Vilaweb-eko albiste honek agertzen duenez, eurodiputatu talde bat Katalunian ari da hauteskunde eguna jarraitzen. Ez da begirale talde ofiziala, Espainiako Hauteskunde Batzordeak baimenik eman ez dielako, baina bertatik jarraitzea erabaki dute. Hauek dira goizean Bartzelonako hainbat hautesleku bisitatu dituztenak: Martina Anderson (Irlanda) GUEL/NGL talde parlamentariokoa eta Sinn Féin-ekoa; Marie Pierre-Vieu (Frantzia) GUEL/NGL talde parlamentariokoa; Mark Demesmaeker (Flandria) ECR talde parlamentariokoa eta N-VA alderdikoa eta Ana Miranda (Galizia), 2018an eurodiputatua izango dena.

Martina Anderson (Sinn Féin): Espainiako agintariei dei egiten diegu emaitza errespetatu dezaten"

"Etorri gara bertatik bertara zer gertatzen den ikusteko, eta nazioartean horren berri zabaltzeko gure talde parlamentarioen bidez. Katalanen babeserako taldeko kide gara eta nazioarteko elkartasuna adieraztera ere etorri gara. Hau demokrazia ekintza bat da, eta emaitza dena delakoa izanik, errespetatu egin behar da. Bruselak frogatu nahi badu ez duela hipokresia erabatekoa erabiltzen, bozkatzaileak babestu behar ditu. Ez gaude hautagai bat edo bestea babesteko, hemen gaude Europak onartu ditzan emaitzak eta errespetatu ditzan. Hori egiten ez duen edozein gauza mundu osoak erabateko hipokresia gisa hartuko du".

Eguneko argazkietako bat izan da. 102 urteko Neus Catalàk bere herriko eskolan botoa eman du. Nazien kontzentrazio eremu batetik bizirik irten zen.

Hedabideen aurrean Kataluniako Generalitatearen izenean agertzen den Juan Antonio Puigcerver Madrilgo Gobernuan Barne ministerioko zuzendari teknikoa den Juan Antonio Puigcerver da. Erreferendumaren eta independendentzia aldarrikapenaren ostean Madrilek Generalitatea kontrolpean hartu zuenean, Puigcerver mallorcarra jarri zuen Kataluniako Barne sailaren buru. 1963an Mallorcako Palman sortua, karreraz Estatuaren abokatu, 2012tik hona Mariano Rajoyren gobernuan Barne sailaren idazkari teknikoa da. Salbuespen egoeran burututako hauteskundeoi dagokien moduan, salbuespeneko sailburu-komisarioa.

ERCk Europara eramango ditu atzerriko botoarekin gertatu diren irregulartasunak. Alderdiko eurodiputatuak, Josep-Maria Terricabras eta Jordi Solé Europako Batzordeari zuzendu zaizkio gaur salaketa egiteko. Parlamentuko galdera baten bidez, eskatu dute argitzeko ea "urratu egin den atzerrian bizi diren kataluniarren botoa emateko eskubidea".

Hauteskudeetan iruzurrik egiten ez dela frogatzeko, zenbaketa paralelo bat antolatu dute ANCk eta CDRek alderdi subiranisten babesarekin. Web orrialde bat martxan jarri dute datuen zenbaketa bertatik jarraitu ahal izateko. Katalunia guztian zehar milaka boluntario ari dira une oro informazioa bidaltzen. Jarraitu hemen zenbaketa: https://cataloniavotes.today/

2015eko hauteskundeekin alderatuta bost puntu igo da parte-hartzea. Bozkatzera deituta zeudenen %68,32k bozkatu du jada, 2015eko %63,13rekin alderatuta. Bartzelonan bost puntu igo da, Gironan hiru puntu, Lleidan bost puntu eta Tarragonan zazpi. Herritar gehien bizi diren eskualdeetan egin du gora gehien parte-hartzeak. Barcelones eskualdean, %7 igo da parte-hartzea eta Baix Llobregaten %6.

Gironan igo da gutxien parte-hartzea, hala ere, parte-hartze handiena bertan lortu da. Gehien berriz Tarragonan igo da, zazpi puntu. Lleidan bost puntu igo da eta Bartzelonan bost puntu. 

Estremerako kartzelan pereso dagoen Oriol Junqueras ERCko buruak eskuz idatzitako gutuna zabaldu du gaur Twitter bidez. Bertan esaten duenez, prest dago hauteskundeen Generalitateko buru izateko.

"Kartzelak ez gaitu ahultzen, indartsuago egiten gaitu", esanez hasi du gutuna Junquerasek. Bere alderdiaren 86 urteko historia aipatu du, gogora ekarriz kartzeletatik pasa izan direla Esquerrako kide ugari lehenago ere. "Ez dut kartzela saihestu nahi izan, hau delako humanismoarekin eta biolentzia ezarekin dugun erabateko konpromisoaren lekukotza onena".

Abenduaren 8ko data daukan gutunean, Junquerasek baieztatu du bere burua "Kataluniaren esku" jartzen duela, "gobernu indartsu eta eraginkorra zuzentzeko".

