Hondakinen kudeaketaren inguruko eztabaidan sarritan errepikatu da argudioa, gaikako bilketa oso zorrotz (atez ate) zertan eginik ez zela defenditzeko: hainbeste milaka herritarren organikoz sortutako konposta non enplegaturik ez genukeela. Konposta soberan.
Zenbait adituk, gainera, uste hori hauspotu dute. Gipuzkoako Hiri Hondakinak Kudeatzeko 2002-2016 Plan Orokorrean, PIGRUG famatuan, idatzi zuten Xabier Garmendiak eta Javier Ansorenak: “Gipuzkoan dagoen konpost eskaerari dagokionean, esan behar da, apenas dagoela eskaerarik, batez ere ondorengo arrazoiengatik: konpost kopuru garrantzitsuak erabiltzeko gai den nekazaritzarik ez izatea…”.
Konpost gehiegi? Horretaz ARGIArako Urko Apaolazak galdeturik (2008ko uztaila) Geomorfologian doktore den José Miguel Edesok azaldu zuen gai organiko gosez daudela Euskal Herriko lurrak, zehazki isuri atlantiarrean intsinis pinu (eta azken aldian eukalipto) monolaborez landatukoak. “Niri baso jabeek esan izan didate –dio Edesok– ez dakitela zer pasatzen den pinuekin, ez direla hazten. (…)Soilik 35 urte daramagu erabilera agresiboekin eta pinuen mozketa bakarra egin da orain arte. Zer pasako da bigarren mozketa egitean? Pinuak berriz haziko al dira? Edo lurra pobreegia izango da?”.
Euskal Herri osora begira jarririk, hiri inguruetako baratzeek eta oro har nekazarien soroek irentsiko lituzketen konpost mendiez gain, ezin dira ahaztu batik bat Araba eta Nafarroan (baina baita beste lurraldeetan ere) higadura latza nozitzen duten eremuak, jendeen elikadura beharrei bezala klimaren aldaketaren premiak sortutakoei erantzuteko noizbait landarez eta zuhaitzez hornitu beharko direnak. Gainerakoan, Euskal Herria haiek sortutako laborez elikatzen duten inguruko lautada desertifikatzen ari direnek ere pozarren hartuko lukete gure ongarria.
Mundu osoari begira jarririk, lurzoruaren higadura etorkizunari buruzko arazo larrienetako bat bihurtu da. Horretara eraman dugu basoak eraistearekin eta azken mendeko nekazaritza industrialaren desmasiekin. Pedologia den lurzoruaren zientzian aditu nagusietakoak diren Claude eta Lydia Bourguignonek diote “Le sol, la terre et les champs” klasikoan: “Gizakiok sortu dugun higadura are bortitzagoa da klima gogortu ahala. Horrela, Suedian erosio tasa zen hektarea eta urteko 4 tona lur galtzea; Espainian galera 33 tonakoa zen. Kopuruok ‘iraultza berdearen’ [nekazaritza industrialaren] aurretikoak ziren, 1970 baino lehenagokoak, geroztik arau bihurtu baita ongarri eta pestiziden gehiegizko erabilera. Lurzoru galera ere asko handitu da urteotan. Gaur urteko eta hektareako 10 tona lur galtzen du Suediak, 40 tona Frantziak, 60 Espainiak, 100 Magrebek”.
Nekazaritza industrialak ongarri sintetikoekin elikatzen ditu lur antzu bihurtutako soroak, urtetik urtera txute gogorragoak behar dituzten labore kimika-adiktoak haziz. Honetan ere, ordea, panorama are ilunagotzen duen berri txarrik ez da falta. Adituek piztu dute alarma: Nitrogenoak (N), Fosforoak (P) eta Potasioak (K) osatutako ongarri sintetikoen NPK hirutasun sainduan fosforoa laster urritzen hasiko dela.
Ez da alarma anekdotikoa. 2013ko udan, fosforoa ez alferrik galtzeaz Europar Batasunak abiatu duen galdeketa dela eta, ingurumen komisario Janez Potocnikek ohartarazi du fosforoa berrerabili beharraz, jakien hondakin organiko eta abereen simaur guztiak konpostatuz.
Etxean bakarka edo herri lurretan auzolanean hondakin organikoekin konposta egiten duten familiak gizarte osoaren aitzindariak dira honetan ere. Berek sortutako hondakinen %40 zabortegietatik eta errauskailuetatik apartatu eta merke bezain txukun berrerabiltzeaz gain, ondorengo belaunaldiek elikatzeko beharko duten lurra ari dira gozatzen. Basamortu bilakatzea saihesten.
