Agur, Arnaldo. Adierarik onenean: augur onak opatzen dizkizudala alegia. Onartu omen duzu lehendakarigai izatea. Eta ezker abertzale formalean horixe dute itxaropen, gainbehera azeleratuari itxura antzeko galga jarri ahal izateko.

Ez duzu lantegi makala. Urte askotako norabide ezin okerragoaren ondorioz, lehengo zaharretan katramilatuta, ezker abertzaleari kontuak ustelduz doazkio aspaldian. Iraganeko kondarrak ahoan, belarri eta begietan, etorkizunari aurre egiteko garbiketa eta sorkuntza lan eskerga behar du.

Estratega onak aukeratu beharko dituzu, mando zaharrekin ezin lasterketa irabazi eta. Mugak ere ongi jarri: ez da zilegi edozer egitea ustez arrazoi teorikoa izateagatik. Onenei erreparatu eta harrokeriak baztertu. Helburuak lortzeko beste alderdietan ere adiskideak behar dira. Gipuzkoan lau urtez ahalmenak erakusteko aukera izan eta erremateko kalifikazioa Ez nahikoa izan da. Zaborren kontua kale itsuan utzi duzue zabor bihurtuta.

XXI. mendean behar dugun ezker abertzale sendo eta pozgarria garatzeko XIX.eko mundu ikuskerak ez du balio. Esan duzu ausartu egingo zarela eta irribarrea eskatu, Arnaldo. Horregatik behintzat merezi duzu bozka.

Agur ere Baionako apezpikuari, Marc Ailleti. Baita Donostiako José Ignacio Munillari ere. Baina bestelakoa: adio, luze arte esatekoa.

Kristau sentitzen garenontzat lotsagarria ez ezik, ernegagarria ere bada beltzezko gizon horien portaera. Edozein astakeria esaten ausartu eta  erridikulo galanta sentiarazi gehienoi. ”Homosexualitatea senda dezakeela” batek, eta “abortoa atentatu jihadista baten antzekoa dela” besteak, baita babukeria zerrenda amaigabea esan ere.

Ebanjelioetako esaldirik ederrenetakoan Jesusek dio: “Ez izan beldur”. Fede helduak poza eta indarra ematen baitu. Inkontziente horiek Berri ona ilun eta izugarri bihurtzen dute. Zoazte mesedez.

Abel Azkona artista epailearen aurrean salatu du Espainiako abokatu kristauen elkarteak. Azkonak eliza katolikoan gertatu diren pederastia kasu ugariak eta berauek ezkutatzen egindako ahaleginak agerian jartzeko hostia sagaratuak erabili ditu. Nire kristau ikuspegitik Jesusen gorputzaren erabilpen ederra.

Arropa sakratuak jantzi arren, benetako jardun blasfemoan aritu diren pedofiloak sozietate osoaren aurrean nabarmen uztea ekimen erlijiosoa da. Guztiz errugabe diren gorputz eta arima gazteak bidegabe betirako markatu dituztenak horiexek dira sakrilegoak.

Mesias berriro munduratuko balitz, Josune izango litzateke, siriarra eta Abel Azkonaren adiskide.