"Espainiako Gobernuak Katalunian deitutako hauteskundeetatik sortutako Parlamentuak, berebiziko garrantzia duten auzien inguruan erabaki beharko duenez, itzalpean geratu dira beste gai batzuk, tartean hizkuntzena", hala dio Daniel Escribano Bartzelonako Unibertsitateko soziologiako doktoreak. Parlantzua.eus atarian idatzi duen artikuluan, alderdi independentistek euren programetan hizkuntza politikaz diotena jaso du. Hemen artikulua osorik: http://parlantzua.eus/2017/12/20/katalunia-eta-aran-hizkuntzen-auzia-abenduaren-21eko-hauteskundeetako-hautagaitza-independentisten-egitarauetan/

13:00etan eman dituzte lehenengo parte-hartze datuak. Espainia zaleek indar gehien duten guneetan igo egin da parte-hartzea, aldiz independentistak indartsuen direnetan jaitsi. Hauteskundeak lan egun batean jarri izanak ziurrenik parte hartzearen bilakaeran eragina izango du. Hemen analisia osorik:

Espainiako Auzitegi Gorenetik Pablo Llanera epaileak eskatuta Guardia Zibilak prestatu duen informeak Kataluniako Diada aberri eguneko manifestaldiak ere matxinada delituaren barruan sartu ditu. Lehen albistea Oriol Junquerasen abokatu Andreu Van del Eynde abokatuak barreiatu du sare sozialetatik.

Eta delituaren erantzuleen artean, hainbat buruzagi independentisten artean, izendatu du Pep Guardiola futbol entrenatzaile ospetsua. Nacio Digital hedabideak zabaldu du sumarioaren orria Guardiolaren aipamena dakarrena.

Goizean zehar ugariak izan dira batetik eta bestetik iritsitako salaketak, botoa emateko gutun-azal askok aurretik sartutako paperak zeramatzatela eta. CDR Errepublikaren Defentsarako Batzordeek eguerdian zabaldu dute ohar bat mahaietako kideei eta oro har herritarrei eskatuz erne ibiltzeko botoak baliogabetzeko trikimailuekin.

Azpiko grafikoan, herriz herrikako parte-hartze datuak jaso ditu eldiario.es agerkariak. Urdinez daude 2015eko hauteskundeekiko parte-hartzea handitu duten herriak eta gorriz txikitu dutenak. Biztanle kopuruaren araberako tamaina dute herriek. Erdian ageri den zirkulu handi hori Bartzelonari dagokio. Grafikoan eskuinetara egin ahala independentziaren aldeko botoa ugariagoa izan ohi den herriak ageri dira.

Azpiko mapan berrizaurrekiko hauteskundeekiko parte-hartze diferentzia ageri da. Geografikoki ikus daiteke non egin duen gehien gora parte-hartzeak eta non behera.

Eta sare sozialetan disimulurik gabe erakusten dute gainera:

Katalunian boto emaileen parte hartzea %34,7koa izan da gaurko 13:00 artean, esan denez, 2017a %35,11 izan zenean. Hala ere, lurraldeka harturik, botoa ematera hurbildu direnen urritzea Gironan izan da nabarmenena, 3,5 puntuko galera. Aldiz, Lleidakoa da parte hartzeak gora egin duen hautes barruti bakarra. Ikusi datuak lurraldeka:

Bartzelona:
%34,6 (2017)
%34,72 (2015)

Girona:
%35,2 (2017)
%38,47 (2015)

Tarragona:
%35,1 (2017)
%35,56 (2015)

Lleida:
%34,4 (2017)
%33,75 (2015)

13:00etan parte-hartzea 2015eko hautskundeen oso antzekoa. Orduan %35,10 eta gaurkoan puntu erdi bat txikiagoa: %34,62.

Kataluniako gobernuko lehendakari-orde Oriol Junqueras zigortu dute kartzela zerbitzuek, bost eguneko isolazioarekin, RAC1 irratian emandako elkarrizketagatik, irrati kateak berak jakinarazi duenez.

Hauteskunde atipiko hauetan, hainbat hautagai kartzelan edo atzerrian daude.

Carles Puigdemont Bruselan da eta ezin izan du botoa eman. Ezin izan du izena eman atzerrian behin behingoz bizi diren herritarren zerrendan izen eman, hori egitera Espainiako kontsulatura joan behar zuelako. Hauek Espainiako lurralde gisa hartuak dira diplomatikoki, eta beraz, atxilotu egin zezaketen bertan. Hala ere, sinbolikoki, lehen aldiz botoa emango duen 18 urteko gazte batek bere izenean botoa emateko eskaini du bere burua.

Twitter bidez mezu hau bidali du.

ANCko presidente ohi Jordi Sànchezek eta Junts per Catalunyako bigarren zerrendaburuak txio hunkigarria bidali du Soto del Real espetxetik.

Goizeko 8:00etan ireki dituzte hauteslekuak. Orotara 2.680 eskolatan 8.247 mahai daude eskuragai.