155. artikuluaren aurka larunbatean Bilbon deitutako manifestazioaren atarian, Maddalen Iriartek ARGIAri esan dio artikuluaren aplikazioa gobernu antidemokratiko baten politiken azken ukitua izan dela: "Esango nuke Euskal Herrian de facto ezagutu dugula 155a jada. Besteak beste, Gasteiz eta Iruñeko legebiltzarretan onartutako legeak, Madrilen gustukoak ez direnak, Konstituzio Auzitegiaren bitartez bertan behera utzita".

Hemen irakur dezakezue elkarrizketa osoa. 

Miguel Angel Carballo Espainiako Estatuko fiskalaren aburuz "nabarmena eta publikoa da deklaratzera deituak izan direla (...) eta Puigdemontek publikoki esan duela ez dela agertuko". Idatzia auzitegira bidali du fiskalak eta Belgikako autoriateek katalanen ordezkariak atxilotzeko euroagindua eskatu du.

Puigdemonten eta Bruselan dauden kontseilarien abokatuek deklarazioa bideokonferentzia bidez egitea eskatu dute.

Gaur goizean deklaratu dute Kataluniako Gobernuko zenbait kontseilarik Espainiako Auzitegi Nazionalean. Horiez gain Santi Vila kontseilari ohiak ere deklaratu du Carmen Lamela epailearen aurrean. Fiskaltzak kontseilari guztiak espetxeratzeko eskatu du inolako baldintzarik gabe. Santi Vila ordea fidantzapean espetxeratzeko eskatu du.

Abokatuek hala eskatuta deklarazioa atzeratzea erabaki du Auzitegi Gorenak. Deklarazioa prestatzeko denbora gutxi izan dutela eta, kexu agertu dira abokatuak. Beraz azaroaren 9an iltzuli beharko dira Espainiako Auzitegi Gorenera mahaiko kideak deklaratzera. Ordura arte poliziaren zaintza jartzeko agindu du epaileak, ez dutela ihes egingo ziurtatzeko.

Auzitegi Nazionalak ordea ez dio jaramonik egin abokatuen eskaerari eta Kataluniako Gobernuko kideak deklaratzen ari dira dagoeneko.

Catalunya Radiok aurreratu duenez, Puigdemont president-a, Comín, Serret, Puig eta Ponsatílau kontseilariak atxilotzeko nazioarteko agindua eskatuko du Espainiako Fiskaltzak. Bostak ez dira Madrilera joan Auzitegi Nazionalera deklaratzera, Bruselan daude une hauetan.

Eguerdiko 12etan Bartzelonako Sant Jaume plazara eta lantokien parean kontzentratzera deitu ditu herritarrak Askatasuna lemapean. "Katalunian herritarrok aukeratzen ditugun pertsonek gobernatzen dute" dio Kataluniako Biltzar Nazionalak.

Arratsalderako ere mobilizazioak deitu ditu Kataluniako Parlamentuaren parean eta hainbat udaletxeren aurrean arratsaldeko 7etan. ANCek "ozen" adierazi nahi du Generalitateko Gobernua Carles Puigdemont presidentearen gobernua dela.

Puigdemont eta lau kontseilarik (Clara Ponsatí, Meritxell Serret, Meritxell Borràs eta Toni Comín) Bruselatik deklaratzea eskatu dute eta beraz pentsatzekoa da gaur ez direla Madrilera deklaratzera joango. Zenbait hedabidek aurreratu dute Puigdemont eta lau kontseilariak ez badira deklaratzera joaten epaileak atxilotzeko agindua emango duela. Bart arratsaldean El Confidencialek aurreratu zuen, epaileak gaur deklaratuko duten guztiak espetxeratzeko eskatuko duela, Santi Vila izan ezik. Epailearen ustez ihes egiteko arriskua baitago. Santi Vilak independentzia aldarrikapena egin baino egun bat lehenago aurkeztu zuen dimisioa, aldarrikapenarekin ez zegoelako ados. Abenduaren 21eko hauteskundeetarako bere burua aurkeztu du PDeCATeko hautagai izateko.

