Donostiako Musika Hamabostaldia
Euskadiko Orkestra: Zuzendaria: J. Rohrer.
Donostiako Orfeoia: Zuzendaria: J.A. Sáinz Alfaro.
Bakarlariak: C. Reiss, V. Karkacheva, M. Schmitt, H. Müller-Brachmann.
Egitaraua: Beethovenen Missa Solemnis re maiorrean, op. 123.
Lekua: Kursaal Auditorioa.
Data: Abuztuaren 23a.
----------------------------------------------------------------
Edizio bakoitzean bezala, aurten ere Euskadiko Orkestraren emanaldia izan dugu Musika Hamabostaldian. Oraingo honetan Donostiako Orfeoiarekin batera. Eta lan korapilatsu bat interpretatzeko, erronka handia: Beethovenen Missa Solemnis re maiorrean op. 123, hain zuzen ere. Monumentu sinfoniko bat da, bere modura fededun izan zen iraultzaile batek sortutakoa.
Meza hau osatzen duten bost atal handiek adierazkortasun indartsu eta grinatsua dute, zeinak obra hau benetako erronka bihurtzen duen edozein orkestra eta edozein zuzendarirentzat.
Beethovenek eta bere Missa-k ez dute kaskarkeria edo distantzia jasaten. Furtwängler bezalako beethoveniar batek ere, Missa Solemnis "Beethovenen lanik onena" zela uste zuenak, uko egin zion interpretatzeari: "Ezin dut bere mezuaren handitasunari justizia egingo liokeen emaitzarik lortu".
Horrekin guztiarekin esan nahi dut Missa-ren interpretazioa bere kategoriaren eta sakontasunaren mailan lortzea lan ikaragarria dela. Eta egundoko zeregin horri aurre egin zion Euskadiko Orkestrak, Beethovenen espezialistatzat jotzen den Jérémie Rohrer zuzendari frantziarraren gidaritzapean.
Lehenik eta behin, esan behar dut lau bakarlari oso on topatu genituela, obrak eskatzen duen mailan egoten jakin zutenak. Chen Reiss sopranoa eta Maximilian Schmitt tenorea sasoi betean zeuden eta ahotsen homogeneotasun ona erakutsi zuten. Beren tinbreak ederki akoplatu ziren, adibidez Christe eleison eta Qui tollis zatietan, baina koruarekin eta orkestrarekin ere ondo akoplatu ziren. Era berean, bai Victoria Karkacheva mezzoak, bai Hanno Müller-Brachmann baxuak aktuazio akatsgabeak izan zituzten.
Horrek euren interpretazio-kalitatea erakusten du, Beethovenek ez baitie obra honetan bravurazko pasarterik eskaintzen, meza gehienetan bezala, bereziki Bach edo Mozarten mezetan. Missa Solemnis-en bakarlariak apalki osotasun handi baten parte dira.
Agian, bertsio honetan soinu bolumen handiegiko uneren bat izan zen, nahiz eta Rohrerrek berak ahaleginak egin zituen bolumenak arinduta –bereziki koruarenak– oreka bat lortzeko.
Nolanahi ere, xehetasun horiek gorabehera, Rohrerrek obra handi hau gidatzen jakin zuen, bere bost zatien bidez, etengabeko progresioan, baina gehiegikeria dramatikoetan erori gabe, eta hori zaila da.
Orfeoia, meza honi mesederik egiten ez zioten bolumenezko soberakinak alde batera utzita, zuzen aritu zen.
Egia esan, pena ematen dit kritika honi izenburu hau ipintzea. Bizeten Carmen oso opera ederra da, sentimendu unibertsalak jorratzen dituena, hala nola pasioa, jeloskortasuna, maitatuaren posesioa, independentzia... Eta hori guztia musika-lan bikaina oinarri hartuta. Baina... [+]
Albenizen Iberia Suite monumentalaren bertsio berri bat egitea meritu handiko lana da, merkatuan dauden grabazio bikainak kontuan hartuta. Hori dela eta, Luis Fernando Pérezek Musika Hamabostaldiko errezitaldian egindako lanak sekulako miresmena sortu zidan.
Orkestra handien eta obra handien kontzertuen ondoren, ezin diegu arreta jarri gabe utzi musika-patxada handiagoko, sosegu handiagoko baina edertasun berdineko proposamenei.
Luxenburgoko Orkestra Filarmonikoaren lehen kontzertuak erromantizismo berantiarraren kutsua izan bazuen ere, bigarren topaketan taldeak bi obra zirraragarri interpretatu zituen, istorioak kontatzen zizkigutenak. Obra exigenteak ziren, batez ere adierazkortasunaren aldetik, eta... [+]
Musika Hamabostaldiak 85. edizioari hasiera eman dio, orkestra handi batekin eta inaugurazio baten mailako programarekin.
Mundu honetan gauza guztiak bezala, amaitu da Donostiako Musika Hamabostaldia. Normaltasunera itzultzeak markatutako edizioa izan da, eta horrek ikusleen gogo berezia eta giroan sumatzen zen nolabaiteko poza ekarri ditu.
Musika ez da diziplina tekniko hutsa, musika kutsu... [+]
Urtero bezala, Donostiako Musika Hamabostaldiarekin hitzordua derrigorrezkoa da musikazaleontzat. Eta aurreko urteetan bezala, eskaintza askotarikoa, atsegina eta pizgarriz betea dator. 83. hamabostaldia izango da aurtengoa, eta agian ohi baino jaialdi laburragoa izango bada... [+]