transmititzen baitira birusak. Hormarik gabeko eskolak, dena den, ez dira kontu berria, batzuek aspaldi deskubritu zituzten espazio irekien onurak.