Ultimamente estamos a ver as consecuencias da guerra no mundo, sobre todo en Siria, pero tamén en Europa, onde miles de refuxiados están a chegar. Doutra banda, aí están os sanguentos atentados perpetrados en Francia e Bélxica nos últimos anos. Estes atentados en Europa teñen un gran impacto mediático, porque nos afectan máis de cerca aos cidadáns europeos. Moito menos tócannos os refuxiados que chegan ás nosas fronteiras, aínda que xa son catro millóns os que foxen da guerra de Siria. Nin que dicir dos 250.000 mortos polo longo conflito sirio que están tan lonxe na distancia e que non nos mostran as televisións.

O propio papa denunciou que detrás dos atentados perpetrados no aeroporto e no metro de Bruxelas hai armas traficantes: “Queren sangue e non paz, guerra e non fraternidad”. Faltáballe dicir que detrás da guerra de Siria eses traficantes de armas están a facer negocio para eles, como detrás de todas as guerras nas que EE. UU., Rusia e Europa están implicados.

O gasto militar mundial en 2014 situouse en case dous billóns de dólares, o que representa o 2,4% do Produto Interior Bruto mundial (PIB). A media de gasto en armas por persoa e ano é de 248 euros. Oito do dez maiores empresas de armamento do mundo atópanse en Estados Unidos. Cada ano prodúcense uns beneficios de 23.000 millóns de dólares. O Estado español exportou en 2014 armas por valor de 3.200 millóns de dólares, o que supuxo un incremento do 4,1%. A maior parte desa produción de armas vai parar a Iraq, Afganistán, Siria, Libia e Iemen, así como a países como Israel e Arabia Saudita, entre outros. Por tanto, non o esquezamos: O actual conflito de Siria é tamén un gran negocio para o capital, xa que detrás hai unha industria armeira.