Tobaccos Days liburu-dendako eta Hunky Dory Laboratory lurrindegiko bi literatur zale hauek 10 liburu aukeratu eta bakoitzari lurrin bana egokitu diote. Mimo handiz hautatutako eskaintza literario zabalean murgilduko gaituzte saiakerak, entseguak, konstelazioei buruzko istorioak, misteriozko pasarteak, eleberri psikologikoak eta askotariko lurringaiak azalduz.

Lehen liburua Leila Gurriero kazetari eta idazle argentinarrak idatzitako Teoría de la gravedad bilduma da. Garcia eta Marzolen ustez, gardentasunean igeri egiteko beta ematen du, eguneroko errealitatea erakutsi eta gure barnean ezkutatutakoei argia ematen die. Liburuan sarri aipatzen da jasmin usaina eta horregatik, Viadeimille etxeko Gelsomino lurrina jarri diote.

Usain eta irudimen munduan barneratuz, La interprete del dolor (Jhumpa Lahiri) AEBetan bizi diren Indiako etorkin familien gizartea irudikatzen duen liburua dugu hurrengoa. Haien kultura oinordetza nola bizi duten azaltzen da, eta kasu honetan, D.S & Durga etxeko Radio Bombay perfumea jarri diote.

Hirugarrenik, Garciak eta Marzolek oso gustuko duten Siri Hustvedten La mujer que mira a los hombres que miran a las mujeres feminismoaren, artearen eta zientziaren inguruko entseguak gomendatu dituzte. Oraingoan, Pierre Guillaume etxeko Ilang Ivohibe usaina aukeratu dute, baina idazlearentzat hautatua, ez liburuarentzat.

Gero, Irene Solá idazle katalanaren Canto yo y la montaña baila maitagarrien ipuina erakutsi dute. Kolore anitzetako eta baso hostotsuetako mundu berezi eta misteriotsu horri Spiritus izeneko intsentsu ukitua duen jaboi berde usaina egokitu diote.

Fikzioarekin jarraituz, Ghost World (Daniel Clowes) mamuei buruzko ipuina aipatu dute. Paristar batek Los Angeles hiria nola ikusten duen azaltzen duen liburu honi, Paris L.A. izeneko azukre usaina duen lurrina egokitu diote. Goxoki usain horrekin batera, Ozeko Aztia ekarri digute gogora, eta 1873 Collete lurringaia jarri diote.

Misteriozko istorio batekin jarraituz, Patricia Highsmithen Extraños en un tren liburuan bi lagunek burututako hilketa da nagusi. Iluntasuna, misterioa eta beldurra kontatzeko Nerotic lurringaia aukeratu dute.

Marguerite Durasen El amante eleberri autobiografikoan, aldiz, kolonizatutako Indotxinan bizi den frantziar jatorriko nerabe baten istorioa kontatzen zaigu. Haren familiaren egoera ekonomikoak lurra jo eta gero, mutil dirudun batekin duen harremana kontatzen digu. Lurraldearen izena aitzakiatzat hartuz, Indochine perfumea jarri diote Durasen kontakizun honi.

Ordubeteko zuzeneko honi amaiera emateko, bi hizlariek amankomunean duten astronomiako El atlas de las constelaciones liburua aipatu dute. Gau beltzean dirdira egiten duten puntu zurien inguruko hainbat istorio azaltzen ditu, gaueko zerua margotzen duten 88 konstelazioena, hain zuzen ere. Experimentum Crucis lurrina jarri diote azkenengo liburu ilustratu honi, entzuleak usain eta letren munduko ametsera erakarriz.