Irala auzoko (Bilbo) 33 urteko bizilaguna den Ikerri egin dio elkarrizketa El Correok Basurtoko Ospitalean zegoela. Errekaldeko Etxarri II gaztetxearen hustuketan gertatutakoa kontatu du, eta Ertzaintzaren jarrera oldarkorra salatu.

Ikerrek adierazi du Ertzaintzaren oldarraldietako batean jaurtigai baten talka jaso zuela: "Bizilagun gehiagoren ondoan nengoen, besteak beste, adineko pertsonen ondoan, babes-seinale gisa, modu baketsuan eta istiluetan parte hartu gabe, ertzain batek zuzenean apuntatu ninduenean". "Ondo-ondoan bizi naiz –jarraitzen du–. Egia da gaztetxera joaten ziren gazteak ezagutzen ditudala, baina ni lagun baten amaren ondoan nengoen, besterik gabe, tiroka hasi zirenean".

"Berariaz" egin zuela dio Ikerrek: "Niri aurrez aurre begira zegoela egin zidan tiro, 30 metro baino gutxiagora, txarrera eta arrautzetara apuntatzen, baina ez dakit nor den, ezinezkoa izango da jakitea", deitoratu du. Jaurtigaiaren talka jaso zuen momentua ere kontatu du: "Belauniko erori nintzen lurrera eta pixka bat ibili ahal izan nuen bertatik urruntzeko, ezer ez egiteagatik ere atxilotuko nindutelako beldurrez". Jakinarazi du lagun batek etxera lagundu ziola eta bertan "ibuprofeno" bat hartu eta izotza jarri zuela. Baina egoerak txarrera egin zuela esan du: "Gero eta gehiago puztu zen eta goizaldeko hiruretan oinazeekin gehiago ezin izan nuenez, larrialdietara etorri behar izan nuen".

Larrialdietara heldu eta lau ordutara egin zioten ebakuntza: "Barrabil bat kendu didate. Bestea salbatzea espero dut", aitortu du etsipenez. Ospitaletik irteten uzten diotenean –alta noiz emango dioten ez daki eta– Ertzaintzan salaketa jarriko duela jakinarazi du, eta seguru agertu da: "Ez dakit zer egin behar dudan, baina komisariara joango naiz". Hala ere, itxaropenik gabe zera salatu du: "Okerrena da ez duela ezertarako balioko, agentea salatu behar delako eta haien artean ezkutatuko delako".

Ostiralean Etxarri II gaztetxea hustu zuten

Errekalden, Bilboko Kukutza III gaztetxea zegoen auzoan, proiektu urbanistiko berri bat egitea aurreikusten da. Amenabar enpresa eraikitzaileak eta Bilboko Udalak onartutako proiektuaren ondorioz, gaztetxearen hustuketa agindu zuten apirilaren 4rako. Hori salatzeko, gaztetxeko asanbladako hainbat kidek Bilboko Osoko bilkura eten zuten, eta elkartasunean 55 kolektibotik gora batu zaizkie.

Hustuketa ostiralerako iragarria bazegoen ere, Ertzaintzak ostegun arratsaldean abiatu zuen operazioa. Gaztetxea defendatzen zegoen gazte taldea 10:00ak aldera kanporatu zuten eta barruan egondako kideak identifikatu zituzten. Elkartasunean manifestazioa egin zuten eta gaztetxera hurbiltzean oldartu zen Ertzaintza. Ondoren barrikadak altxatu zituzten manifestariek.

ARGIAko Xabier Letonak hala jaso zituen zaurituen eta atxilotuen zifrak: "Sare Antifaxistak jakinarazi duenez, ertzaintzak sei lagun zauritu zituen. Gedar atariak zehaztu duenez, horietako bati urgentziaz ebaketa egin behar izan diote. Agerkariak dioenez, bost atxilotu ere izan ziren eta horietako lau askatu dituzte jada. Ertzaintzaren esanetan, halaber, lau ertzain ere zauritu zituzten istiluetan".