• Elkarte ekologistak alegazioak aurkeztu ditu berriro El Caleroko urpean gera daitezkeen lurretan kokatutako hirigintza-plan baten aurka

• Planak aurrera jarraitzen duela salatu dute, nahiz eta EAEko Auzitegi Nagusiko Administrazioarekiko Auzien Salan errekurrituta egon

Joan den abenduaren 10ean, Barakaldoko Udalak 2024/10/31ko 9216 Dekretua onartu zela jakinarazi zuen, 04 El Calero eremuko Urbanizatzeko Jarduketa Programari buruzkoa (BAO 2024/11/28). Onarpen hori jendaurrean jarri denez, Ekologistak Martxan-ek alegazio-sorta bat aurkeztu du, 2019an hasierako onarpen-fasean egin zuen bezala: “uste dugu alegazio eta kontsiderazio horiek ez direla kontuan hartu (kasuren batean, ezta erantzun ere) administrazio-prozeduran, eta Urbanizatzeko Jarduketa Plan honi aplika dakizkiokeela; beraz, mantendu egiten ditugu, eta orain berriro diogu“.

Kadagua itsasadarraren ezkerraldean, zati handi batean haren uholde-lautada okupatuta, Uholde Arrisku Handiko Eremuan dago proiektu hau (ARPSI Bilbao-Erandio ES17-BIZ-IBA-01). Izan ere, UAKPk (Uholde Arriskuak Kudeatzeko Planak) berak uste du Kadaguako arroa Bizkaiko gatazkatsuenetako bat dela uholdeei dagokienez. Erakunde ekologistak hirigintza-plan horien arriskua nabarmendu du; izan ere, “duela gutxi Valentzian DANAk (2024ko urria) eragindako hondamendiak eta haren ondorio tragikoek hiri-plangintzako eredu jakin batzuk agerian uzten dituzte, eta administrazioetako arduradunak plan horiek eragin dituzten arrazoiei eta horiek saihesteko ezarri beharreko neurriei buruz hausnartzera behartzen dituzte”.

Klima-aldaketari dagokionez, alegazioen dokumentuak aipatzen du, hainbat dokumentutan aipatzen den arren, “ez direla kontuan hartzen klima-aldaketaren ondorioei buruzko beharrezko prebentzio-, zuzenketa- eta konpentsazio-neurriak“. Hainbat txostenen arabera, uholde-arriskuak areagotu egingo dira klima-aldaketaren ondorioekin, baita aurreikuspenik baikorrenekin eta moderatuenekin ere. CSICek eta AZTIk (2012), adibidez, egindako azterlan baten arabera, “klima-aldaketak hirukoiztu egingo ditu Bizkaiko kostaldean urpean gera daitezkeen eremuak“. Gainera, kontuan izan behar da lehendik dauden betelanak finkatzeak, betelan berriak egiteak eta uholde-mailak gaindituko dituen kota lortzeko defentsek inpaktu handiagoa eragingo dutela uraldi-ibilgu zaharrean, eta murriztu egingo dela Kadagua ibaiak eremu horretan duen hustubide-ahalmena. Aurkeztutako alegazio-dokumentuan, “Lurzorua kutsa dezaketen jarduerak edo instalazioak dituzten edo izan dituzten lurzoruen inbentarioan” jasotako lurzoruak daudela ere aipatzen da, eta horiek deskontaminatu egin beharko liratekeela, zertarako diren alde batera utzita.

Ekologistak Martxan-ek, halaber, Megapark ezarri zenean gertatu zen kasu bera errepikatzeko aukerari buruz ohartarazi dute; izan ere, eremuaren zati bat artifizialki betetako padura-eremua zen, eta hori itsas-lehorreko jabari publikoa da. “Ezin da komenientziara jokatu, araudien interpretazioa bihurrituz, Zuloko – Ibarretako padurak lehortzeko eta Megaparken eraikuntza ezartzeko egin zen bezala, eta, ondoren, Auzitegi Gorenaren epai batek adieraz dezala eraikuntzak ez zuela kostuen legeria betetzen, baina ezin dela aplikatu gauzatutako gertakarien aurrean“.

Ildo horretan, gogoratu behar da JUParen oinarria Barakaldoko Udalaren 2022ko otsailaren 24ko Erabakia dela, Barakaldoko HAPOren MP16 Aldaketa Puntuala behin betiko onartzen duena 04 Calero eremuan. Erabaki hori errekurrituta dago EAEko Auzitegi Nagusiko Administrazioarekiko Auzien Salan. Megaparken kasuan erabiltzen den jarduteko modu berari jarraituz, ekologistek uste dute “ez dela egokia eta bidezkoa hirigintza-garapena izapidetzen jarraitzea, irizpide, proposamen eta zehaztapen berberak errepikatuz, auzitegiei horri buruzko iritzia emateko eta erabaki horren ondorioen zain egoteko aukerarik eman gabe”.

Elkarte ekologistak planteatu duenez, eremu horren hirigintza-etorkizunari buruzko gogoeta- eta eztabaida-prozesu bat ireki beharko litzateke, ibaira artifizialki okupatutako espazioak berreskuratzean eta birnaturalizatzean oinarrituta, eta marearteko padura eta uholde-lautada eta uholdeei eusteko ibarra jatorrizko egoerara itzultzeko aukerarekin. “Ezin dugu bide beretik jarraitu, ezer gertatu ez balitz eta ezer jakingo ez bagenu bezala, urte batzuk geroago zoritxar berberak deitoratzeko“, ohartarazi dute Ekologistak Martxan taldetik.

Alegazioen dokumentua:

http://ekologistakmartxan.org/wp-content/uploads/2024/12/CALERO-2024-12-23-Alegaciones-PAU.docx.pdf