Ante o aumento dos prezos da electricidade como consecuencia da crise enerxética, Iberdrola, a compañía eléctrica multinacional con sede social en Bilbao, gañou xa este ano 3.014 millóns de euros, un 29% máis que o ano pasado, e diversos medios de comunicación explicaron que para finais de ano os beneficios poden superar os 4.200 millóns de euros, en consonancia co previsto pola compañía.

Iberdrola recuperou así o seu record e os seus beneficios van superar os 3.565 millóns do orzamento de Osakidetza para o próximo ano. Ademais, a compañía que dirixe Ignacio Sánchez Galán repartirá 890 millóns de euros en dividendos aos seus accionistas, un 56% máis que o ano anterior. Os principais accionistas de Iberdrola son unha serie de fondos de investimento como: Qatar Holding, BlackRock ou Norges Bank.

Esta previsión de beneficios inclúe o imposto que o Goberno de España destina ao sector enerxético. De feito, no Estado español o crecemento dos beneficios non foi tan elevado como en xeral e reduciuse nun 14% –por unha resolución xudicial, entre outros–. Neste sentido, Galán advirte que van acudir aos tribunais para retirar este imposto, para que os beneficios que van recadar sexan aínda maiores.

Por suposto, Iberdrola ten negocios en todo o mundo e este ano destinou case 7.600 millóns de euros a proxectos, sobre todo "renovables". A produción de centrais fotovoltaicas e eólicas propiedade de Iberdrola aumentou un 13% en 2022.