Nahasmen handia dago uneotan Parlamentuan; hipotesiak dantzan dabiltza baina inork ez daki zehazki zer dela-eta atzeratu den ordubete Carles Puigdemonten agerraldia. Bitartean, presideneta Junts pel Síko parlamentari gehienekin bileran dago oraintxe. Aurretik JxSi eta CUPen arteko bilera izan da, azken horien desadostasunak izan baitaitezke atzerapenaren zergatia; Vilaweben arabera, bileratik pozik atera dira CUPeko kideak.

Nazioarteko bitartekaritzaz gain, CUPekin desadostasunak ere badaude plenoaren atzerapenaren atzean El Nacional webguneak argitaratu duenez.

TV3k azaldu duenez CUPek esan du Puigdemontek irakurri beharreko testua ordubete lehenago jaso duela eta aztertzen ari dela, horregatik atzerapena.

Carles Puigdemonten agerraldiaren atzerapenaren motiboa Europako Batzordearen bitartekaritza izan zitekeela adierazi dute azken minutuetan zenbait hedabidek. Jean-Claude Junckerren prentsa arduradunak ukatu egin du Twitter bidez.

Jordi Sànchez ANCko presidenteak adierazi du "elkarrizetarako deia eta nazioarteko bitartekaritza" izango direla Carles Puigdemontek Kataluniako Parlamentuan egingo duen agerraldiaren ardatzak. Legebiltzarrean bertan egin ditu adierazpenok Sànchezek.

Puidgdemontek berak eskatu du plenoa ordubete atzeratzeko El Nacional-en arabera. TV3ek azaldu duenez, plenoaren aurretik parlamentuko mahaiaren bilera deitu dute. Atzerapena nazioarteko bitartekaritzarekin lotuta egon daitekeela adierazi diote Catalunya Radiori Puigdemonten gobernuko iturriek. Bestalde, PPk eta Ciudadanosek eskatu dute plenoa bertan behera uzteko, baina proposamen horrek ez du aurrera egingo parlamentuko mahaian alderdiek duten pisua kontuan hartuta.

El Paisek zabaldu duenez, Madrilgo gobernuaren bozeramaile Rafael Hernandoren ahotan jarrita, Mariano Rajoyren gobernuak 155. artikulutik haragoko erantzun multzo konplexuago bat dauka prestatuta Kataluniarako. 155. artikulua ezartzeko oinarri juridikoa falta dela esan dio Rajoyk gaur Ciudadanoseko Albert Riverari.

Naiz-ek argitaratu duenez, Turismo sailburuaren gabineteburu den Andoni Unzaluk Euskadi Irratiko tertulian defenditu du Kataluniari Espainiako konstituzioaren 155. artikulua ezartzea, baztertu gabe Puigdemont presidentea bera atxilotzea. EH Bilduk eskatu du Unzalu berehala kargutik kentzeko.

"Tankerik ez begi-bistan" izenburua jarri dio La Directa-k gaur argitaratutako artikulu bati, zeinean aztertzen den Katalunian armada espainiarrak daukan presentzia. Azken asteetan sare sozialen bidez irudi asko zabaldu dira, erakutsiz ibilgailu militarrak Kataluniara bidean. Datuetan oinarrituta ordea, hedabide kataluniarrak azaldu du presentzia militarra ez dela ohikoa baino handiagoa, salbuespen bakarrarekin: Zaragozatik bidalitako 20 kamioi, funtzio logistikoarekin bidaliak Sant Boira.

Jesus Rodriguez kazetariak sinatutako piezaren arabera, 70.000 eta 270.000 soldatu artean beharko lirateke Katalunia kontrolpean edukitzeko –kopuruan hainbesteko tartea egotearen arrazoia da, herritarrek hartuko luketen jarrera aldagai garrantzitsua delako mota horretako operazioetan–. Bestalde, kontrol sinbolikoago baterako –garraio, energia eta telekomunikazioen oinarrizko azpiegiturak hartzea, adibidez–, 5.000 soldatu beharko lituzkete. La Directa-ren arabera, gaur egun armadak Katalunian dauzkan indarrekin, hori ere ez litzateke posible.

Margoketak agertu dira urriaren 1ean errepresioa gehien jasan zuen guneetako batean, Bartzelonako Ramón Llull eskolan. Katalunia Espainia dela aldarrikatuu, Puigdemont iraindu eta Guardia Zibila goratzen dute pintadek, besteak beste.