Gaur deklaratuko dute Kataluniako Gobernuko eta parlamentuko mahaiko kideek Espainiako Auzitegi Nazionalean batzuek eta Auzitegi Gorenean besteek. Kataluniako Gobernua kargugabetu egin zuen Espainiako Gobernuak eta beraz forudun izaera galdu zuten gobernuko kideek, horregatik deklaratuko dute Auzitegi Nazionalean, goizeko bederatzietan daude zitatuta. Aldiz Parlamentuko mahaiko kideek forudun izaera mantentzen dute eta Auzitegi Gorenean deklaratuko dute 9:30ean hasita. Diru publikoaren erabilera okerra, matxinada eta sedizioa leporatzen dizkie fiskal nagusiak.

Prentsaurrekoa eskaini du Enric Millo, Espainiako Gobernuak Katalunian duen ordezkariak, besteak beste Ministro Kontseiluak abenduaren 21eko hauteskundeez hartutako erabakien berri emateko. Madrilgo gobernuaren erabaki bat Bartzelonatik jakinaraztea justifikatu du 155aren aplikazioaren ondorioz sortutako egoera dela eta.

155. artikulua ezartzeaz geroztik Generalitatea normaltasunez funtzionatzen ari dela esan du Millok, eta ondoren azaldu egin du Ministro Kontseiluak hauteskundeak egiteko ohiko neurriak hartu dituela. Halaber, jakinarazi du Kataluniako hiru organismo publiko ezabatzea erabaki dutela ministroek, minutu batzuk lehenago amaitutako bileran: hain zuzen ere, Trantsizio Legearen arabera Errepublika egituratzeko funtzioa zuten organismoak.

Kazetarien galderei erantzunez, nabarmendu du Carles Puigdemont presidenteak –presidente ohi, bere hitzetan– onartu izana hauteskunde "legezko eta demokratikoak" egingo direla abenduaren 21ean. "Esan gabe doa Espainiako Gobernuak hauteskundeen emaitzak onartuko dituela, beti egin duen bezala" gaineratu du, eguerdian Puigdemontek esandakoaz galdetu diotenean.

Agerraldia amaitu du esanez "ideia guztiak mahai gainean egongo dira eta hortik aterako da ordena konstituzionalera itzultzea bermatuko duen parlamentu demokratikoa". "Ideia guztiak dira zilegi, haien garapena legearen araberakoa izatea da eskatzen den gauza bakarra", borobildu du.

Matxinada egotzita, ostegun eta ostiral artean Madrilen deklaratzera deitu du Espainiako Auzitegi Nazionalak Karles Puigdemont Generalitateko presidentea.

Inputatu gisa deklarazioa hartzeko deitu diote. Carmen Lamela epaileak dio Puigdemontek armada propioa eraiki nahi zuela eta Mossoak mehatxu zirela. 6.207.450 euroko fidantza ere jarri dio, eta hiru eguneko epea eman aurkezteko.

Independentziaren alderko alderdiek bost puntuko aldea aterako liekete unionistei abenduaren 21an, Centre d'Estudis d'Opinióren arabera. Junts pel Sík eta CUPek Parlamentuan gehiengo osoari eutsiko liokete, 2015eko emaitza bertsuekin.

Estatu independente baten aldekoak %48,7an kokatzen dira eta ezezkoak %43,6an, bost puntuko aldea dago bien artean.

Centre D'Estudis d'Opinió-ren azken barometroaren emaitzak dira. %8k ez daukate erabakita. Sondeoa tentsio politiko handiko unean egin da, independentzia aldarrikapenaren eta 155. artikuluaren aplikazioa direla eta.

Jose Ángel Sánchez udal ordezkari sozialistak txio bat idatzi du, Kataluniako presidenteari “zulora” joatea opatuz. EAJren esku dagoen Lezoko udal gobernu batzordeko kide da.

A la trena

— José Ángel Sánchez (@joxeansanchez) 2017(e)ko urriak 30

Irakurri albiste osoa hemen.

Espainiako Epaitegi Gorenak ostegun eta ostiralerako deitu ditu Kataluniako Parlamentuko Mahaiko sei kide, matxinada, sedizioa eta diru publikoaren erabilera okerra egotzita. Pablo Llarena magistratuak oroitarazi die abokatuarekin joan behar dutela.

