Gainera, 2023ra arte atzeratuko litzateke "jasangarritasun faktorea" deiturikoa, 2019an indarrean sartzekoa zena. Beste zenbait neurri ere adostu dituzte, adibidez, %56ra igoko dela alargun geratzeagatik pentsioa jasotzen dutenen oinarri erregulatzailea; eta hurrengo urtean oinarri hori %60raino igotzea.

Trukean, Aitor Esteban EAJk Espainiako Kongresuan duen bozeramaileak azaldu du bere taldeak kontra bozkatuko duela Rajoyren aurrekontuei jarritako osoko zuzenketa guztietan.

Joan den ostiralean eman zuen EAJk gaurko erabakia etor zitekeela adierazten zuen urratsa: Espainiako Gobernuaren aurrekontuei osoko zuzenketarik ez ziela jarriko iragarri ondoren, jeltzaleen hurrengo mugimenduaren zain zegoen prentsa guztia.

Asteazkenean iragarritakoak asko leuntzen dio bidea PPri, Espainiako Estatuan indarrean jarri nahi dituen aurrekontuek aurrera egin dezaten.

Ostegun honetan bozkatuko dira Kongresuan Rajoyren exekutiboak aurkeztutako kontuei jarritako osoko zuzenketak. Sei dira guztira, eta EAJrekin Rajoyri zenbakiak ateratzen zaizkio: 175 ordezkariren babesa izango luke osoko zuzenketak atzera botatzeko –PP, Ciudadanos, UPN, Coalición Canaria, Foro Asturias eta EAJrenak–, oposizioko indarren beste 175en kontra –PSOE, Unidos Podemos, ERC, PDeCAT, Compromis eta EH Bildu–. Hiru botaziotan berdinketa gertatuko balitz, PPren aurrekontuek aurrera egin ahalko lukete.

Kataluniako egoerak dirudi EAJren eta PPren arteko erabateko elkar ulertzean geratzen den azken pieza, baina ostegun honetako tramitea gaindituta, aurrekontuek bizirik eutsiko dute maiatzaren 22tik aurrera. Epe hori da muga Katalunian presidentea aukeratzeko marra gorria. Inbestidura horrekin, 155. artikulua kenduko litzateke eta EAJk posible izango luke aurrekontuen babesari buruz esandakoari eustea –alegia, ez zuela Rajoy babestuko 155. artikulua Katalunian indarrean zegoen bitartean–.

Estebanek adierazi du asteartean Mariano Rajoyk eta Andoni Ortuzar bildu ostean onartu dela planteamendua.