 “Zerbitzuz kanpo gaudenean, poliziaren erasoengandik herritarrak defendatzera kalera ateratzen ari garen suhiltzaileak gara. Munduko suhiltzaile maiteak, Kataluniako suhiltzaileok zuen laguntza eskatzen dugu, gure herritarren funtsezko eskubideak babesteko”. Horrela dio suhiltzaile katalanek zabaldu duten webguneak. “Etorri eta lagundu nahi bagaituzu zibilak babesten, demokraziaren, eskubideen eta askatasunen borrokan, jarri gurekin harremanetan! Eskuak zabalik hartuko zaitugu eta lo egiteko lekua aurkituko dizugu”. Kataluniako profesionalei babesa adieraziz nazioarteko suhiltzaileek manifestua sinatzeko edo argazkia ateratzeko aukera ere ematen du guneak.

Donald Tusk Europako Kontseiluko presidenteak "elkarrizketa ezinezko bihurtuko duen" iragarpenik egin ez dezala eskatu dio Carles Puigdemonti, twitter bidez.

ANCk jakinarazi duenez, dagoeneko 218 salaketa jaso dira Bartzelona hirian urriaren 1ean Espainiako poliziek eragindako lesioak direla eta. Gehienak lesio arinak dira, baina bi kasu larri ere badaude.

Carles Puigdemont Generalitateko presidentea auzitara eramatea aztertzen ari da José Manuel Maza Espainiako Estatuko fiskal nagusia. Ara egunkarian jaso dutenez, Puigdemontek parlamentuan egingo duen adierazpenarenaren ondoren gerta daitekeenaz Mazaren inguruko iturriek ez dute inongo ekintzarik baztertzen, ezta “iraultza delitua” leporatuta presidentearen aurkako kereila aurkeztea ere. Delitu horregatik 15-25 urte arteko espetxe-zigorra jaso dezake. Dirudienez, informazio hori iritsi zitzaion Pablo Casado PPko komunikazio idazkariordeari, eta horregatik iradoki zuen bere diskurtsoan Puigdemontek kartzelan bukatu dezakeela.

Puigndemonten agerraldirako pare bat ordu falta denean, estelada eta senyerekin jantzitako traktore ugarik bete dute Bartzelonako Lluís Companys pasealekua, bertakoen txaloen artean.

eldiario.es hedabideak zabaldu du PSOEren erabakia: En Comútaldeak (Podemos) Madrilgo Legebiltzarrean aurkeztu duelarik proposamen bat eskatuz ez dadila aplikatu 155. artikulua Katalunian, sozialistek ezezkoa emango diote. Esan nahi baita, bidea irekita utziko diote Kataluniaren autonomia eteteko Mariano Rajoyk daukan aukerari. Patxi Lopez izango da sozialisten jarrera defendituko duena.

Katakuniako hainbat erakunde publiko eta elkarteren aurka sedizioagatik abiatutako ikerketaren barruan, Guardia Zibilak Òmnium eta ANC taldeen diru kontuak bloketu eta arakatu ahal izatea eskatu dio Espainiako Auzitegi Nazionaleko Carmen Lamela epaileari.

Halaber, Mossoei eskatu diete identifika ditzatela urriaren 1ean Guardia Zibilaren eta Polizia Nazionalaren kargak "oztopatu" zituzten agenteak.

Espainiako Gobernuaren asmoen berri duten bi iturri aipatuz, Bloomberg-ek argitaratu du Espainiako Gobernua prest dagoela Puigdemont "berehala" atxilotzeko, gaur arratsaldean independentzia aldarrikatzen badu. Informatu duenez, erabakia ez dago hartuta oraindik eta arratsaldeko adierazpenak baldintzatuko du. Nolanahi, Espainiako indar polizialak prest daude operazioa martxan jartzeko.

… baldin eta Kataluniako Futbol Federazioa ez balitz (edo ez balute) Espainiako Federaziotik ateratzen, edo gobernuak Kirolaren Legea aldatuko balu. Horiek dira ere Txapeldunen Liga jokatu ahal izateko baldintzak.

> Artikulu osoa Jon Tornerren blogean.

Jordi Turull Generalitateko bozeramaileak hitz egin du, prentsaurrean. Adierazi du Puigdemontek esango duenarekin guztiz kohesionatuta dagoela Generalitatea, baina ez du ezertxo ere aurreratu presidenteak esango duenaz, kazetariek behin eta berriro galdetu arren.

