Datozen hilabeteotako lehen ostegunetan tailer berezi hau antolatzea “gure aretoko ikusleen artetik atera da” diosku Luque Taguak, La Fundicioneko kideak. “Normalean ikuskizuna eta gero, ohikoa dugu basoerdi bat eskaintzea ikusleei, sortzailearen eta publikoaren arteko topaketa bideratzeko edo, besterik gabe, ikusitakoaren gainean gure artean mintzatzeko. Ikusleek gustuko dute hitz egitea, eta horretarako ez dago arte eszenikoetan profesionala edo aditua izan beharrik. Askotan harritu gaitu ikusleek duten ahalmena”.

Hitzordu hori nolabait arautu eta hileko lehen ostegunetan biltzea da ikusleen tailerraren asmoa. Sarrera doakoa eta librea izango da, eta David Barbero kazetari eta arte eszenikoen zalea izango da gidaria, ohikoa La Fundicioneko ikusleen artean. “Mintzagaiak ez du La Fundicionek erakusten duen egitarauaren ingurukoa izan beharrik. Beste nonbait ikusitakoa ere ekar daiteke gure artera” zehaztu du Luquek.

Datorren urriaren 2an izango du tailerrak lehen hitzordua. Bertan, Algo valioso se agota dantza piezaren inguruan hitz egingo dute Olatz de Andresek, Bilboko Muelle 3 dantza eskolako kide, dantzari eta koreograkoak, eta Pablo Isbertek, Bartzelonako El Conde de Torrefieleko antzerki taldeko dramaturgoak. Urriaren 21ean hasiko den BAD jaialdian aurkeztuko da Algo valioso se agota. Luquek dioenez, “testuaren mundutik datorren antzerkigile honek dantzan eta gorputzean nola eragiten duen” jakin nahi dute.

Pedro Barea, El Correo egunkariko antzerki kritikaria ere gonbidatuko dute lehen hitzordura, informazio orokorreko egunkarietan antzerkiak edo dantza garaikideak nolako tratamendua duten azaldu dezan.

Gonbidatuek 10 minutu inguruko aurkezpena egingo dute eta gero ikusleen txanda helduko da. “Publikoaren partaidetza bultzatu nahi dugu. Ikusi dutenaz, gustuko dutenaz, nahiko luketenaz hitz egin dezatela, ikuspegi guztiak bildu nahi baitugu” nabarmendu du Taguak.

“Kulturak geruza asko ditu eta hainbat eragile daude nor bere ertzetik lanean. Izan daitezke dantzariak, aktoreak, dramaturgoak, ekoizleak, kudeatzaileak, komunikazio arduradunak... denek bat egiten dute eszenan” esplikatu digu La Fundicioneko kideak. “Egitura horizontala osatu nahi dugu guztiekin, eta espazio honetara publikoa erakarri, eroso senti dadila eta hitz egiteko aukera izan dezala. Kultura aisialdia den heinean, gustuko duzun zerbaitez hitz egiteko aukera eman nahi diogu publiko orokorrari, zabaldutako tarte honetan”, dio Luquek. Hitzaldi dilbugaltiboak dira finean.

Sorkuntza garaikideak duen izaera berritzailea eta gaztea, eta beronek dituen ertzak eta geruzak izango dituzte mintzagai, beraz, La Fundicionen. Dramaturgia berriak, gorputza eta honen poetikak, kritikaren funtzioa, publikoaren rola edo musikak eta argiztapenak sorkuntza garaikidean duten zerikusia izan daitezke adibide batzuk.