Post hondartza kontzertu polita eskaini zuen Sanfermin egun bezperan Konpost talde gasteiztarrak, Zumaian. Arratsaldeko 19:30ean egin zuten hitzordua Erribera kalean. Azken denboran pisu handia hartu duen kalea da herrian. Dagoeneko gutxi izango dira Zumaiako muralen berri eduki ez dutenak; makina bat izan dira bertan marraztu dituzten aldarrikapenak, baina mural guztiak batzen ditu aldarri bakar batek: kalea guztiona da.

81. murala margotu zuten ostiralean Konpost taldeak kontzertua eskaintzen zuen bitartean. Muralaren aurrean txukun jarri zituzten instrumentuak eta bi aldeetara garagardoa eta “Kalea guztiona da” aldarria zeramatzaten kamisetak. Laster hasi zen jendea hondartzatik bueltan kalearen bi aldeetan elkartzen.

Konpost taldeak bere bigarren kontzertua eskaini zuen Zumaian, baina argi geratu zen euren ibilbidea ez zela duela kontzertu bat hasi. Izan ere, esperientzia handiko lagun koadrila aritu zen zumaiarren belarriak goxatzen: Txerra Bolinaga RIP taldeko bateria, Bingen Mendizabal Hertzainak taldeko biolina, Jon Aranburu Stockhom S. taldeko gitarra-jolea eta Ruben Sanchez bertsolaria. Lagun artean sortu omen zuten Konpost, eta kontzertua hasi orduko nabari zen hori. Tonu jostarian hasi zuten kontzertua, Sanchez abeslariak Osakidetzako bata soinean zuela.

Musika entzun orduko hasi ziren 81. murala egiten Koldo, Olatz eta Eneko. Haurrek lehen lerroan lotsagabeki mugitu zituzten gerriak eta buruak, helduagoek erritmoa jarraitzeari muzin egiten zioten bitartean.

Post rock moduan deskribatzen dute beraien musika eta euren abestiak zein bertsioak jotzen dituzte. Astelehenari edo euskal presoen egoerari abesten diote modu kritiko eta ausartean, zenbait kasutan txistua edo andaluz erako txaloak jotzera ere ausartuz.

Espaloia okupatuz jo zuen Konpost taldeak, herritarrek kalea hartzen zuten bitartean. Eta horrela, aldarrikapena izan zen nagusi “beste bat, beste bat” eskariaren atzetik jotako abestietan. Gasteizko mugimendu sozialari erreferentzia eginez Zumaiakoekin elkartasuna adierazi zuten, Gasteiz rules abestia moldatu eta Zumaia rules bihurtuz. Azken abesti honekin jendea kantuan jartzea ere lortu zuten.

Kontzertuaren zurrunbiloan sartuta eta Zumaia rules esaten zuten bakoitzean fuck the power erantzuten gogotsu genbiltzan bitartean, ia ohartu ere ez ginen egin Erribera kaleko 81. murala bukatu zutela. Zenbat kapa dituen dagoeneko Erriberako hormak!

Konposta egin eta ongarri bihurtuta dator dudarik gabe Konpost talde gasteiztarra, eta hala erakutsi dute alkatearen baimenik gabe Zumaiako Erribera kalean eman duten kontzertuan. 81. aldiz birziklatu dute horma.