PPko Pablo Casadori buruz galdetu dio kazetari batek –aurreko egunean honek ulertzera eman zuen Companysek bezala amaituko zuela Puigdemontek–. "Frankistek fusilatutako presidente bakarra izan zen Companys", adierazi dio minduta Casadori.

"Espainiako estatua guri min egiten saiatzen ari da, baina bere burua kaltetzen ari da", adierazi du, ondoren gehitzeko "Kataluniako ekonomia sendo eta indartsua" dela. Kataluniatik egoitza fiskala ateratzen ari diren enpresen harira, "Kataluniako ekonomia kaltetzen saiatuz, Espainiakoa kaltetzen ari dira", esan du.

En Comú-k bultzatuta, astearte honetan bertan eztabaidatuko da Espainiako Kongresuan Konstituzioaren 155. artikuluaren aplikazioari buruz. Carles Puigdemontek arratsaldean egingo duen adierazpenaren ondoren egingo da debatea eta espero da bertan argituko dela alderdi bakoitzak bere posizioa argitzea Kataluniaren autonomia bertan behera uztea ekarriko lukeen erabakiaren inguruan. Zenbaiten ustez, eztabaida gaur bultzatzeko En Comú-ren motibo nagusia da PSOEren jarrera argitzea, azken asteetan gaiari buruzko mezu kontraesankorrak eman dituelako.

Urriaren 9ko Valentziako gertakariez adierazpena egin du Anna Gabriel CUPeko kideak, Estitxu Eizagirrek jasotako irudiak:

ANCk bideo bat sareratu berri du, independentzia aldarrikapena baino ordu gutxi lehenago.

Generalitateko presidente ohi José Montillak eskatu die Puigdemont eta Forcadelli ez dezaten independentzia aldarrikatu, gaur zabaldu duen eta ARGIAk laburbildu duen agirian.

Gaurko Legebiltzarreko saioa jarraitzeko pantaila erraldoiak jartzen ari dira Kataluniako hainbat lekutan. Bartzelonan, Gironan, Reusen, Ripollen, Manresan, Lleidan, Sallenten...

Horrez gain, autobusak antolatzen ari dira inguruetatik Bartzelonara joateko.

Kataluniako gobernuak adierazi duenez, goizean bildu da Carles Puigdemont bere sailburuekin. 13:00etarako iragarri dute prentsaurrekoa, ondo bidean bozeramaileak emango duena.

30 bat lagun elkartu ziren astelehenean Iruñeko Katakraken CaixaBanken dauzkaten kontuetatik dirua ateratzeko, banku horrek Kataluniako independentzia prozesuaren aurrean bere egoitza aldatzearen ondorioz. Ekimenaren bultzatzaileek azaldu dutenez, beste 40 lagun ere jarri dira beraiekin harremanetan, euren kontuak ixteko prest daudela adieraziz.

"Egunero hartzen ditugun erabakiak bi aldiz pentsatu behara dugu, eta gure balioen kontra jotzen duten enpresekin ditugun harremanak berrikusi", adierazi zuten bildutakoek. Batzuk hasiak dira jada euren kontuak ixteko tramiteak egiten eta astelehenko bileran aztertu zen hori egiteko kasu bakoitzean zer nolako aukerak dauden. Datozen egunetan jakinaraziko diote finantza erakundeari kontuak ixteko arrazoia zein izan den, lehenbizi banaka eta gero kolektiboki. Gainera, euren lankide, senide eta lagunen artean ere zabalduko dute ekimenaren berri.

Datorren astelehenean, urriak 16, berriz bilduko dira Katakraken, 19:00etan. Email helbide bat ere jarri dute ekimenarekin bat egin nahi duen ororen zerbitzura: bagoazcaixabank@gmail.com.

Gehienek kanpotik segituko beharko dute Carles Puigdemonten deklarazioa, baina eraikinaren barrua bezala kanpoa goizean goizetik kameraz gainezka daude.

Espainiako Gobernuko presidente Mariano Rajoyk prentsaurrekoa eskainiko du Espainiako Kongresuan asteazkenean 16:00etan, Kataluniako egoera politikoa analizatzeko.

