Korrika jendetsua ekitaldi jendetsuarekin amaituko da Donostian. Tipi-tapa dabiltza azken kilometroak egiten:

Korrika amaierara iristen ari da: gaur Lapurdin ibiliko da, eta bihar eguerdian Donostian irakurriko dute mezu ezkutua. Pasa den gaua berezia izan da Nafarroan, Leitzaldea, Malerreka eta Bortzirietan.

Azken txanpan sartu da Korrika, eta jada 2250 kilometro egin dituzte korrika milaka euskaltzalek. Lapurdin pasako du larunbata, eta arratsaldeko 17:30 aldera Baionara ailegatuko da. Azken hiruburua izango da, igandean Donostiara heldu arte.

Gauez Gipuzkoara sartu da Korrika, azken txanpan da, ez, ordea, euskararen bidea. Ekinean jarraitu beharra baitago.

Lasarte-Orian hartu du lekukoa ARGIAko lantaldeak, Antza eta Iametzako lagunekin batera. Euskarazko kazetaritza egiten segiko dugulako, gaur eta beti, hitzekin.

Bizkaiko kostan dabiltza euskaltzaleak gaur, osteguna. Astebete da Euskal Herriko hamaika txokotan milaka herritar korrika ari direla euskararen alde.

Ikusi gaurko ibilbidea:

Asteartetik asteazkenerako igaroan, gauerdian, Nafarroatik Arabara salto egin du Korrikak, Acedo atzean utzi eta Kanpezun sartzerekin batera. Gauez Arabako Mendialdean eta Trebiñun barna ibili da, eta eguerdi aldera berriz Bizkaira sartzekoa da. Iluntze alderako espero da Bilbotik igarotzea, eta Ezkerralderantz bidea hartuko du ostean.

Nafarroako D ereduko ikastetxeetako hainbat gela alternatibok –aniztasun funtzionaleko ikasleekin aritzen direnak– Korrikako lekukoa hartuko du astearte arratsalde honetan, gizarteko eta eskoletako aniztasuna aldarri. “Begirada aldatzean dago gakoa, askotan gu geu izaten baikara mugarik ez dagoen tokian mugak jartzen dituztenak". Irakurri albiste osoa lotura honetan.

Eskuz esku, herriz herri, eta batez ere, aldarrikapenez beteta, Korrikak ibilbide erdia egingo du gaur arratsaldean. Sakanan egingo dute horren ospakizuna, eta kilometro berezia izango da. Amurriotik Donostiara bidean, ikusi gaurko ibilbidea:

Bi hiruburutatik igaro da Korrika astelehenean: Donibane Garazi eta Maule. Ipar Euskal Herrian euskaltzaletasuna bizi-bizi dagoela erakutsi zuten, eta hainbat eragilek txandakatu zuten lekukoa. Zuberoako hirian gazteek izan zuten protagonismoa. Gaua izozpean igarota, asteartean Nafarroan dabil berriz.

Hemen AEK-k asteleheneko irudiekin osatutako bideoa:

AEK-ko ordezkariek euskara ikasteko doakotasuna aldarrikatu dute, ezagutza unibertsala izan dadin; “denon eskubidea delako”. Donibane Garazin egin dute adierazpena, Korrikaren iritsieran, eta Euskal Herriko administrazio nagusiei eskatu diete politikak ezar ditzaten euskara denon eskura jartzeko; dei berezia egin diete Ipar Euskal Herriko instituzio publikoei.

Irakurri hemen albistea osoa.

Berandu baina garaiz, ailegatu da Zangozaldera Korrika. Tuteran jendetza bildu da, eta jarraian Erriberako errepide luzeetara kuadrilla ugari etorri dira; tipi-tapa jarraitu dute egun osoan. Zarrakaztelun ezinegonez itxaron diote, erraldoi eta guzti, eta eguzkia sartzen ari zela harrera beroa egin diote Korrikari. Gau hotza Piriniotan igarotzeko behar zuen bultzada izan da. Bihar Ipar Euskal Herrian sartuko da: Nafarroa Behereko eta Zuberoako euskaltzaleak ere ekinean arituko dira.

