Errezitaldi lirikoa
Antolatzailea: Columbus Fundazioa.
Interpreteak: María José Montiel (mezzoa), Vasko Vassilev (biolina), Miquel Estelrich (pianoa).
Egitaraua: Khan, Bizet, Massenet, Sain Saëns, Falla, Granados, Halffter, Montsalvatge, Sarasate eta Guridiren obrak.
Lekua: Bilboko Elkarte Filarmonikoa.
Data: Irailaren 15a.

----------------------------------------------------------

Haurren minbiziari eta gaixotasun arraroei buruz ikertzeko egiten  eta eskaintzen den guztia gutxi da. Garrantzitsua da guztiok, ahal dugun neurrian, helburu horretan laguntzea.

Elkarte asko, irabazi asmorik gabe, horrelako gaixotasunak dituzten haurren bizitza hobetzen saiatzen dira. Besteak beste, Columbus Fundazioa sortu zen 2017an, minbizia edo gaixotasun arraroak dituzten haurrei terapiarik aurreratuenak eta eraginkorrenak eskuratzen laguntzeko, haien bizi-itxaropena eta bizi-kalitatea hobetzeko. Era berean, kultura eta zientzia sustatzen eta zabaltzen lan egiten du fundazio horrek, gizartera hurbiltzea ahalbidetzen duten jarduerak bultzatuta.
Ildo horretan, Columbus Fundazioak RenHacer 2023 jaialdia antolatu du, behar duten haurrei laguntza emateko, ikerketa sustatzeko eta kultura zabaltzeko. Jaialdi horrek, egun batzuetan zehar, ongintzazko kontzertu batzuk eskaini ditu, beren jarduerak egiteko aukera emango dieten funtsak lortzeko.

Kontzertu horietako bat Bilboko Elkarte Filarmonikoan egin zen, bertako kontzertu-areto nagusian. Areto hori Fidel Iturria arkitektoak eraiki zuen 1904an. Europako ganbera-areto zaharrenetakoa da, eta akustika onena duena. Grabazio garrantzitsuak egin dira bertan, hala nola Alicia de Larrochak Suite Iberia-ren egin zuen lehen bertsioa (bide batez, aurten, pianista handi horren jaiotzaren mendeurrena betetzen da).

Errezitaldia eman zuten Vasko Vassilev biolinistak eta María José Montiel mezzo bikainak, bigarrenak Miquel Estelrich pianistarekin batera (artxiboko argazkian ageri dira biak). Horrelako kontzertuetan espero zitekeen bezala, interpretatu zuten errepertorioa polita izan zen, publikoarentzat oso atsegina eta askotarikoa.

Kontzertuaren lehen zatia konpositore frantziarren obrek osatu zuten. Bizet, Massenet eta Saint-Saënsen piezak gustuz eta kariño nabarmenez interpretatu zituzten mezzoak eta biolinista bulgariarrak.

Bigarren zatian, bi bakarlariak oso gustura sumatu genituen interpretatu zituzten piezekin. Montielek abestu zituen Fallaren 7 kantu espainiar herrikoien hiru piezak ezin hobeto egokitzen dira bere ahots ilun eta adierazkorrera.

Vassilevek, bere aldetik, Sarasateren Aires gitanos lanean bere teknika eta musikaltasun handia erakutsi zituen.
Saioa bi bisekin amaitu zen: Guridiren Hamar euskal melodiak obratik Ala baita izenekoa, Montielek euskaraz bikain abestua, eta El día que me quieras tangoa. Publikoa, tamalez oso gutxi zena, poz-pozik atera zen.