ERCren Madrilgo diputatu Joan Tardàk egin du salaketa hori TV3 telebista publiko katalanaren Els matins saioan, zehazteko sektore batzuetan badagoela "Kataluniako gizartea ulsterizatzeko gogoa". Carles Puigdemontek gaur Legebiltzarrean egingo duenaz esan du: "Bi ardatzak izango dira batetik Urriaren 1a egon dela eta bestetik herri hau beti aurrera atera dela negoziatuz. (...) Orain behar ditugu adorea eta buru argia". Ada Colau Bartzelonako alkatearen proposamenaz hau esan du: "Ekidistantzia nahasgarria iruditzen zait, alde batetik dagoenean babesik gabeko herria eta bestetik Estatu bat bere bortizkeria guztiarekin". 

Catalunya Radio-n egindako adierazpenetan, ANCko presidente Jordi Sànchezek herritarrei eskatu die modu baketsuan emateko babesa Gobernuari eta Parlamentuari. "Ez gaitezen probokazioetan erori", esan du.

Herritarrak 18:00etan deitu dituzte Parlamentuaren aurrean. Hemen kartela.

Alcarrás herriko udaltzainek bi Guardia Zibil harrapatu dituzte Puigdemonten aurkako pintada bat egiten galizieraz. "Puigdemont nunca mais" dio errepidean egindako idatziak, Segre egunkariak jaso duenez.

Carles Puigdemont presidenteak erreferendumeko emaitzen berri emango du Kataluniako Parlamentuan, 18:00etatik aurrera. Interbentzio historikoa egitea espero da, iturri soberanisten arabera. Zer eta nola esango duen da inkognita nagusia, baita Espainiako Estatuaren erreakzioa ere. Ara.cat-en diotenez, elkarrizketa ahalbidetuko duen independentzia aldarrikapena egitea espero da, hau da, bateragarri egitea erreferendum legea –zeinak aurreikusten duen erreferendumean baietzak irabaziz gero independentzia aldarrikatzea– eta trantsizio legearen aplikazio progresiboa. Independentzia aldarrikapenaren eta bere aplikazio efektiboaren salto gradual bat.

Nació Digitalen diotenez, "Puigdemonten adierazpena Kataluniako Errepublikaren hasiera formala izango da".

Espainia osotik Bartzelonara joandako unionistei Vargas Llosarekin batera mintzatu zitzaiela eta oraindik emozioa gainditu gabe erantzun die Josep Borrell ministro ohi sozialistak El País-en galderei. Generalitatearen eta Madrilgo Gobernuaren arteko bitartekaritzaz pentsatzen duena argi eta garbi utzi du: "Bitartekaritzarik ez dago eta ez du egon behar".

Kataluniako Legebiltzarrak bihar 18:00etan hasita baitu osoko batzarra urriaren 1eko erreferendumak aztertzeko aztertzeko, ANC mugimenduak herritarrei dei egin die atarian biltzeko, legebiltzarkideei eskatuz erreferenduma aitortu eta Kataluniaren independentzia aldarrikatzeko.

Prentsaren aurreko agerraldian egin du adierazpen eskandalagarri hori PPko eledun Pablo Casadok.

Orain artean Mossoen esku bazegoen Auzitegi Nagusiak Bartzelonan daukan egoitza zaintzeko ardura osoa, orain Polizia Nazionalarekin batera jardun beharko dute eta gainera polizia espainiarraren aginduetara. Kataluniako legebiltzarrak alde bakarreko independentzia aldarrikatu dezakeen egunaren bezperan hartu du erabakia Kataluniako Auzitegi Nagusiak.

Urriaren 10an asko dago jokoan Katalunian, baina horren ondoren 11 iritsiko da eta gero 12a... Espainiako (eta batik bat Guardia Zibilaren) patroia den Pilarreko Andramariren eguna. Urtero bezala baina aurten indar handiagoz dabil egun horretan ezer ospatu ez eta normaltasunez lan egiteko deia Kataluniako bazter askotan. Ez dira gutxi zabalik egongo diren enpresa, komertzio eta administrazioak.

Gaur PSCren zuzendaritza bilerara etorri da PSOEko buru Pedro Sanchez. Miquel Icetarekin eman duen prentsaurrekoan Puigdemont eta Rajoyri egin die dei tentsioa berotzeari utzi eta elkarrizketari ekin diezaioten, baina aldi berean aditzera eman du mehatxua ere argi eta garbi: "Kataluniaren alde bakarreko independentzia ezin sartu daiteke inongo zuzenbide estatutan" esan du, gehitzeko "edonolako haustura unilateral bati zuzenbide estatuak emango dion erantzuna guk babestuko egingo dugu".