Urkullu lehendakariak EAEn enplegua sustatzeko plana aurkeztu du eta konpromisoa hartu du 44.000 lanpostu sortzeko 2016ra artean, horietatik 12.711 aurten. Egungo langabezia tasa, biztanleria aktiboaren %15,93koa da, eta 2013an krisiak 19.000 utziko ditu lanik gabe. Urkulluk onartu du plan hau ez dela “sendagarria”, enplegu eza “arintzeko” baino ez duela balioko. Plana aurrera ateratzeko 281 milioi euro bideratuko dituzte 2013an diru-kutxa publikoetatik eta beste 733 milioi euro eremu pribatutik. Hori guztia, dena den, EAEko aurrekontuen onarpenaren baitan dago. Aurrekontuok, hain zuzen, otzantasun handia erakutsi dute Madrilekiko eta Bruselarekiko.

Lehenik, langabeziaren aurkako plan estrategikoa izanik, harrigarria da eragile sozial, patronal, sindikatu, diputazio eta alderdi politikoekin landu gabe iragarri izana. Are harrigarriagoa da aurrekontuen onarpenaren menpeko plana izatea. Arrazoia dute uste dutenek plan honek marketin operazioa dirudiela, Gasteizko exekutiboak benetako egitasmo zehatzik ez duelako. Aurrera ateratzen ez bada, EAJk jada eskopeta prestaturik dauka ustezko arduradunei tiro egiteko: oposizioan dauden politikari eta sindikatuak.

Bigarrenik, bai EAJk baita bere Gobernuak ere, badakite langabezia EAEn estrukturala dela eta tapaki aringarriek ez dutela ezertarako balioko. Plan estrategikoa behar da, baliabide ekonomiko handiagoak eta bestelako neurriak eskainiko dituen plana, lanaren banaketa kasu. EAJk AHT gisako obra faraonikoak babesten ditu, 4.200 milioi euro kostako direnak; eta jeltzaleak prest dira finantzaketa aurreratzeko. Garbi dago Urkullurentzat eta bere alderdiarentzat AHTk lehentasuna duela langabeziaren aurrean. Langabeziaren aurka, marketin operazioak!