Alberto Núñez Feijóoren agintaldi oparoak segida izango du Alfonso Ruedarekin. 2009ko hauteskundeen ostean hartu zuen atzera ere agintea PPk, 2005eko hauteskundeetan gehiengoa edukitzetik ordezkari batera geratu eta PSOEk eta BNGk, bigarren eta hirugarren indarrek, gobernua eratu eta gobernatu ondoren.

Lau urteko oposizioaldiaren ondoren, Manuel Fraga Iribarne baztertu eta Núñez Feijóo jarri zuten buru. Eta 2009ko hauteskundeetan, ozta-ozta, baina gehiengo osoa eskuratu zuen PPk: 38 aulki. 2012an, 2016an eta 2020an, berriz, 41 eta 42 eserleku eskuratu zituen. Iazko urtean, PPren Espainiako lidergoa hartu zuen Feijóok, eta presidenteorde Ruedak hartu zuen presidentetza eta aginte makila.

Arrazoi bategatik edo besteagatik gainbeheratxoa aurreikusten zioten hainbat inkestek, baina ez da azkenean hainbesterainokoa izan: 40 eserleku lortu ditu PPren Ruedak eta, beraz, gehiengo osoarekin gobernatuko du. Era berean, Feijóoren aroan baino boto gehiago eskuratu ditu Ruedak, parte hartze altuaren poderioz.

Aldaketarako aukera, baztertuta

BNGk eta Ana Pontón hautagaiak badituzte motiboak pozik egoteko, Galiziako nazionalismoaren blokeak inoizko emaitzarik onenak lortu dituelako bertako parlamenturako hauteskundeetan. PPren alternatiba direla sendo defendatu du Pontónek kanpainan, baina boto mugimendua aldaketarako balizko gobernu horretako alderdien artean gauzatu da; bost eserleku galdu ditu PSOEk –14tik 9ra–, eta sei irabazi ditu BNGk –19tik 25era–. Bien arteko baturak 34 aulki ematen ditu; 38koa osatzetik urrun.

Yolanda Díaz, etxean

Literalki, Madrildik jarraitu ditu bere sorterriko eta politikagintzako lehen urratsak egin zituen lurraldeko hauteskundeak Yolanda Díaz Sumarren sortzaile eta liderrak. Emaitza oso kaskarrak izan ditu, hainbeste konfrontazioen ondotik –Pablo Iglesiasek, esaterako, BNGri botoa emateko deia egin zuen bere foroetan–.

Sumarrek botoen %1,89a baino ez du eskuratu –28.000 boto osotara–, eta Podemosek, berriz, %0,26a –4.000 boto ere ez–. PACMAk, esaterako, Podemosek baino boto gehiago lortu ditu –botoen %0,36 eta, kopurutan, Podemosek baino 1.500 gehiago–.

Emaitzak jakin berritan, txio baten bidez komunikatu da Díaz: “Emaitzak txarrak izan dira” eta “Galizia hobetzeko lanean jarraituko dugu” esan du.

Ourenseko berritasuna

Gobernua osatu ahal izateko behar baino bi eserleku gehiago ditu PPk, baina baten faltan geratuz gero, beste lagun bat izango zuen ganberan; izan ere, Democracia Ourensanak aulki bat izango du parlamentuan.

DO soilik Ourensen aurkezten den alderdi bat da, eta probintzia hori hobetzeko mekanismoak eskatzen ditu, oro har, despopulazioari aurre egiteko; besteak beste, inbertsioak eskatu ohi dizkio Galiziako Xuntari. Azken urteetan gora egin duen mugimendua da; Ourense hiriko alkatetza lortu zuen azken hauteskundeetan.

Inoizko parte hartzerik handiena

Botoa eman zezaketen artean, hirutik bik baino gehiagok eman dute botoa: %67 pasatxo. Galiziako parlamentuen historian inoizko parte hartzerik handiena da. Esaterako, 2009an, PSOE-BNGtik atzera ere PPra gobernu aldaketa gauzatu zenean, %65ekoa izan zen parte hartzea.

Kanpainan mintzatu diren zenbait adituk esan izan dute parte hartze handiak mesede egin ziezaiokeela BNGri; zehatzago, gutxienez %65ekoa izan behar zela. Baina horrek ez zuela ezer bermatuko ere bazioten. Dena den, emaitzak eskutan, bistan geratu da ez dela horrela izan; PPk bere boto emaileak mobilizatzea lortu du gobernu-aldaketaren mamua “arriskutzat” jota.

BNGren agintaldia deslegitimatzeko, esaterako, ondorengo bideo hau zabaldu zuen PPk kanpaina bukaeran. BNGren eta EH Bilduren arteko lotura argitara ematen zuen, besteak beste Europako Parlamentura batera aurkezten direla edota BNGko buruek Sareren urteroko manifestazioan parte hartzen dutela, eta, gauzak horrela, BNGren eta ETAren arteko lotura egiten zuen.