Greba zikloaren bosgarren greba egunak %75eko jarraipena izan du

Atzo arratsaldean burututako mahai negoziatzailearen aurretik, Hezkuntza Sailak aurreakordio proposamena bidali zigun sindikatuoi. Aurreakordio honek sektoreko beharrei erantzuteko edukirik ez zekarren. Beraz, grebetan aldarrikatutako eduki gehigarriak mahai gainean ipintzea eskatu genien sindikatuok. Zoritxarrez, ez da horrela izan.

Sindikatuok garbi daukagu eszenifikazio eta itxurakeria baten aurrean gaudela. Hezkuntza Sailak badaki, argi eta garbi, zein eduki jarri behar dituen mahai gainean piztuta dagoen gatazka bideratzeko. Eduki eta zehaztapenak txertatzeko exijitu zaienean, bestalde, ez dela posible esan digute. Atzokoa salatu nahi dugu, Hezkuntza Saila fede txarrez aritu dela pentsatzen baitugu. Hezkuntza publikoko irakasleon lan-baldintzak hobetuta, hezkuntza publikoko kalitateak hobera egingo duela argi utzi dugu eta helburu horrekin borrokan tinko jarraituko dugu.

Gaurkoari erreparatuta, STEILAS, LAB, ELA eta CCOO sindikatuok deitutako grebak jarraipen zabala izan du, urtarrila eta otsailean egindako beste lau greba egunen antzera. Deitutakoen %75ak babestu du. Hala ere, salatzekoa da Eusko Jaurlaritzak ezarritako gehiegizko zerbitzu minimoak direla eta ehundaka langileri greba eskubidea ukatu zaiela.

Grebaren arrakastaren adibide garbia da Bilbon batu garen jendetza. “Lan baldintzak hobetu, hemen eta orain erabakita!” lelopean deitutako mobilizazioan milaka langile elkartu gara. Milaka langilek salatu dugu EAEn Hezkuntza Sailaren jarrera: Hezkuntzako langileon lan-baldintzak okertzen ari dira, Hezkuntza Sailak erabakiak aldebakarrez hartzen ditu eta negoziazioak eduki esanguratsu gabe etengabe luzatzen ditu.

Aurretik burututako grebek eta mobilizazioek mahai negoziatzaileak deitzera eta pauso gutxi batzuk ematera behartu dute Hezkuntza Saila. Argi dago grebak direla Jaurlaritza mugiarazten dutenak. Sindikatuok benetako negoziazio erreala burutu nahi dugu, hitz eta asmo politetatik harago. Edukia, zehaztapena eta konkrezioa behar du balizko akordioak. Beste behin ere, atzo, Hezkuntza Sailaren asmoa negoziaketak irudikatzea izan zen.

Bosgarren greba egun honetan ere, irakasleok oso mezu argiak helarazi dizkiogu Hezkuntza Sailari:

• 15 urte direla hitzarmena eguneratu gabe; eta aski dela.

• Lan zamak arintzea, plantilak gazteberritzeko plan egokia ezartzea, enplegu publikoa kontsolidatu eta bermatzea, eros ahalmena berreskuratzea, lan osasuna zein euskara eta hezkidetza bermatzeko neurriak proposatzeko garaia dela.

• Ez badago aldarrikapen hauekiko erantzunik grebetan jarraitzeko indarrekin gaudela.

Beraz, Hezkuntza sailari eduki, zehaztapen eta konkrezioak dituzten mahaiak deitzeko exijitzen diogu. Hezkuntza publikoa indartzeko ezinbestekoa da inbertsioa handitzea eta lan baldintzak hobetzea eta eskola publikoa baliabideez hornitzea.

Gaurko egunari jarraipena emanez, bihar eta etzi ere greba egunak ditugu EAEko hezkuntza publikoko irakasleok. Irakasleon lan baldintzak hobetu, hemen eta orain erabakita!

The post EAEko hezkuntza publikoko irakasleoi grebekin jarraitzea baino ez zaigu geratzen appeared first on Steilas.