Ostegunean 9:30ean hasiko da saioa eta ikertu gisa doazela gogorarazi die. Carles Puigdemont Bruselan prentsaurrekoa ematen ari zen une berean jakinarazi dute albistea.

Hasi aurretik prentsaurrekoa katalanez, gaztelaniaz eta frantsesez egingo duela adierazi du Carle Puigdemontek. Ingelesez ere mintzatu da aretoa bete duten kazetarien galderei erantzuteko.

"Generalitatean bildu ginen independentzia aldarrikatu ostean, eta Espainiako Gobernuak Kataluniako herriaren, funtzionarioen eta Gobernuaren aurka biolentzia erabiliko zuela ikusi genuen, datuak eskuetan. Orotara 500 urteko kartzela zigorra Gobernuaren aurka, atxiloketak egitea hurrengo pausoa zela bagenekien, fiskaltzaren eskaria hor dago. Horregatik, beti esan izan dugun bezala, biolentzia ekiditea jarri genuen lehentasun, eta segurtasuna bermatzea erabaki genuen. Elkarrizketa eskatzen jarraitu genuen, baina ezinezkoa zela ikusi genuen. Aldarrikapenaren aurreko egunean hura bertan behera uztea proposatu genuen, Espainiak 155. artikulua ez bazuen aplikatzen, elkarrizketari atea ireki nahian, baina hala ere ez.

Ezin dugu Kataluniako Errepublika eraiki biolentziarekin. Espainiako Estatuak hori egin nahi badu, bere erabakia izan dadila, baina guk uko egiten diogu horri. Kataluniako Gobernuak esan zuen funtzionarioak ez zituela arriskuan jarriko, eta hori da egin duguna. Errepublika eraikitzea mantsotuko badu horrek, uste dugu ez dela prezio handiegia.

Gogoratuko dugu Maza fiskala gaitzetsia izan zela, gure aurkako kereilak ez du oinarri juridiko sendorik, ideia eta pertsona batzuk jazarri nahi ditu, ez ekintzak. Kereila oso gogorra da, eta guk ez diogu men egingo, dugun arduragatik. Lau erabaki hartu ditugu:

1- Presidente zilegi gisa, Bruselara etorri gara Europako bihotz instituzionalean salatzera jazarpen politikoa.

2- Junts Pel Síren buruzagitzak Katalunian jarraitzen du ekintza politikoan lanean. Ez dugu sekula abandonatu gobernua. Ez diogu justiziari ihes egingo.

3-  155. artikuluari aurre egingo diogu, sindikatu eta karguei babes osoa adierazten diegu, esan nahi diegu borrokatzen jarraitzeko PP, Ciudadanos eta PSOEk egin nahi duten Kataluniako instituzioen eraisketa. Urriaren 1ean eskolak defenditu genituen bezala, instituzioak defendatuko ditugu orain.

4- Ez diegu beldurrik hauteskundeei. Erronka hartzen dugu eta nazioarteko komunitatearen aurrean egingo dugu. Hori bai, abenduaren 21eko emaitzak errespetatuko ditugu, edozein dela ere emaitza. Espainiako Gobernuari galdera argia egin nahi diogu: errespetatuko dituzue abenduaren 21eko emaitzak, edozein direla ere?

Kataluniako herriari eskatzen diogu indarrez eusteko. Errepresioa besterik erabiltzen ez dakien gorbernu bat daukagu aurrean. Guk pazifismoa dugu arma gisa, irabazi egingo diegu. Gogoan izan nahi ditut kontseilari guztiak. Denok ditugu presente gure jendea hemen Bruselan gaudela, beraz, babesa eskatzen dugu.

Azkenik, lan egingo dugu, PP, PSOE eta Ciudadanosek Kataluniako instituzioak ez ditzaten desmontatu. Abenduaren 21elo hauteskundeetan parte hartzea logika honetan ere sartzen da. Demokraziaren esparruan konfrontatu garenean, beti irabazi diegu. Hautesontziak dauden lekuan beti irabazi diegu".

Ez dela Belgikara etorri hemengo politika nahastera, esan du Puigdemontek kazetarien lehen galderari erantzunez.

