EUROPAREN HONDORATZE DEMOGRAFIKOA. ARDURA POLITIKOA.

1. Mehatxu ekonomiko, politiko eta sozial larriak daude Europan. Horien artean, demografiaren hondoratzea da, zalantzarik gabe, kezkagarriena. Gai hau hainbat ikuspegitatik azter dezakegu, baina horietako bat, agian garrantzitsuena, egoera honen erantzukizun politikoa norena den da. Garrantzitsua da, batez ere, erronka horren etorkizuna bideratzeko abiapuntu gisa.
2. Erantzuna oso erraza izan daiteke. Erantzukizuna Europako klase politiko osoarena da. Berehala ulertuko dugu gertatutakoari perspektiba jakin batekin begiratzen badiogu. Gakoa da arazoa ez dela berria. Ugalkortasun- eta jaiotza-tasak XX. mendeko 70eko hamarkadan hondoratu ziren. 1975. urterako, Europar Batasuneko ugalkortasun-tasa ordezkapen-mailaren azpitik zegoen.
3. Datu horiek berebiziko  garrantzia dute gertatutakoa baloratzeko. Bost hamarkada hauetan, Europan inork ez dio gai horri seriotasunez heldu. Gure kontinentearentzako lehen erronka eta lehen mehatxua izanik, Europako politikariek ez dute horri buruzko neurri esanguratsurik hartu, eta horrez gain, ez dute gai hori Europako erronka nagusitzat edo, gutxienez, heldu beharreko erronka handienetako gisa ere mahai gainean jarri.
4. EKAI Center-en irakurleek badakite erronka horri heltzea ez zela hain konplexua. Ugalkortasun-tasen hondoratzea zuzenean lotuta egon zen emakumearen gehiegizko lan-esplotazioarekin, eta horren inguruan hartu beharreko neurriak ziurrenik lan-denbora murrizteko neurri zorrotzekin lotuta zeuden (segur aski, bai gizonentzat, bai emakumeentzat). Baina, ez horrelako neurririk, ez nolabaiteko garrantzia duen beste inolako neurririk ez da hartu, ezta erronka horri merezi zuen garrantzi estrategikorik eman ere. 
5. Tamalez, Europako klase politikoak gure kontinenteko herritarrei egindako traizio historiko honek azalpen bakarra du. Gure politikariek ez dute lanik egin ez Europarentzat, ez europarrentzat. Gobernuen eta talde politikoen interes korporatiboei men egite lotsagarriak bakarrik azaltzen du jarrera historiko zentzugabe hori.
6. Europaren hondoratze demografikoaren atzean dauden interes korporatiboak aski ezagunak dira. Alde batetik, emakumearen gehiegizko lan-esplotazioa ahalik eta gehien aprobetxatzea, enpresaburu txarren etengabeko obsesioa den eskulan merkearen erabilera masiboa maximizatzeko. Ez dira ahaztu behar, bestalde, Gerra Hotzaz geroztik mendebaldeko eliteetan hedatu ziren antinatalismoa bultzatzeko eta biztanleria murrizteko jatorri kriptonaziko estrategiak.
7. Diagnostikoa argia da. Bere buruari ezkerreko, eskuineko edo zentroko  deituz, klase politiko europarrak hamarkadak daramatza herritarren interesen aurka eta interes korporatiboen zerbitzura jarduten. Hondoratze demografikoa, estrategikoki funtsezkoa dena, Europaren mehatxu estrategiko larrienetako bat baino ez da. Klase politiko hau boteretik kentzeko gai ez bagara, gure etorkizunak ez du ezer onik ekarriko.

Agiri hau EKAI Centerrek landu du GOGOZ egitasmoaren barruan, HURBIL adostasun-metodologiari jarraituz. Eskerrik asko zure interesagatik. Segi gurekin.

PDF: