Beste lan istripu hilgarri bat gertatu da, ez traumatikoa, Bizkaian. Horrekin, guztira 53 pertsona hil dira lanean aurten Hego Euskal Herrian, horietako 17 Bizkaian.

Antza denez, SIEMSA mantentze lan elektrikoko azpikontratako langilea zorabiatu egin da, Petronorren (enpresa nagusia) instalazioen barruko bihurketa azpiestazio batean lanean ari zela. Osasun zerbitzuek ezin izan dute ezer egin.

Beste behin ere, ELAk exijitu du enpresek Prebentzio Legea bete dezatela, eta erakundeek beharrezko baliabideak eman ditzatela ez-betetzeak zaintzeko eta jazartzeko. Eta, bereziki, azpikontratei dagokienez, jarduerak behar bezala koordinatzea eskatu du. Koordinazio horretatik abiatuta, enpresa nagusiak une oro zaindu beharko du beharrezkoak diren prebentzio- eta segurtasun-baldintzak betetzen direla, eta ez dio erabat muzin egin behar beharrezko gutxieneko segurtasun eta babeserako baldintzak zorrotz betetzeari.

Sindikatuak deitoratu du ohikoa dela zerbitzuak bata bestearen atzetik eta modu orokorrean azpikontratatzea kostuak merkatzeko, eta, ondorioz, lan baldintzak, prebentzioa eta segurtasuna ez betetzea edo prekarizatzea. Horrek, azkenean, saihets zitezkeen istripuak eta kalteak eragiten ditu.

ELAk dei egin du Petronorreko enpresa batzordeak eta kontratetako ordezkariek biharko, azaroaren 20rako, Petronorren Muskizko sarbide nagusian egingo duten kontzentrazioan parte hartzeko. Kontzentrazioa 12:00etatik 13:00etara izango da.