ELAk salatu du Laudioko Guardianen zuzendaritzak ezusteko bilera batean jakinarazi diola Enpresa Batzordeari lantegia ekainean ixteko asmoa, eta, horrenbestez, 171 langileen kontratuak eteteko asmoa.

Guardianek iragarri du datozen asteetan Labea geldiaraziko duela, berritzeko inbertsiorik ez egitea erabaki baitu. ELArentzat sinesgarriak ez diren arrazoi ekonomiko eta teknikoak alegatu ondoren, Guardianek 2020an lantegia zatituta hasitako zirkulua itxi du, automobilaren zatia salduta (Glavista) eta ondoren itxita, eta, orain, azkenean, Laudion Guardiani geratzen zitzaiona ixten.

Multinazionalak lurraldean industria eta enplegua suntsitzen jarraitzen duela kritikatu du ELAk. Guardianek aurkeztutako dokumentazioa aztertu ondoren, ELAk ahal dituen bide guztiak hartuko ditu enplegua bermatzeko. Era berean, sindikatuak dei egiten die erakundeei, eta zehazki Eusko Jaurlaritzari, desindustrializazioa eta lantegiaren itxiera saihesteko neurriak har ditzan.