I
Ume ginela dena zen berri,
dena jolas, dena sormen,
asmakizunak jartzen pasatzen
genuen hamaika oren.
Jolas gaitezen neurtzeko gure
gogoa nola dagoen:
nik pistak eman ta zuek sorta
hau irakurri ondoren,
ea igartzen duzuen gure
lagun ezkutua nor den.

IV
Martuteneko presondegitik
ihesean aterata,
patrikan ditu “Inon ere ez”
eta “Edonon”go mapa.
Zer esana ta hitza baditu
nahiz eta ahotsa falta,
baina idaztea ere presente
egoteko era da ta,
“mende oso bat iraganen du
gure alboan koblaka”.

II
Polemikari estu loturik
ditu izen-abizenak,
aberriarri eskaintzearren
bere urterik onenak.
Gero espetxera eraman zuen
hogei urteko kondenak,
baina ez dira argigarriak
honaino esandako denak,
euskal herritar asko baitira
hortik pasatu direnak.

V
Marinel zaharren laguna eta
Ainhoaren zaindaria,
tira ta tira behelainora
eraman zuen haria
aurkitu zuen baina izan zen
Jaurlaritzak ebagia
eta azkenean ridikulua
hain izan zen nabaria,
epaile batek aitortu behar
epaimahai baten saria.

III
Kartzeleroak errekontua
egiten ari zirela,
preso bi falta zirela eta
sortu zen nahaste itzela.
Bafle batean ezkutaturik
agurtu zuen kartzela,
geroztik dabil han eta hemen
ifar haizea bezela;
ez da ikusten baina guztiok
dakigu hor dabilela.

VI
Esandakoak esanda nor den
argi ez ote dago ba?
Beste euskaldun asko bezala
joan zen etxetik kanpora,
horrexegatik ekarri gura
izan dut Sarri gogora.
Berak bezala alde egin zuten
txori guztiak gerora
bueltan etortzen diren eguna
“kolosala izango da”.