Gipuzkoa Euskal Herriaren ipar-erdialdean dagoen lurraldea da. Mugakide ditu Bizkaia mendebaldean, Araba hego-mendebaldean, Nafarroa ekialdean, Lapurdi ipar-ekialdean eta Bizkaiko golkoa iparraldean. Hedaduraz 1.909 km² ditu, eta 92 km-ko itsasertzak hondartza bila dabiltzan milaka bisitariren helburu egiten du urtero. 2008ko erroldan, 709.363 biztanle zituen Gipuzkoak, eta horien laurdena hiriburuan bizi dira: Donostian.

Gipuzkoa izena lehenekoz 1014. urteko dokumentu nafar batean ageri da non Donostia aldeko lur batzuen donazioa aipatzen den. Bada fidagarritasun handiagoa duen 1025 urteko beste dokumentu bat ere. Orohar beraz esan liteke gaur egun lurralde honek darman izena bigarren milurtekoaren hasierarekin batera zabaldu eta erabiltzen hasi zela.

Gipuzkoan mintzatzen den euskara hiru euskalkitan sailkatzen da: Gipuzkera (nagusiena), Bizkaiera (mendebaldean) eta Nafarrera (ipar-ekialdean).

Bisitariak aukera ezberdinak ditu herrialde hau gozatzeko. Hiriburua bera, kostaldeko herriak, edo barnealdeko Gipuzkoa berdea. Denak ere, aukera ederrak.

Kultura aldetik ere, museo ugari daude herrialdean, batzuk aipatzearren, Donostiako San Telmo Museoa edo Eureka! Zientzia Museoa, Photomuseum-Argazki eta Zinema Museoa Zarautzen,Txontxongiloaren Museoa / TOPIC Tolosan, Cristóbal Balenciaga Museoa Getarian, Idiazabal Gazta interpretatzeko eta dastatzeko Zentroa, Euskal Burdinaren Museoa Legazpin, Barandiaran Museoa Ataunen, Armagintzaren Museoa Eibarren, Sagardoetxea, Euskal Sagardoaren Museoa Astigarragan.

Iturria: Euskarazko Wikipedia