4. eguna du euskararen aldeko ekimenak. Ikusi zein ibilbide egingo duen igande honetan, Nafarroan:

HitzEkin da Korrikaren aurtengo leloa. Ez baita nahikoa euskararen alde egotea, ekin egin behar baitzaio, hitzekin, eta euskaraz. Halaxe egin zuten 90eko hamarkadan EHUko Arte Ederretako ikasleek, eta euskaraz ikasteko eskubidea aldarrikatzeko hiru hilabeteko greba eta itxialdia egin zuten Leioako fakultatean.

Sona handia izan zuen, beraz, batzuei ezagun egingo zaie. Beste batzuei pentsaezina egingo zaie unibertsitatean hiru hilabetez okupatzea, euskarazko ikasketak berma daitezen eskatzeko. Haiei esker, besteak beste, azkartu zen unibertsitatea euskalduntzeko bidea. Jarraitu beharra dago, ordea.

Unai Etxeberria eta Joseba Parron garai hartako ikasleek bertatik bertara bizitakoa ezagutzeko, irakurri ondoko erreportajea: Bost irakasle euskaldun eskatzetik, unibertsitatea hankaz gora jartzera.

Korrikak irauten duen bitartean era batera edo bestera hitzetik ekintzara pasatu diren hainbat lekuko ekarriko ditugu hona. HitzEkin!

Iruñerria aldarrikapen koloretsuz bete da larunbat goizean. Hiriek erakusten dute herri txikiagoetan hainbeste nabarmentzen ez den ezaugarri bat: aniztasuna. Eragile eta talde desberdinetako euskaltzaleak batzen ditu Korrikak eremu txiki batean, denok euskaragatik korrika, bakoitza bere toki eta esperientzietatik.

Euskararen normalizazioagatik herri bat elkarrekin borrokan ikusteak edonor hunkitzen du, eta halaxe gertatu da gaurkoan ere. Kontrakotasunak ere pizten ditu, ezinbestean. Gaur bildutakoek, esaterako, Enrique Maya Iruñeko alkateari igorri diote mezua: "Maya, entzun, Iruñea euskaldun". Nafarroako Gobernuaren kilometroan ere pankartatik oihu horiek entzun dira.

HitzEkin leloak dioen gisan, furgonetatik ere parte hartzaile guztiak animatu dituzte gaurko aldarriak praktikara eramatera, Nafarroa euskalduna euskaraz izan dadin.

Etxean daudenak gozatzen ariko dira Korrikako irudiekin, dena zuri-zuri dago eta Nafarroan, Korrikaren bidean. Gauez komeriak izan dituzte Korrikako furgonetek aurrera egiteko, baina herritarren bultzadarekin badoaz aurrera. Oztopoak oztopo, ekinean, euskaltzaleek ohi duten gisan. Iruñerrian doa jende taldea, elurrez blai, baina, etxekoak bezala, haiek ere gozatzen. Iruñeko Alde Zaharrera eguerdian iristea aurreikusten da, ea lortzen duen jendearen indarraz.

Iruindar guztiak adi daude, elurretako arropak prest.

Arratsaldean hiriburuan sartu den momentutik nabaritu da Korrikak une bereziak utziko zituela. 76 kilometro egin ditu Gasteizen, eta denetariko aurpegi eta mezuek hartu dute protagonismoa kaleetan. Eragileek zein instituzioek eraman dituzte lekukoak.

Pandemiaz geroztik gutxitan bildu da horrelako jendetza, oraingoan euskararen normalizazioa helburu. Batzuk euskararen alde, besteak euskaraz. Gasteiz euskalduntzeko bidean.

Elurrak ia estali du hiria, eta Korrika badoa Arabako Lautadarantz, eta Nafarroara igaroko da gauerdia pasata. Ikusi AEK-k ateratako argazki ikusgarriak hemen.

