Flandes

Nabigazio menua

• Zer da hau?
• Egunez egun
• Diaporamak
• Elkarrizketa eta Erreportaje idatziak
• Informazio gehiago

Egunez egun

Liburu-denda ugari dago Bruselan. Orduak eman daitezke bigarren eskuko denda horietan, liburu zaharren multzoetan “altxorraren bila” edo, besterik gabe, bertan pilatutako aleen usainaz gozatzen. Xarmaren zati handi bat jabeei zor zaie: milaka, hamar milaka liburu eduki arren, profesional hauek ez dute bilaketan laguntzeko ordenagailurik. Ederki asko dakite denek zer eta non dagoen dena.

Belgikan ohi den legez, bi liburu-denda mota daude, frantsesdunak eta flandestarrak. Bruselako biztanlegoaren %85a frantses hutsez mintzo omen da, ulertzekoa, beraz, liburu-denda frantsesak askoz ere ugariagoak izatea. Ale hau horietako batean aurkitu dut, Bruselako plaza nagusitik oso gertu. Atentzioa eman dit bere izenburuak: “365 arrazoi belgikarra izaten jarraitzeko."

 

Baina, zer da belgikar bat?

 

Proiektu honi ekitea erabaki nuenean horixe galdetu nion nire buruari. Botepronton, Tintin etorri zitzaidan burura; jarraian, Bruselan dauden europar erakundeen egoitzak, Heyssel estadioko tragedia, Atomium zientzia fikziozko eraikina, garagardoa eta bonboiak…eta bakarra ez, bi komunitate baizik: flandestarrak eta waloniarrak.

 

Geroxeago hirugarren bat zegoela deskubritu nuen, Walonia ekialdeko alemaniarrak, hain zuzen.

 

Eta gaian sakondu heinean, herrialdeko korapilo administratiboarekin egin nuen topo. Antza, zazpi parlamentu daude Belgikan, eta zortzi Europar Batasunekoarekin.

 

Herrialde bat, bi komunitate nagusi, hiru probintzia (Flandes, Brusela eta Walonia), hamaika parlamentu, eta jada 15 hilabete gobernua osatu ezinik…

 

Liburua merkealdietako apalean zegoen. Jakina.