Asteazken arratsaldean pasa dira epailearen aurretik asteleheneko polizia operazioan atxilotutako Indar Gorriko azken kideak. Denak aske utzi ditu epaileak haien adierazpenak entzun ondoren, baina hilean behin epaitegitik pasa beharko dute. Fermin Otamendi epaileak publiko egin duen autoan esaten da, atxilotuen helburua "beste zale erradikalak erasotzea" zela, futbol partiduak horretarako aitzakia gisa erabilita.

Operazioaren atzean egon daitezkeen bestelako motibazioak aipatu ditu Indar Gorri taldeak asteazken honetan bere Facebook orrian publiko egin duen oharrean, besteak beste Nafarroako erregimenaren kontra posizionatu izana, independentzia aldarrikatzea edo euskal preso politikoei elkartasuna adieraztea. Jarraian oharra osorik (gaztelaniaz).

Astelehenean atxilotutako hemezortzi lagunetatik hamar aske dira dagoeneko epailearen aurretik pasa ondoren, Naiz.eus-en irakur daitekeenez.

Altsasuko Hitzondo hedabideak jakinarazi digunez, 17:00etan jarraituko dute atxilotuek epailearen aurrean deklaratzen.

Asteartean Iraultza 1921 talde arabarrak Indar Gorriri elkartasuna adierazteko egindako kontzentrazioaren bideoa jarri du sarean.

Ez dira nafarren alde agertu diren bakarrak izan. Sevilla futbol taldeko zaleek osatzen duten Biris Norte taldeak bere Twitter kontuaren bidez "gezurrak eta errepresioa" salatu ditu.

Indar Gorriren Facebook orrian aurki daitezke beste hainbat elkartasun adierazpen: Donostiako Mujika taldea, Galiziako Riazor Blues, Vallecaseko Bukaneros, Gasteizko Indar Baskonia...

Dagoeneko sei dira epailearen aurretik pasa ondoren aske geratu diren Indar Gorriko kideak. "Etsai zein adiskide ziren zaleen taldeekin borroketan" parte hartzea egotzi diete, EITBren arabera. Gara egunkariko Natxo Matxin kazetariak Twitter bidez iradoki du, posible dela atxilotu guztiak aske geratzea.

EITBk informatu duenez, asteleheko operazioan atxilotu zituzten bi lagun aske utzi dituzte. Hilean behin etxetik gertuen duten epaitegira joan beharko dira sinatzera. Gainerako atxilotuak epailaren aurrera eramango dituzte asteazken honetan.

Atxiloketak salatzeko manifestazioaren ostean, istiluak izan dira Iruñeko Alde Zaharrean espainiako poliziarekin. Bideoa: Ahotsa.info.

Aitor Agirrezabal Naiz.eus-eko kazetariak azken atxiloketen berri eman duen txioan dio 17 atxiloketa baieztatu dituztela abokatuek.

Fermin Otamendi epailearen aginduz abiatu dute Indar Gorriko kideen aurkako polizia operazioa astelehen goizean. Lehenago ere Iruñean ezaguna egin zen Otamendi, besteak beste 2013ko Sanferminetako txupinazoan Udal Plazan ikurriña erraldoia jarri zuten "arrantzale bizardunak" auzitara eramategatik. Ordena publikoaren kontrako delitutzat jo zuen ekintza epailearen autoak.

2014ko ekainean ere eman zuen zeresana, poliziak tirokatutako pilotakada baten erruz begia galdu zuen gazte baten kasua zela-eta. Bi urte lehenagoko irailaren 26an ELAk, LABek eta ESK-k deitutako mobilizazioetan zauritu zuten gaztea, eta Otamendik bere autoan onartzen zuen arren lesioak poliziaren gomazko pilotek eragindakoak zirela, atzera bota zuen salaketa. "Mobilizazioaren deitzaileei" erreklamatzeko esan zion gazteari, poliziaren jokabidea neurrizkoa izan zela baieztatzearekin batera.

Ahotsa.info webguneak Twitter bidez jakinarazi duenez, Lekarozko gazte bat atxilotu dute Indar Gorriko kideen aurkako operazioan. Hori dela-eta, Elizondon bilkura deitu dute 20:00etan. Bestalde, Altsasuko Gaztetxeak informatu duenez, bigarren altsasuar bat ere atzeman dute. Abokatuarekin konfirmatu ondoren, Hitzondo hedabideak baieztatu du bigarren altsasuarraren atxiloketa.

Atxiloketak salatzeko kartelak jartzen hasi dira Atarrabian (@KaleZale Twitter kontuak zabaldu du irudia).

Altsasuko Hitzondo hedabideak jakinarazi duenez, 20:00etan bilkura egingo dute Foruen enparantzan. Atxilotuei babesa adierazi eta informazioa eskainiko dute. 

EFEko iturriek ziotenaren kontrara, Europa Press agentziak argitaratu du astelehen goizeko polizia operazioa "lesio delituak" direla-eta jarri duela abian Iruñeko Bigarren Instrukzio Epaitegiak. Iturri polizialak aipatuz agentziak argitaratu duenez, "ez da Indar Gorriren kontra" zuzendutako sarekada. Operazioaren baitako ekintzak sekretupean egiteko dekretatu du epaileak.

Aitor Agirrezabal Naiz.eus-eko kazetariak EFE agentziako iturriak aipatuz dio atxilotuei "terrorismoa goratzea" leporatzen dietela.

Albiste agentzien arabera, atxilotuak datozen orduetan pasako dira epailearen aurrera, eta asteartean deklaratzea espero da.

Goizeko 10:00etatik daude Espainiako Poliziako agenteak eta guardia zibilak Arrosadiako bi etxaberen atarian. Momentuz ez dira sartu, baina atxiloturen bat ekar dezakete sartzeko, Ahotsa.infok jakinarazi duenez.

Rayo Vallecano futbol taldeko zaleek atxiloketa salatu dute, Espainiako Estatua "gaixo" dagoela esanez eta "eromen absolutistak" jota dagoela.

#Indargorri edota #indargorriaurrera traolekin erabiltzaieek, @murdokino-k edota @ibarluzeaiker-ek esaterako, egindako iruzkin ugarik bi konturi egiten diote erreferentzia: Hainbat salaketa jaso dituzten Osasunako agintari ohiak libre dauden bitartean, zaleak atxilotzea justua al da? Bestetik, nola da posible Frente Atletico taldeko zaleak "eroso" mugitzea, eta Indar Gorriren aurka modu honetan egitea?

Operazioaren inguruko asanblada informatiboa egingo dute astelehen arratsaldean. 19:15ean da deialdia, Iruñeko Nabarreria plazan.

Hego Harmailetako zaleek sufritu duten jazarpena gogor salatu dute azken asteotan. Jakinarazi dute futbol zelaira sartu aurretik katxeatu egin dituztela, modu txarrean tratatu eta sinboloak kendu.

Taldeko zuzendaritzarekin hainbat bilera egin dituzte egoera konpondu aldera. Bien bitartean, ekimen desberdinak abiarazi dituzte. Llagosteraren aurkako partidan, esaterako, Indar Gorriko kideek harmailak hutsik laga zituzten protesta moduan.

Aitor Agirrezabal Naiz.eus-eko kazetariaren arabera, 10 baino gehiago dira atxilotuak.

Twitterren #indargorri eta #IndarGorriAurrera traolarekin ari dira erabiltzaileak informazioa zabaldu eta iruzkinak egiten.