Espainiak Kataluniako poliziaren kontrola hartu duen unean, Gobernuko kontseilariei segurtasun neurriak erabat kendu dizkiela salatu du, eta bere bizkartzainak ere nabarmen gutxitu direla.

Ez dela asiloa eskatzera joan esan du, eta Europar Batasuneko herritar gisa mugimendu askatasuna daukatela, "egunero milaka pertsona atzera eta aurrera ibiltzen diren bezala". Hala ere, garbi utzi du ez dela Espainiako Estatura itzuliko bertako sistema judizialaren esku jartzera, "behar bezalako bermeak" izan arte.

Nazioarteko Prentsaren Zentroan sartzen ari da Puigdemont ondorengo kontseilariekin: Toni Comín, Meritxell Serret, Dolors Bassa, Meritxell Borràs eta Joaquim Forn.

Aretoa txiki geratu zaie, barnean dauden kazetariei.

Espainiako Epaitegi Gorenak onartu egin du astearte goizean, aurreko egunean fiskaltzak jarritako kereila Kataluniako Parlamentuko Mahaiko kide soberanisten aurka. Matxinada, sedizioa eta diru publikoaren erabilera okerra egotziz 30 urteko kartzela eskatzen diete guztira sei pertsonari: Kataluniako Parlamentuko presidente Carme Forcadell, joan den uztail arte Mahaiko kide izan den eta egun Junts pel Síko talde parlamentarioko presidente den Lluis Maria Corominas, eta Mahaiko kide eta alderdi bereko kide Anna Simó, Lluis Guinó eta Ramona Barrufet; baita Catalunya Sí que es Pot-eko Josep Nuet.

European Free Alliance taldearen egoitzako atean zain zituen kazetarien galderei erantzun die, esanez, 12:30etako prentsaurrekoan emango duela informazio guztia.

Esquadra Mossoen arabera, ondorengo herrietako komisaldegietan agertu da Guardia Zibila: Complex Egara (Sabadeleen, Mossoen egoitza nagusia), Girona, Manresa, Sant Feliu de Llobregat, Granollers eta Tortosa. Aran informazio osoagoa.

Generalitateko presidenteak eta hainbat kontseilari Bruselara joan izanak nazioarteko hedabideak sorpresan harrapatu ditu eta presentzia handia eman diote beren espazioetan.

New York Timesek azaldu du Kataluniako liderra Belgikan agertu dela Espainiak epaitu nahi duelako.

Europako politikari jarraipena egiten dion Politico.eu gunean nabarmendu dute Kataluniako krisiak Belgika kolpatu duela, politika lokala desestabilizatuz.

Times britainiarrak nabarmentzen du EBk baztertu egiten dituela rebelioa egozten zaien lider kataluniarrak.

Eta Belgikan, Le Soir egunkariak azala ireki du azalduz herrialde hartako gobernuan sortu den gatazka, Carles Puigdemonten presentziagatik.

Espainiako Gobernuak abenduaren 21erako inposatutako hauteskundeen harira, alderdi eta eragile zibilak deitu ditu azaroaren 3a baino lehen aurrera eraman beharreko estrategiaz eztabaida dezaten.

ANCko Idazkaritza Nazionalak bart bileran ondorioztatu du hauteskundeetan parte hartzearen helburu bakarrak hau behar duela: "Errepublika berretsiko lukeen garaipen ukaezina lortzea, Trantsizio Juridikorako legea eta prozesu konstituziogilea indarrean jartzea eta Kataluniako herriaren ordezkari legitimoak berrezartzea".

Hala ere, ANCk dio abenduaren 21eko hauteskundeak "ezin dira erabat demokratikotzat jo", Espainiako Gobernuak "ilegitimoki" deitu dituelako eta "bozka hertsatzen duten Espainiako segurtasun indarren presentzia handiagatik".

Jordi Sànchez eta Jordi Cuixarten berehalako askatasuna eskatu du, baita 155. artikulua gaitzetsi eta Errepublika eraikitzeko kalean lanean ariko direla ziurtatu ere.

Pau Llonch (Sabadell, 1982) musikaria eta ekintzaile politikoa da. At Versaris rap taldeko, PAH plataformako, Crida per Sabadelleko eta CUPeko kidea da. Elkarrizketa egin diogu zurrunbiloaren erdian dagoela, eta analisi zorrotza estimatu diogu. Titular batzuk.

