"Badakigu gauza asko ez direla atera nahi genuen bezala, baina guk abantaila bat daukagu: zintzotasunez eta herriarekin jokatu behar dugu", esan du Arnaldo Otegik Elgoibarren egin dioten omenaldian. Presoen senideen alde hitz egin du, eta ezker abertzaleak autokritika egin behar duela adierazi du, baina ez inork horretara behartzen duelako. "Autokritika ez da ahuldade sintoma; guk autokritika egiten dugu herri honetatik jaio ginelako eta herri hau delako onartzen dugun epaile bakarra".

Elgoibarko etxetik, bideo bat igo du kartzelan izan den urteetan sare sozialen bidez babesa adierazi diotenei eskerrak emateko.

Lluis Llach musikaria eta JxSíko diputatuarekin mintzatu da Radio Euskadin Logroñoko kartzelaren atarian. Bere ustez Otegi pertsona garrantzitsua izango da. "Estatu arrazoiei erantzun dio bere atxiloketak, iluntasun demokratikoa izan da". Bere hitzetan, batzuei gustatu ala ez, entzun beharko den ahotsetako bat izango da Otegirena.

Otegiren askatasunaz mintzatu da PSEko presidente ohi Jesus Egiguren Radio Euskadin. "Kartzelan zazpi urte izan arren, Otegi bikain informatua egon da politikaz. Ezker abertzalearentzat estrategiarik onena zein den gogoeta egiteko denbora izan du. Hala ere, Euskadiko egoera kartzelan sartu aurretik eta orain oso ezberdinak dira. Podemos alderdiak konpetentzia egiten die, nahasmendua dago Bilduren nortasunaz... hori definitu beharko dute eta agian gehiegi espero dugu pertsona bakarraz. Hain arazo handiekin, lider politiko batek ezin du dena egun batetik bestera konpondu. Denbora beharko du ideiak dosifikatzen joateko".

Mundu mailako 10 joera erabilienen artean sartu da #FreeOtegi.

Espainiako Estatu mailan lehena.

Podemoseko buru Pablo Iglesias eta Ciudadanoseko Albert Riverak Twitterren hainbat txio gurutzatu dituzte Otegiren harira. Iglesiasek adierazi du Otegiren kaleratzea "berri ona dela demokrata guztiontzat". Riverak erantzun dio Otegi erakunde armatuko kide izateagatik atxilotu zutela, eta preso politikoak Venezuelan daudela.

Joseba Azkarraga, Sare plataformako eledunak nabarmendu du Otegi libre geratzea "urrats garrantzitsua" dela Espainiako eta Frantziako espetxeetan dauden gainerako presoen askatasunean "aurrerapausoak" ematen joateko. (Iturria: Berria)

Otegiren kaleratze uneko argazki galeriak egin dituzte hainbat hedabidek.

Berria.eus: Otegiren kartzela irteera.

Argazki galeria Naiz.eus-en: Caluroso recibimiento a Arnaldo Otegi tras más de seis años de prisión

EiTBren webgunean argazki galeria egin dute.

"Batzuek esaten dute Espainiako Estatuan ez dagoela preso politikorik, hau da froga egon badaudela", adierazi du Otegik Logroñoko espetxe kanpoan: "Honelakorik ez da ikusten preso sozial bat askatzen dutenean, immigrante bat atzerriratzen dutenean, desjabetze bat egiten dutenean. Badira preso politikoak Espainiako Estatuan". "Bakearen aldeko apustua egiteagatik kartzeleratu gintuzten; bakearen aldeko konpromisoa berresten dugu", gehitu du. "Lehendakari onena herria da", Otegiren hitzetan.

"Euskaldun gisa sartu gintuzten espetxean eta euskaldun gisa atera gara espetxetik", adierazi du oholtza gainetik: "Independentista gisa sartu gintuzten espetxean eta are eta independentistago atera gara. Sozialista gisa sartu gintuzten espetxean eta are eta sozialistago atera gara".

Espetxetik atera da Arnaldo Otegi. 200 lagun inguru ditu zain Logroñoko espetxearen aurrean.

Arnaldo Otegi Logroñoko espetxetik irteteko bezperan Elgoibarkoari buruzko artikulua kaleratu du New York Times berripaper estatubatuarrak. Otegik idatziz igorritako adierazpen batzuk aipatzen ditu bertan; horietan, EAEko lehendakarigai izateko EH Bilduren barne prozesuan bere burua aurkezteko asmoa agertu du Bateragune auziagatik espetxeratutako ezker abertzaleko liderrak. Prozesu hori martxoan egingo dela aurreikusita dago.