“Jarraipena, trantsizioa eta internazionalizazioa” dira proiektu berriaren ardatzak, Alonsok bere webgunean sareratutako komunikatuan dioenez: “Talde berriak errespetatu egingo ditu 2014 eta 2015erako Euskaltel-Euskadirekin akordioak loturik zeuzkaten txirrindularien kontratuak. Jarraipena ematea desio dugu, eta apurka-apurka handitzen joatea, tropeleko gizonik onenak fitxatuz, nazioarteko proiektu bateranzko trantsizio moderatua eginez. Epe ertain-luzerako helburua da mundu mailan erreferente izango den taldea osatzea”.

Alegia, 2015era arte bederen, Euskaltel-Euskadiren egiturak nolabaiteko jarraipena izango du, taldeari izen berria jarri eta egoitza nagusia Asturiasen izango duen arren. Igor Gonzalez de Galdeanok jarraituko du kirol zuzendari moduan, Samuel Sanchez izango da taldeko liderra –ezustean Alberto Contador fitxatzen ez badute, zurrumurru batzuek dioten moduan– eta aurten laranjaz jantzita ikusi ditugun beste hainbat ziklista ere Alonsok bultzatutako proiektuan izango dira, baita gainerako profesionalak ere: masajistak, mekanikariak… Epe motzera begiratuta, beraz, euskal txirrindularientzat albiste ona da, bai behintzat Euskaltelekin kontratua indarrean daukaten profesionalentzat.

Datorren urterako hamalau ziklistak daukate kontratua indarrean, Mikel Nievek, Igor Antonek, Gorka Izagirrek eta Mikel Landak tartean. Zenbaitzuk lortuak zituzten datorren denboraldirako aurre-akordioak beste ekipo batzuekin, eta ikusteke dago Fernando Alonsok babestutako proiektuan jarraituko duten ala ez. Anton baikor agertu da: “Hamalauok talde berri horretan egongo garela uste dut”.

2015etik aurrerako panorama, ordea, ilunago ageri da, “jarraipenaren” ondoren baitatoz “trantsizioa” lehenik eta “internazionalizazioa” ondoren. “Epe ertain-luzera-begira beste eredu batean oinarritutako taldea osatu nahi dute”, onartu du Gonzalez de Galdeanok berak. Ezinbestean, jada metamorfosi fasean murgilduta zegoen egitura –eta filosofia– errotik aldatzea eragingo du horrek.

Alonsoren esku-hartzeak ez du Euskaltel-Euskadiren proiektua salbatuko, ez behintzat ia gaur arte ulertu dugun moduan, nahiz eta txirrindularitzari, oho har, mesede egingo dion, Fernando Alonso “markak” merkatuan zor dezakeen interesagatik.

Filosofia baten amaiera

Bi hamarkada betetzera zioanean desagertu da Euskaltel-Euskadi. Instituzioek laguntzak kendu ostean –krisia aitzaki–, ez dute bigarren babesle pribaturik aurkitzerik izan.

Euskaltelek urtero 3,5 milioi euroko ekarpena egiten zion txirrindulari taldeari. Aurtengo denboraldian, Eusko Jaurlaritzak eta Bizkaiko eta Gipuzkoako diputazioek laguntzak kendu ostean, telekomunikazio konpainiak 7 milioi euroko ekarpena egin behar izan du. “Proiektua ez zen bideragarria”, adierazi dute taldeko arduradunek.

Lau urterako plana sei hilabetean agortu da

“Taldearen kudeaketa ez da ona izan”, adierazi du Roberto Laisekak, 1994tik 2006ra bitartean Euskaltel-Euskadi taldean aritu zen ziklistak.

Euskaltelek txirrindulari atzerritarrak fitxatu ditu aurten, lau urterako UCI World Tour (UWT) lizentzia eskuratu ahal izateko. Laburrean azaltzeko: UWT mailan lehiatu ahal izateko, txirrindulariek lortutako emaitzen araberako gutxieneko puntu kopurua izan behar dute taldeek, eta puntu horiek atzerriko txirrindulariei esker lortu ditu Euskadik, fitxaketa berriek emaitza penagarria eman duten arren: Tarik Chaoufi marokoarrari kontratua eten diote egokitzapen faltagatik, Aleksandr Serebriakov errusiarrak positibo eman zuen EPOrekin, André Schulze alemaniarrak lasterketa bakarra amaitu du…

Aldiz, nahikoa punturik ez zuelako taldetik bota zuten Amets Txurruka oso txukun dabil Caja Rural taldean, eta horrek are lotsagarriago utzi ditu Euskaltel Euskadiko arduradunak –Ivan Velasco ere arrazoi beragatik kanporatu zuten–. Filosofia aldaketak ez dio batere mesederik egin taldeari. Han aritutako hainbat txirrindularik zuzendarien jarrera gogor kritikatu zuten, eta errepideak laranja kolorez zipriztindu dituzten zaleak geroz eta urrunago ditu. Gertatutakoaren pisu guztia egungo zuzendaritzaren bizkar gainean uztea, dena den, arinegi jokatzea litzateke agian.

Harrigarriena zera da: Taldeak lau urterako apustu sendoa egin zuela, eta proiektua sei hilabetean amaitu dela. “Taldeko arduradunek bazekiten instituzioek euren ekarpena kenduko zutela eta hala ere filosofia aldaketa eman zen”, kritikatu du Laisekak.

Biciciclismo webgunean aurkitu dugu azalpen gehiago: “2012an, guztia arrosa kolorekoa zenean, Euskaltelek taldearen kudeaketa Basque Cycling Pro Team sozietatearekin hartu –Miguel Madariaga buru duen Euskadi Fundazioaren lekuan– eta lau urterako proiektu estrategikoa aurkeztu zutenean, 36 milioi euroko aurrekontuaz hitz egin zen. Aldiz, pasa den martxorako jakina zen arrazoi ekonomikoak medio taldearen jarraipena arriskuan zegoela. Inork ez du egoera hau ulertzen, ezta Igor Gonzalez de Galdeano managerrak ere”.

Ez da zalantzarik Euskaltel-Euskadik hutsune handia lagako duela, bai tropelean, baita errepide bazterrean ere. Afizionatu mailako txirrindularitzak ez ditu garai gozoak bizi. Lasterketa ugari desagertu da eta beste zenbait arriskuan daude. Euskal Herriko ziklista gazteek aukera gutxiago izango dute orain goi mailara salto egiteko. Fernando Alonsok babestutako egitasmoaren inguruko galdera ugari daude oraindik erantzuteke. Espainiako Itzulia amaitzean ezagutuko dugu gauza gehiago.