"Kataluniako autodeterminazio prozesuaren hegemonia pixkana posizio errepublikazaleetara biratzen joan da, eskubideen konkistara".

"Azken aldian CUPek instituzio mailan duen papera minimizatu dute eta prozesuak dinamika elitista izan du, 'despatxista' nolabait esateko".

"Maila politikoan, auto-suntsitzen joan da Kataluniako eskuina. Eskuin ekonomikoak ez du sekula babestu proiektu independentista".

"Espainia eta Kataluniako ezker ez-independentistek ez dute eztabaidatu gaiaz azken 40 urteetan. Nazionalismo espainiar naturalizatua ezkutatzen dute".

"Prozesu Katalanarekiko paperik kaltegarriena jokatu du EAJk azken hilabeteetan".

"Ez nago ziur Kataluniako Gobernuak konfiantzarik duen herri mugimenduetan, ea konturatzen den zer nolako indarra izatera hel daitekeen".

"Trantsizio legeak jasotzen duen prozesu konstituziogilea edukiz betetzea izango da ezker independentistaren erronka handiena".

"Europar Batasuna zer den norbaitek argi badu, hori Kataluniako ezker independentista da. Beste ezker batzuei zer pentsatu eman behar lieke"

"Kataluniako Gobernuak aurrera tinko egiten badu, Errepublikaren legaltasuna eraikiz, instituzionalizazio bikoitza eta gatazka egoera ekarriko du".

Gaur goizetik zerbitzuz kanpo daude, Moncloaren aginduz, govern.cat eta president.cat webguneak, nahiz eta Generalitatearen web orri administratibo batzuk indarrean dauden. Twitter kontua ere badabil, baina bertan ageri diren loturetako askotara sarbiderik gabe.

Abenduaren 21erako hauteskundeetara deitu izana erabaki arriskutsutzat jo du PPrekin Espainiako Barne ministro izandako Jaime Mayor Orejak. "Mugimendu independentistak irabaziz gero, legez kanpoko erreferenduma izan zena legezko bilakatuko delako", esan du Donostian jaiotako politikariak.

Catalunya Radio eta Vilaweben bitartez zabaldu da Carles Puigdemont eta berarekin batera Bruselara joan diren Generalitateko gainerako goi-karguek 12:30ean emango dutela prentsaurrekoa Belgikako hiriburutik. Hainbat iturrik segurutzat ematen dute erbestean arituko dela Errepublikako Generalitatea –modu sinbolikoan beraz– datozen asteetan, independentismoak abenduaren 21erako Mariano Rajoyk deitutako hauteskundeak prestatzen dituen bitartean.

Bilbon manifestaziora deitu dute larunbaterako Espainiako Konstituzioaren 155. artikuluaren aurka. 17:00etan aterako da La Casillatik. EH Bildu, ELA, LAB, Gure Esku Dago, Steilas, Etxalde, EHNE, CNT, ESK eta Hiruk deitu dute.

Kataluniako independentziaren aldeko borroka denak indarkeriarik gabekoak izan daitezen sustatzen du En Peu de Pau koordinadora sortu berriak. Bertako kide Pepe Beunzarekin aztertu dugu aktualitatea eta borrokaren urteetako esperientzia, borrokaren poza kutsatu digun elkarrizketa patsadatsuan. Estitxu Eizagirrek egindako elkarrizketa.

ERCk egin bezala, PDeCATek ere adierazi du abenduaren 21eko hauteskundeetara aurkeztuko dela. Aurrekoetan bi alderdiek Junts pel Sí plataforman elkarrekin joan ziren. Urriaren 1eko erreferenduma sustatu duten hiruretatik, CUP falta da jakinarazteko aurkeztuko denez.

Fiskaltzak euren aurkako kereila aurkeztu duen egun berean, Bruselara joan dira Carles Puigdemont eta Generalitateko beste zenbait kide. Asteartean agerraldia egingo du bertatik.

Igandean, Puigdemonti asilo politikoa eskaintzearen alde agertu zen Belgikako Migraziorako Estatu idazkaria, Theo Francken. Haatik, halako eskaintzarik dagoenik ukatu lehen ministro belgikarrak, Charles Michelek.

