Sindikatu abertzaleek eta mugimendu sozial ugarik jadanik erabaki dute Hego Euskal Herriko ekonomia eta enplegua hondoratzen ari diren politika ekonomiko kapitalisten kontrako greba orokorraren data: maiatzaren 30a. Ohikoa den legez, bai patronalak baita Gasteizko eta Iruñeko administrazioek ere, greba orokorra arbuiatu dute. Euren hedabideek diote ez dela “momentua grebarako” eta ez dutela “ezer onik ekartzen”, “gizartearen kontra” doala alegia. Urkulluren Gobernuko Enplegu eta Gizarte Politiken sailburuak, Juan Mari Aburtok, galdegin du ea “greba orokorraren hurrengo egunean zer. Zerbait konpondu dugu?”.
Patronalari eta EAJ, PP eta beste hainbat alderdiri hauxe galdetu beharko litzaieke: orain bizi dugunarekin ez bada momentua greba orokorrerako, zein da zuentzat momentu egokia? Ez gaitezen inozoak izan. Patronalarentzat, EAJrentzat, PPrentzat eta beste alderdi batzuentzat, kapitalismoaren kudeatzaile diren aldetik, deialdi bat dagoen bakoitzean “orain ez da momentua” dioten arren, haientzat inoiz ez da momentua!
Greba orokorrerako momentu egoki hori erabaki behar dutenak, aldiz, sindikatuak eta mugimendu sozialak dira. Eta egin dute. Ondo legoke beste sindikatu batzuk, CCOOk eta UGTk kasu, behin informazioa jasota, grebarekin bat egingo balute, ahalik eta zabalena izan dadin. Greba eginik, gerta liteke epe motzerako ondorioak izatea, baina baita luzera begirakoak ere. Zenbat eta greba zabalagoa eta batuagoa, orduan eta emaitza hobeak lortuko dira. Edozein modutan, greba inoiz ez da porrota. Kapitalismoak eta bere kudeatzaileek kontra egiten badiote, herri sektoreek eta langileriak duintasuna mantenduko dute sikiera. Ez dira basapizti kapitalistaren aurrean belaunikatuko. Hurrengo egunean, grina gehiagoz borrokatuko dute!