“Agian ilunetan, hobeto ikusten da”. Aiora Renteriaren hitzak dira, Da disko berritik hartutakoak. Zazpigarrena dute, hamasei urteko ibilbide luzearen azken emaitza. Abeslariaren ahotsa, presentzia eta hitzak bere betiko taldekideek lagunduta datoz:Asier Basabe (bateria), Ruben Gonzalez (baxua) eta Iñaki Imaz Tipi (gitarra). Dave M. Allen ekoizle britainarra ere bidaide izan dute.
“Lagunak, Barreak, Era, Dena, Elektrizitatea, Bidea, Handia, Musika, Haskundea, Behar izana, Asetasuna, Sinismena, Birikiak, Fedea, Bihotza, Bizitza, Zintzoa, Poza, Askatasuna, Familia, Maitasuna, Eskola, Hezkuntza, Lurraldea, Lana, Sustraiak, Sorkuntza, Taldea, Plazerra, Konexioa, Armonia, Irria, Ardura, Haserrea, Gora, Ateak, Adiskidetasuna, Koloreak, Itxaropena, Adorea, Desioa, Positiboa, Arnasa, Guda, Konpromisoa, Borroka, Beharra, Ihesbidea, Elikagaia, Eboluzioa, Ikasketa, Garena Da”. Horrela definitu dute Zea Mayseko lagunek autoekotzitako azken diskoa, Da. Zea Maysen izaera ezin baita hitz bakar batez definitu; ezin baitu gauza bakarra izan, gauza askoren lotura baizik. Basabek, Gonzalezek, Imazek eta Renteriak elkarrekin daramatzaten Hamasei urteak ez baitira huskeria: zazpi disko eta 500etik gora kontzertu.
Ohiko soinua ageri den arren, geruza ugari ditu disko berri honek, taldeko musikari bakoitzak bere baitan duen onena eman baitu. Ohiko musika tresnez gain, hau da, gitarra, bateria, gitarra apala eta ahotsa, beste baliabide batzuk ere ageri dira. Perkusio tresna bereziak, sintetizadoreak, programaketak, eta pianoak edo txeloak ere tokia dute diskoan. Horretarako, beste zenbait lagun musikarik ere kolaborazio bereziak egin dituzte, hala nola Ekaitz Hernandez Split 77ko baxu-jotzaileak, Aritz Aranburuk eta Jose Lastrak (sintetizadoreak eta programaketak), eta Dave Allenek (pianoa).
Dave Allen britainiarra ekoizle artistiko gisa aritu da. “Ekoizpena aparta izan da, normalean ez baitugu ekoizle artistikorik izaten”, azaldu digu Aiora Renteriak. “2012ko abuztuan, disko berriari ekin genionean, ekoizlearen figurari heltzea erabaki genuen. Zenbait buelta eman genizkion, Espainiako Estatuko ekoizleak kontaktatzeko. Baina, orduan David Allen ezagutu genuen Lekeition, aspaldiko lagun baten bidez. Dave The Cure eta Depeche Mode bezalako taldeen ekoizlea izan da. Lekeitioko jaietan jo genuen eta bera bertan zen, oporretan. Pila bat jende zegoen kontzertuan, baina guk Dave Allenentzat jo genuen. Esperientzia berria, emozionantea eta aberasgarria izan da berarekin lan egitea, ez baita erraza horrelako pertsonengana heltzea”, adierazi du Renteriak. Allenek 10 hazbeteko diskoa egin nahi zuen, hori baita Allenen ustez disko batek izan behar duen neurria. Hala ere, Zea Maysek Hamalau abesti osatu zituen disko berrirako. “Azkenean, hamahiru abesti doaz” dio Zea Mayseko abeslariak, “kantok nahastuta entzun eta gero, itzelak iruditu zitzaizkigun, eta hamahiruak sartzeko konbentzitu genuen Allen”.
Abuztuan, Urdulizeko Tio Pete estudioan grabatu zuten diskoa, Jose Lastra, Zea Maysen betiko teknikariaren laguntzaz. “Allen ekoizle artistikoa izan da, eta Jose Lastra ondo ezagutzen duen estudioko mahaian eseri da” argitu digu Ruben Gonzalez baxu-jotzaileak. Grabazioa hasi baino lehen, bost egunez entseguan aritu ziren Allenekin batera. Konponketa batzuk egin ostean, grabazioa etorri zen. “Oso intentsoa izan da grabaketa lana”, dio Renteriak, “azkenean lagun on bat bihurtu da Allen”.
Tio Peten grabatutako diskoa Londresera eraman zuen Allenek, han, Club Ralph estudioan nahasteko asmoz. “Fran Ferdinand musika talde ingelesak bertan nahastu du azken diskoa, beraz, uste genuen bezala, Allen aukera onena izan da guretzat” dio iñaki Imazek. Bera eta Aiora Renteria Londresera joan ziren gero, nahasketa eta masterizazio prozesuaren berri jasotzera, eta txundituta geratu ziren emaitzarekin. Diskoaren diseinua David Gonzalezek –Berri Txarrak eta Cobra taldeetako baxu-jotzaileak– egin du.