Bidaiaren antolatzailea, El Periódico-egunkariareren esanetan, Amadeu Altafaj izan da, hau da, Generalitateak Europar Batasunaren aurrean oraintsu arte izan duen ordezkaria. Moncloatik iritsitako kargugabetze agindua onartu duela jakinarazi du Altafajek gaur bertan.

Puigdemont Bruselara joan izanagatik "kezkarik ez dutela" adierazi dute Espainiako Barne Ministerioko iturriek, presidentea Generalitateko jauregira gaur ez joatea baita interesatzen zaiena.

"Hauteskunde ilegitimoak jarri dizkigute aurrean. Tranpa bat. Hala ere, boto kutxek ez digute beldurrik ematen" adierazi du ERCko Sergi Sabriàk astelehenean. Orain arte Junts pel Sí koalizioan Kataluniako gobernuko kide izan den alderdiak, horrenbestez, 155. artikuluaren aplikazioaren ondorioz Espainiako Gobernuak deitu dituen hauteskunde autonomikoetan parte hartuko du. Hauteskundeak "errepublika finkatzeko aukera bat gehiago" izateko nahia adierazi du alderdiak.

Matxinada, sedizioa eta diru publikoaren bidegabeko erabileragatik kereilak jarri ditu Espainiako Estatuko fiskaltzak Kataluniako Gobernuko kideen kontra. Gainera, Kataluniako parlamentuko mahaiko kideen kontra ere joko du José Manuel Mazak. Gobernuko kideen aurkako kereila Espainiako Auzitegi Nazionalean jarri du fiskaltzak, ulertuta kide horiek forudun izateari utzi diotela. Parlamentuko mahaiaren kontrako kereila berriz, Espainiako Auzitegi Gorenaren aurrean jarri da.

Igande arratsaldean ohar bat publikatu zuen Podemos barruko Antikapitalisten korronteak. Ohar horretan zioten "Kataluniako Errepublika berria" onartzen zutela. Berehala Teresa Rodriguez eta korronte horretako zenbait kideek beste ohar bat kaleratu zuten Kataluniako Errepublika onartzearen aurka. Gaur goizean Pablo Iglesiasek esan du Antikapitalistak "politikoki Podemosetik kanpo" daudela eta orain alderdiko organoek erabaki beharko dutela nola kudeatu egoera hau.

La Vanguardia-k argitaratu duenez, Carme Forcadellek desegintzat eman du Kataluniako parlamentua. Asteartean parlamentuko mahaia bilera egitekoa zen, baina deialdia bertan behera geratu da, ganbera "desegin" delako. Forcadellek parlamentuko presidente izaten jarraituko luke hauteskunde autonomikoak egin arte eta bilerak deitzeko eskumena dauka, baina ez parlamentuko mahai arruntarenak, haren ordezko Diputazio Iraunkorrarenak baizik.

Igande gauean, La Sexta telebista kateko "El Objetivo" saioan egin zioten elkarrizketan adierazi zuen, abenduaren 21eko hauteskundeak bere gustokoak ez diren arren parte hartzearen alde dagoela. Bere ustez, Xavier Domenech izango da En Comu Podemen hautagaia.

Kataluniako Errepublika deklaratu osteko lehenengo lan eguna da. Goizean goizetik zalantza ugari zeuden Espainiako Gobernuak kargugabetu dituen Kataluniako Gobernuko kide eta goi kargudunek hartuko zuten jarreraren inguruan. Hala ere, normaltasunez hasi dira euren lanpostuetara iristen Espainiako Gobernuak kargugabetutako pertsona ugari, Azpiegitura eta Mugikortasun idazkaria Ricard Font, Hezkuntza Politikako idazkaria, Pere Aragones Ekonomia Idazkaria eta Josep Rull Lurralde Kontseilaria besteak beste.

Al despatx, exercint les responsabilitats que ens ha encomanat el poble de Catalunya. #seguim pic.twitter.com/npc6vFH0rB

— Josep Rull i Andreu (@joseprull) 30 de octubre de 2017

Espainiako Gobernuak Mossoak bidali ditu goi kargudunei ohartaraztera lanean jarraitzen badute usurpazio delitu bat egingo dutela. Espainiako Gobernuak jakinarazi du zenbait ordu utziko dizkietela kargugabetuei euren gauzak jaso ditzaten bulegoetatik. 

