Etxebizitzaren jabe izateko esperantza oraindik duten baionesek badute, doia deskart, azken El dorado: Séqué auzoa, azken urteetan osoki sortua. Eko-auzoa nahi luke eta perspektiba horretan eztabaidagai  izan da proiektua.

Bada baratze kolektibo tipi bat han: urbanizazioari errekuperatu behar izan gabe, urbanizaziotik salbatu den lur peza. Espantuko gauzarik ez bada ere, zirraragarria zaidan txokoa da.

Oihan bazterrean kausitzen da, haritzondo ikaragarrien maldan eta berriki landatu fruitu arbolondoen artean, hesi garbiz babestu paradisu zatia. Eden horrek badu Kolkhozetik, jabea herria da, probetxua erabiltzaileena eta autogestioan kudeatua da: inguruko bizitegietako jendez osatu komunitateak du kudeatzen. Aterpea denena da eta han pruntki lerrokaturik daude denen tresnak, sarde, aitzur eta oraindik enetzat funtzio sekretuko zenbait gauza, bakoitzak txandaka erabiltzekoak. Badira lur alor ttipiak, familiako bana, fizela txirikordaz zedarrituak. Inguruetan, lur sail pribatuen alboan, parte komunak dira, guziek guzientzat landuak. Noizbehinka, ametsarazten dit, hogei urte nituenean bezala, mundua alda daitekeela, sistema enpoildu eta antolaketa libertarioan gara gaitezkeela.

Gainera bada giro oso bat! Auzo artekoa, elkartasunezkoa, elkarrengandik ikastekoa. Alabaina, denak baratzezain hasiberriak, nehork ez du sekulakoa ateratzeko asmorik, galdetzen diogun gauza bakarra da zerbaixka eskaintzea, egin indarren truk. Denbora-pasako aitzakia da eta mundu nahas-mahasgarritik ihes egitekoa, eta bide batez, ekartzen du auzoko jende zenbaitekin trukatzea, birgizarteratzea hots. Dena da egitekoa oraino eta plazera da, goiz izanik ere eguzkiak jadanik kitzikatzen zaituela, izerditzea iraulen eta lur porroskatzen. Betegarria da lur gizen sailen artetik burua altxatu eta nihaur bezain ez jakituna (ignorantzia ere kolektiboa baita) den ondoko lur sailekoarekin hizketan aritzea: gauzak nola antolatu, ereiteko garaiak, bareen neurri ikaragarria.

Eta goxoa da amestea sukaldeko mahai iskinean, igande goizez, eguerdiko apairuko, nola bihikatuko dituzun zure ilar biribil teka bildu berriak, hazi berde bixiak ontziratu arau hauen berdura usain fresko lerdenak gela osoa zipriztinduko duela.

Lurra, autogestioa, indarra eta saria ukaitea, integratzea, ausatzea. Maila bat baino gehiagotan zoriona eragiteko tresna bat. Jardiner, c'est résister.