Une gozoa bizi du Zea Maysek. 2007an Morphina diskoa grabatu zutenetik autoekoizpenera jo dute euren lan guztietan eta ondo helduta dituzte taldearen uhalak. Hori gutxi balitz, euren enpresa sortu dute, Zea Mays Rock SL, diskoa sortzea bezain garrantzitsua baita banaketa eta promozio lana, eta azken hau ere, euren gain daramate. Hori dela eta, diskoa ez da oraingoz dendetan salduko, www.zea-mays.com helbidean baizik.
“Gure webgunean euskarri digitalean eros daiteke diskoa, eta baita fisikoki ere. Baina disko fisikoa erosten denean, digitala ere bidaltzen zaio erosleari” azaldu du Aiora Renteriak. Durangoko Azokan standa izango dute eta bertan ipiniko dira diskoak salgai, bai azken hau, baita aurrekoak ere. Abenduaren 9ra arte ez da saltokietara helduko, ez dendetara ezta plataforma digitaletara ere.
Aurkezpen kontzertuak Hego Euskal Herriko lau hiriburuetan eskainiko dituzte oraingoz: abenduaren 14an Totem aretoan (Atarrabia); abenduaren 19an Gazteszenan (Donostia); abenduaren 26an Bilboko Kafe Antzokian, eta urtarrilaren 5ean Gasteizeko Jimmy Jazz aretoan.
Egia esan, pena ematen dit kritika honi izenburu hau ipintzea. Bizeten Carmen oso opera ederra da, sentimendu unibertsalak jorratzen dituena, hala nola pasioa, jeloskortasuna, maitatuaren posesioa, independentzia... Eta hori guztia musika-lan bikaina oinarri hartuta. Baina... [+]
UPNk mozioa aurkeztu du Tafallako udalbatzan gobernu taldeari eskatzeko bertan behera utz dezala Raimundo el Canastero musika taldearekin zuen kontratua jaietan kontzertu bat egiteko. Lizarrako jaietan izandako polemikaren ondoren etorri da zentsura eskaera. PSN batu zaio... [+]
Albenizen Iberia Suite monumentalaren bertsio berri bat egitea meritu handiko lana da, merkatuan dauden grabazio bikainak kontuan hartuta. Hori dela eta, Luis Fernando Pérezek Musika Hamabostaldiko errezitaldian egindako lanak sekulako miresmena sortu zidan.
Orkestra handien eta obra handien kontzertuen ondoren, ezin diegu arreta jarri gabe utzi musika-patxada handiagoko, sosegu handiagoko baina edertasun berdineko proposamenei.
Luxenburgoko Orkestra Filarmonikoaren lehen kontzertuak erromantizismo berantiarraren kutsua izan bazuen ere, bigarren topaketan taldeak bi obra zirraragarri interpretatu zituen, istorioak kontatzen zizkigutenak. Obra exigenteak ziren, batez ere adierazkortasunaren aldetik, eta... [+]
Aspaldidanik Saran bizi den arren, goiza Bidasoaren ibarrean pasa behar zuenez gero, Hondarribiko parte zaharrean zitatu gaitu Ruper Ordorikak (Oñati, 1958). Goiz eguzkitsuan, puntual eta irribarretsu agertu da maldan gora, konsistorioaren parera, turista gazte kuadrilla... [+]
Musika Hamabostaldiak 85. edizioari hasiera eman dio, orkestra handi batekin eta inaugurazio baten mailako programarekin.
ARGIAko erredakzioak aurtengo zortzi hilabeteotan kaleratu diren diskoen artean hiru hautatu ditu, gomendatzeko.
Ruper Ordorikak jasoko du Abadia Saria aurten. Gipuzkoako Foru Aldundiak euskararen normalizazioaren aldeko lanetan nabarmendutako pertsona edo elkarteen jarduna saritzeko sortu zen Abadia saria. Irailaren 12an Hendaian egingo da ekitaldia, Abadia Jauregian hain zuzen, eta sari... [+]
Punka. Punka bueltan da, edo hobe esanda, ez da inoiz joan. Lekitxotik (eta ez Lekeitiotik) datoz Zikinekoak, Mendeku Diskak-ekin argitaratu berri duten Bala Galdua Zure Buru Galduan elegantearekin.
“Eixu Zeuk” filosofia. Hori da oinarria eta helburua... [+]
1959. urtea mugarri izan zen jazzaren bilakaeran: Miles Davisek A Kind Of Blue grabatu zuen martxoan eta apirilean; disko horretan parte hartu zuen John Coltranek Giant Steps plazaratu zuen maiatzean; eta, azkenik, Ornette Colemanek The Shape Of Jazz To Come argitaratu zuen,... [+]
OCU kontsumitzaileen Elkarteak hiru arrazoi zehaztu ditu, horien artean kanpoko janaria eta edaria Kobetamendiko esparruan sartzeko debekua, eta eskudirutan edo banku-txartelaren bitartez ordaintzeko ezintasuna. Facuak aurreko urtean egindako salaketan zehazturiko arazoak... [+]
Bere sorterri Ataunen hil da Maximo Aierbe Muxika, 74 urterekin. Euskaldunon Egunkariaren sortu aurreko eta ondoreneko urte malkartsuetako eginahaletan parte hartu zutenek gogoratuko dute proiektu berriaren akziodun bila hainbeste lan egindako gizon hura. Disziplina eta... [+]