" Urriaren 1ean umiliatua sentitu zen Espainia gozatzen ari da egunotan 155.eko makil-dantzari ekin ondoren, independentismoa aldarrikapenetarako eta kaleak betetzeko gai ikusten duelako baina ez Estatu bat edukiz betetzen jarraitzeko gai. Harrokeria eta plazerrez beteriko burla keinu sakonez, pistolarekin burura apuntatuz, lerro gorria pasatzeko ausardiarik ez duela esaten dio espainiar agintariak armagabetutako katalan agintariari. Ostiraleko herri pozaren ondoren, asteburuko lasaitasunak irudi hori utzi zuen barrikadaren alde bateko zein bestekoen begi-ninietan. Edo, hainbat irudiren artean, hori ere bai".

Jarraitu irakurtzen Xabier Letonaren analisia

Podem-eko egungo zuzendaritzaren hainbat erabakiren aurka agertu da Podemos, besteak beste  abenduaren 21erako Espainiako Gobernuak Katalunian deitutako hauteskunde autonomikoetara ez joateko ireki zuen aukeraren aurka. Podemeko zuzendaritzaren esanetan, ikusita urriaren 1ean zer gertatu zen,  ez luke zentzurik abenduaren 21ean hauteskundeetara joatea, baldin eta ez balitz 155.aren aurkako fronte batean. Halaber, Podemosek egotzi dio Podemeko diputatu Albano-Dante Fachini  Errepublikaren Aldarrikapenerako egunean Podemosek ez zekiela Podemeko diputatuek zer egin behar zuten, eta horrek oso egoera deserosoa sortu ziela. Ondorioz, Podemosek erabaki du galdetzea Podemeko partaideei ea 21eko hauteskundeetara En Comúkoekin joan nahi duten hauteskundeetara.

Podemoseko sektore antikapitalistak dagoeneko onartu du Kataluniako Errepublika eta honek hainbat kalapita sortu du. Teresa Rodriguez eta Jose María Gonzalez Cadizeko alkateak lehenbiziz adierazi dute ez daudela ados antikapitalisten erabaki batekin. Irtenbide bakarra erreferendum adostua dela diote eta, 155. artikuluaren aurka eta independentziaren aldebakarreko aldarrikapenaren aurka daudela.

Dentsitate politiko handiko asteburuaren ostean, astelehenean ikusiko da nola jokatuko duten Kataluniako Errepublika aldarrikatu berriaren gobernuak eta funtzionarioek Espainiako Estuaren erasoei aurre egiteko. Zer egingo du Madrilek 155. artikulua indarrean jartzeko praktikan, eta zelan erantzungo dute Generalitateak, Parlament-ak eta langile publikoek?

Ikus artikulu osoa lotura honetan.

Mehatxu doinuz aritu da Pablo Casado PPko komunikazio arduraduna –Puigdemonten geroa eta Companysen fusilatzearen arteko lotura egin zuen bera– El Mundo egunkariari emandako elkarrizketaren zenbait pasartetan. Bertan dioenez, 155 artikuluaren aplikazioa ohartarazpena da Espainiako Estatuaren barruan independentzia nahi luketen nazioentzat. 

Desobedientzia baketsua arbuiatu du Casadok: "ANCk eta Òmniumek matxinada baketsua aipatzen dute, baina matxinada sekula ez da baketsua. Autoritatearen aurrean erresistitzea indarkeria mota bat da, legearen aurkakoa den heinean".

Euskal Herriaren paralelismoa ere egin du: "Zer gertatu zen Euskadin Batasuna legez kanpo utzi zenean? Sekulako liskarrak  iragarri ziguten, eta aldiz, gertatu zena izan zen kutxazainak eta autobus-geltokiak erretzeari utzi zitzaiola. Bizikidetza berrezarri zen, legalitatearen barruan. Katalunian ere, Cuixart eta Sánchez (sic) jaunak atxilotu zituztenean, protesta gau osoa irautekoa zen, eta azkenean ordu eta erdi iraun zuen ".