A Corporación Mondragón non descartou novos acordos estratéxicos e apostou pola adaptación da dimensión dos negocios ao mercado global e polo achegamento aos mercados emerxentes. Así mesmo, mostrouse disposta a reorientar as actividades con menor potencial de crecemento e apostou decididamente polos proxectos integrais corporativos. Todos estes cambios ou adaptacións serán necesarios para alcanzar o obxectivo principal do congreso: adaptar as estruturas das empresas que a compoñen para crear emprego con valor engadido.

Estas directrices forman parte das decisións tomadas no congreso anual da Corporación Mondragón o pasado mes de setembro. No congreso do ano participaron 650 representantes de todas as cooperativas do grupo. O obxectivo deste tipo de congresos é definir as normas e criterios xerais que deben guiar á corporación. É dicir, definir políticas básicas sobre temas fundamentais de interese común.

A Corporación Mondragón é o grupo empresarial e cooperativo máis importante do País Vasco. Está formado polo Grupo Industrial, a área Financeira (Caixa Laboral e Lagun Aro) e o Grupo de Distribución (Eroski). Ao peche do exercicio 2010, o activo da corporación vasca ascendía a 33.099 millóns de euros, cuns rendementos consolidados de 178 millóns de euros e un persoal global de 83.859 traballadores, a maioría membros da cooperativa.

Política social e empresarial 2013-2016

O congreso da Corporación Mondragón deste ano aprobou por unanimidade un documento clave para o futuro da Corporación: Política social e empresarial 2013-2016. O documento define a concepción e os retos da corporación, así como as liñas básicas de actuación da empresa. Por suposto, o documento foi debatido previamente polos socios cooperativistas e posteriormente foi aprobado polos representantes dos 650 asistentes ao congreso.

Este documento establece un punto de partida para poder elaborar posteriormente os plans estratéxicos das cooperativas. E puxo encima da mesa un reto: “adecuar a nosa estrutura empresarial” para xerar emprego de valor engadido. En definitiva, e tal e como sinalaron os responsables da Corporación Mondragón, os obxectivos dos próximos anos son mellorar a competitividade dos negocios, reforzar o compromiso e o espírito cooperativo das persoas, ser un grupo empresarial con negocios rendibles e sostibles no camiño da creación de emprego de valor engadido.

Liñas básicas de actuación

Na procura deste obxectivo, o congreso marcou catro liñas de actuación ou estratexias, segundo as mesmas fontes. A primeira, dimensionar e internacionalizar para atopar unha medida axeitada e competitiva nun mercado global. En segundo lugar, a innovación, xunto coa promoción e o coñecemento, debe permitir a innovación permanente nos modelos de negocio e o fomento das actividades nos sectores con futuro. A terceira, a intercooperación, a colaboración entre cooperativas e con aliados externos, para mellorar as oportunidades de mercado e ofrecer solucións integrais e servizos de valor engadido. Por último, a cuarta liña de traballo é a de potenciar o compromiso e a identidade cooperativa, potenciando as características cooperativas e expresándoas mediante actitudes que se adecuen aos valores, principios e modelo de xestión da corporación.

Modificacións e adaptacións

Este reto vai requirir cambios e adaptacións na política empresarial do grupo, tal e como decidiron os cooperativistas. Así, pretenden adaptar a dimensión dos seus negocios ao mercado global e acudir a mercados emerxentes, mercados nos que xa comezaron a traballar desde hai anos. Así mesmo, oriéntase á elaboración de novos posibles pactos estratéxicos e á reorientación das actividades con menor potencial de crecemento. Por último, apostaron claramente polo proxecto integral corporativo.

A partir de agora, coa aprobación desa política que serve para definir a estratexia, o plan de xestión de 2012 deberá centrarse nesas claves. Ademais, o próximo ano as cooperativas terán que reflexionar para definir os seus plans estratéxicos e elaborar os correspondentes plans de xestión para o período 2013-2016.