Zazpi hiriburuetatik lehenera iritsi gara jadanik. Bidean elurrak bustita, baina Gasteizen festa eta aldarrikapen giroa da nagusi. Iluntzera arte hemen ibiliko da euskararen aldeko ekimen erraldoia. Arratsalde mugitua hirian, hainbat ekintza tarteko:

Negu giro betean pasa du goiza Korrikak. Eskoletako haur eta gazteek toki berezia izan dute herri nagusietan: Ermua, Eibar, Elgoibar, Bergara, Arrasate... Ikasle zein irakasle, hezkuntza euskaldunaren alde.

Kazkabarra eta euria nagusitu dira, baina euskaltzaleei eta lekuko eramaleei ez diete ilusiorik kendu. Gainera, lehen mendi elurtuak ikusi ditugu Gipuzkoa aldean.

Badoa Korrika lehen hiribururantz: Gasteizeko kaleak beteko dituzte laister milaka herritarrek.

 Ondorengo herrietatik igaro da ostegunetik ostiralerako gauean: Balmaseda, Zalla, Gueñes, Gordexola, Okondo, Laudio, Ugao, Arrigorriaga, Basauri, Etxebarri, Galdakao, Zornotza, Iurreta, Durango, Abadiño eta Elorrio.

Hemen dituzue AEK-k ateratako argazki batzuk:

Hainbeste itxarondako eguna iritsi da: euskarari inoiz baino gehiago ekitekoa, HitzEkin. Etxean bai, baina batez ere kalean. Hala erakusten ari dira lekukoaren atzetik korrika dabiltzan herritar euskalzale guztiak. Euripean hasi da 22. edizioa, eta aldapa ugari izan dituzte bidean... baina heldu eta haur, emozioz beteta izan dira.

Amurriotik abiatu, Burgoseko lurretatik pasatu, eta Bizkaiko Enkarterrietan dabil orain. Iluntzean Aiaraldeara egingo du atzera, eta gaua Hego Uriben eta Durangaldean igaroko du Korrikak. 2.000 kilometro baino gehiago dituzte aurretik!

Amurrioko lehen kilometroak aldarrikapenez beteta egon dira. Atera da herritik Korrika, eta Enkarterrietara bidean doaz tipi-tapa. Datozen lekuko eramaleak zain daude euren kilometroetan, urduri. Menagarain daude Kuskumendi taldekoak.

Lehen lau kilometroetan ondorengo eragileek eraman dute lekukoa:

• Amurrioko AEKko irakasleak.
• SOS Aiaraldea / Tubacex / Aceralavako euskaltzaleak
• Amurrioko Gazte Mugimenduko eragileak
• Amurrioko Hezkuntza Publikoaren Sarea

Ikus hasiera eta lehen kilometroan lekukoa eraman duten Amurrioko AEKko irakasleen emozioa.

Hasi da Korrika! Jendetza bildu da bide ertzetan euripean eta lekukoa daramate txandan txandan herritarrek. Lehertu da ekitaldia.

"Bi urte zain pasa eta gero, gora euskara eta gora Korrika", halaxe hasi dute Aiaraldean, Amurrion, Korrikaren hasierako ekitaldia, oholtzan diren aurkezleek. Musika eta bestelako ekitaldiak izango dira Korrika hasi aurretik, NEOMAK taldearen musikarekin egingo du eztanda arratsaldeak..

Korrikaren antolatzaileak zuzenean ari dira ematen telebistaz, ekitaldiaren jarraipena:

Berrogei urteotako Korrikako edizio ugariren argazkiak bildu ditugu hemen. 1980an Oñatin hasi zen euskararen aldeko ekimena, eta 2019an Gasteizen amaitu zen azken Korrika. Tarte horretan, irudi anitz eta bereziak utzi ditu bidean, jendetsuak batzuk, hunkigarriak besteak. ARGIAren argazki artxibon gordeta genituen altxorrak dira.

40 urte igaro dira AEK-k lehenengo Korrika antolatu zuenetik. Lekukoak egindako ibilbideen, leloen, abestien eta omendutako pertsonen errepasoa egin dugu artikulu honetan.

Korrikari ekiteko prest gaude Amurrion. Hotzari aurre egiteko beroketak egiten ari da  lantaldea ARGIAko lantaldea.