ELAk positibotzat jo du Arabako ehungintza eta oinetakoen merkataritzako greba eguna, jarraipen handia izan baitu. Natura, Woman 's Secret, Mayoral, Parfois, Bershka, H&M eta Primark dendetako langileek babestu dute deialdia, eta itxiera partzialak eta erabatekoak egin dituzte Arabako hainbat dendatan.

Plantilla 2023tik ari da borrokan, ARTE marka handien patronalak estatuko lehen hitzarmenaren negoziazioa sustatu zuenetik. ELAk aldarrikatu du Hego Euskal Herria aplikazio eremutik kanpo geratzea eta borrokari eta antolaketa sindikalari esker lortutako lan baldintza hobeak jasotzen dituzten hitzarmen probintzialak ezartzea.

ELAk gogorarazi du ARTE patronalaren estatuko hitzarmena Hego Euskal Herrian aplikatuko balitz, lan baldintzak ez ezik, probintziako hitzarmenen negoziazioa bera ere jokoan egongo litzatekeela.

Bihar ARTE patronala sindikatuekin bilduko da Madrilen, Estatuko lehen hitzarmena negoziatzen jarraitzeko. Horren aurrean, Gipuzkoako eta Bizkaiko ehungintza eta oinetakoen merkataritzako plantillek mobilizazioak egingo dituzte.