Nola gogoratzen duzu 2002ko otsaila?

Urduritasunarekin oroitzen dut. Baina bide baten hastapenean izaten den ilusioarekin ere. Garai hartan 24 urte nituen, irratigintzan esperientziarik ez nuenez Gure Irratiako lankideen eskutik hasi nintzen mundu hau deskubritzen eta irratiko lanak neureganatzen. Antxeta Irratian sartzen azken langilea izan nintzen, ordurako proiektua mamituta zegoen, baina hastapenetik nire egin nuen, eskualde berezi honetan euskarazko tokiko komunikabide baten beharra agerikoa baitzen. Elkar ezagutza bultzatzea ere beharrezkoa iruditzen zitzaidan.

Nola joan dira hogei urteok?

Konturatu gabe joan dira, baina aldi berean intentsitate oso handikoak izan dira. Garai ezberdinak izan ditu Antxeta Irratiak, garatzen joan den proiektua baita. Herriari begira dago, eta eskualdeko elkarteekin harremana sendotu dela esango nuke. Hogei urte hauetan aldaketak ere izan dira gure eskualdean, eta euskarak espazio publikoan presentzia handiagoa duela esango nuke, nahiz eta oraindik ere urrats gehiago eman behar diren. Orain arteko ibilbidea aberatsa izan da, bere momentu onekin eta zailekin. Laguntzaile asko pasa dira Antxeta Irratitik eta gaur egun ere berriak gehitzen doaz, eta horrek ematen dio gure proiektuari hauspoa.

Galde daiteke zer den Maia Antxeta gabe, baina zer litzateke Antxeta Maia gabe?

Maia Antxeta gabe beste bat izanen litzateke, irratiak pertsonalki eman didana handia izan baita. Urte hauetan asko ikasi dut eta oraindik ere ikasten ari naiz, arlo profesionalean nahiz pertsonalean. Aldiz, Antxetak ni gabe berdina izaten segituko luke, dudarik gabe.

Tokiko hedabide baten garrantziaz eta funtzioaz kontziente al zinen Antxetan lanean hasi aitzin?

Bai, kontziente nintzen, gure eskualdean elkarren ezagutza eza handia zela sentitzen bainuen. Eta euskarazko tokiko irrati batek ekar zezakeenaz ere ohartu nintzen. Hendaiarra naiz, bertako ikastolatik pasatakoa eta Kanboko kolegioan hainbat urtez egon ondotik Hondarribiko institututik ere iragandakoa. Santiagoko zubia egunerokoan zeharkatzen dugunok asko gara, eta nire moduko euskaldunon arteko elkar ezagutza hori eta euskara bultzatzea, bereziki gustuko dudan irratiaren bidez, oso ederra iruditzen zitzaidan. Eta hala iruditzen zait oraindik ere.

Kultur kazetaritzan buru-belarri murgilduta zaude azken urteetan, bereziki Euskal Irratiak federazioan.

Bai, kultur kazetari izatea proposatu zidaten orain dela urte zenbaitzuk eta horretan dihardut, gustura gainera. Dela musika, antzerkia, literatura edo zinema, gustuko ditudan arloak dira eta iruditzen zait iparraldean bereziki lan handia dugula euskal kulturaren hedapenari dagokionez. Euskarazko lanen ikusgarritasunean ekarpena egiten ahalegintzen gara. Euskaraz sortzen den uzta askotarikoa eta aberatsa da, eta ezinbestekoa da Baionan, Donapaleun, Maulen edo Hendaian bizi direnek horren berri ere izatea.

Badago zer ospatu, besteak beste Antxeta Irratiak egoitza berria izango baitu hemendik aurrera.

Bai, hogei urteren buruan baldintza hobeak eskaintzen dizkigun lokal berrian egoteak pozten gaitu. Orain Hendaiako Intzura auzoan gaude eta egoitza berriak indar berria ekarriko duelakoan nago. Lehengo egoitza Hendaia erdigunean kokatuta bazegoen ere zaharkitua geratu da, eta baldintzak jada ez ziren egokiak eguneroko lanerako.

Entzuleei zer esan?

Entzuleei eskerrak ematea besterik ez dagokigu, arazo teknikoen gainetik fidelak izan direlako asko, eta ikusten ez baditugu ere ondoan somatzen baititugu. Aurten ere Korrika izango dugula aprobetxatuz esan nahiko nuke momentu berezia izaten dela guretzat, gure entzuleekin egoteko tartea eskaintzen baitigu; une hunkigarria eta ederra izaten da.

Irun, Biriatu, Hendaia eta Hondarribia, berriki baita Bera ere. Zer du bailara honek?

Bailara honek bizi ohitura ezberdinak, euskararen inguruan hizkuntza ezberdinak eta euskalki ezberdinak ditu, oso aberatsa eta askotarikoa da, eta nortasun handikoa, esango nuke nik. Mendia eta itsasoa lotzen ditu, herriak eta hiriak biltzen, eta bi edo hiru administraziopean bizi bagara ere euskarak eta euskal kulturak lotzen gaitu bertakook.

Ttikitik gauza handiak egin daitezke, eta euskaraz.

Bai, eta euskararen normalizaziorako euskarazko komunikabideak ezinbestekoak dira, euskaraz bizitzeko beharrezkoak baitira. Antxeta Irratian horretan lanean segituko dugu. Eskualdeko elkarteen parte hartzearekin irratigintzari lotutako proiektu oso ederrak, eta guretzat handiak, garatu ahal izan ditugu hogei urte hauetan. Bide ederra opa diot Antxeta Irratiari!