Sindikatuaren esanetan, ez dira onargarriak neurriaren premiazkotasunari edo daten konplexutasunari buruz emandako azalpenak, medikuen sindikatuak berak adierazi baitu uztailaren 17an Osasun Sailburuarekin izandako bileran jakinarazi zitzaiela neurri hori hartzeko asmoa zutela. “Zalantzarik gabe, Eusko Jaurlaritza berriaren erabaki politiko baten aurrean gaude; izan ere, pasa den astean, sektore publikoko langileen soldata-igoera onartu zuen, Mahai Orokorra ere deitu gabe, nahitaezkoa den bezala”.

Osakidetzako Zuzendaritzak planteatutako neurri zehatzei dagokienez, ELAk salatu du betiko errezeta berak aplikatzen jarraitzen dutela, eta soberan frogatu dela ez direla eraginkorrak. Zehazki, Lehen Arretako, Etengabeko Arretako Guneetako eta Larrialdietako medikuei aparteko orduak egiteagatik (autokontzertazioa) ordainduko zaien zenbatekoa hobetu da. Berriro ere, profesionalei gainkarga ezartzen zaie, eta zerbitzua lanaldi arruntetik harago lan egiteko borondatearen mende uzten da. ELAk behin eta berriz salatu du egiturazko konponbideak jorratzen ez diren bitartean, arazoak larriagotu egingo direla, gertatzen ari den bezala. Izan ere, Lehen Arretak urtean 180 egun funtzionatzen du murrizketekin.

Azkenik, azpimarratu du onartutako Instrukzioak aukera ematen duela praktiketan ari diren langileek (BAME) Lehen Arretako, EAGko eta Larrialdietako medikuen eginkizunak egiteko. Prestakuntza oraindik amaitu ez duten (nahiz eta egiteko gertu egon) eta, beraz, horrelako lanpostu bat betetzeko baldintzak betetzen ez dituzten langileei funtzioak esleitzeaz gain, Osakidetza eskulan merkea erabiltzen ari da bere egiturazko arazoak konpontzeko. Izan ere, aparteko orduen ordainketa medikuen zenbateko berean jasoko badute ere, gainerako ordainsariak praktiketako langileei dagozkienak izango dira.