Oraindik ere konpostatzea sustatzeko hitzaldian agertzen da norbait galdetzen duena: “Niri esan didate kozinatutako janariak ez direla bota behar konpost-ontzira”. Are bitxiagoa: Sakanan eta Gipuzkoan milaka familia ari direnean beren sukaldeetako organikoak oro konpost bihurtzen… Txingudiko mankomunitateak 2013ko herritarren artean sustatzen du konpostatzea adieraziz ontzietan ez dela utzi behar ez haragirik eta ez arrainik.
Norbaitek “Txerri-janaren gudua” deitu zuenaren ondorioak dira. 2010ean zenbait herritan konposta egiteko izena emanda zeukaten ehunka familiak hilabete luzez itxaron behar izan zuen Gipuzkoako Foru Aldundiaren eta San Marko mankomunitateko arduradunen arteko eztabaida noiz bideratuko zain. Konposta egiteko plastikozko ontziak Diputazioak zeuzkanez erosita, honek exijitzen zuen ontziok banatu aurreko ordu eta erdiko ikastaro laburra ere bere teknikariek ematea. San Markok ezetz, ikastaroa haiek emango zutela.
Banatu beharreko eskuliburuetan zetzan gakoa. 2010ean Atez Ateko bilketa sustatzen zuen San Markok aldarrikatzen zuen hondakin organikoaren atalean elikagai guztiak bildu behar zirela, frijitu eta egosiak barne. Hondakinentzako errauskailu handia eraiki nahi zuen Diputazioko zerbitzuak, aldiz, janari kozinatuak ez zirela horiekin nahastu behar, konpost-ontzira barazki gordinak eta hostoak besterik ez.
Demostraziorik behar ez zuena demostratu du geroztik milaka familiak, alegia elikagai organiko oro, gordin edo egosi, ondo bihurtzen dela ongarri, baldin eta prozesua arretaz egiten bada. Aldiz, eskuliburu bat erabili edo bestea, hondakinen kudeaketak emaitza txit ezberdinak dauzka. Etxeko hondakinei organiko guztia taxuz kenduz gero, gainerako atalak ondo bildu eta birziklatzen dira, errefusa hondakinen %20 baino gutxiagora murriztuz. Aldiz, organikoarekin ez baina gainerako hondakinekin nahastuta botatzen badira jaki kozinatuak, segitzen dugu zabor kutsagarria sortzen. Tamalez Txingudiraino ez da heldu albistea.
Argentinako Abokatuen Gremioa erakundean egiten du lan Laura Taffetanik (Buenos Aires, Argentina, 1963). Gobernuaren errepresioa pairatu duten maputxe ugarirekin lan egin du azken urteetan, eta Askapena antolakundeak antolatutako topaketa antiinperialisten barnean izan da Euskal... [+]
Iragarrita zegoen moduan, Bilboko Errekalde auzoko Etxarri II gaztetxea hustu du Ertzaintzak 9.00etan abiarazi duen operazioarekin. Arratsaldean protesta manifestazioa egingo dute auzoan, 19:00etan Amezolako tren geltokitik abiatuta.
Ezbeharra ostegunean gertatu da eta SOS Nafarroak 16:00 orduak jotzear zirela jaso du haren berri. Medikua, anbulantzia et Foruzaingoa bertarako dira, baina ezin izan dute gizona suspertu eta bertan hil da.
Aurtengo berritasuna da. Ahobizi eta belarriprest rolen artean aukeratzeaz gain, herritarrek Euskaraldia Hikan parte hartzeko aukera izango dute. Hitanoa erabiltzen ez den herrietan, toka eta noka, bien erabilera bultzatuko da, eta hitanoa bizirik dagoen herrietan nokaren... [+]
Interview. Urez eta hondarrez
Egileak: Telmo Irureta eta Mireia Gabilondo.
Aktoreak: Telmo Irureta eta Dorleta Urretabizkaia.
Zuzendaria: Mireia Gabilondo.
Konpainia: Tentazioa.
Noiz: apirilaren 2an.
Non: Victoria Eugenia Klub Aretoan,... [+]
Ezagutzen duzue Kneecap filma? Oscar sarietarako hautatu zuten. Belfasteko hirukote baten istorioa da. Kneecap Hip Hop talde ezaguna da gaur egun, eta hizkuntzaren aldeko jarrera (gaelikoa) argia dute, IRAren osteko belaunaldiaren gorabeherak kontatzen ditu filmak; drogak eta... [+]
Galdera batzuen aurrean, behin eta berriz helduok ume sentitzen garela dio Iñigo Martinezek, “bizitza zulo existentzialez beterik” dagoelako. Galderaz galdera "behin-behineko erantzunen bila" aritzeko asmoa du irakasle eta filosofoak. ARGIA... [+]
Euskal Herriko Laborantza Ganberak hogei urte bete ditu. 2005ean sorturik, bataila anitzetatik pasa da Ainiza-Monjoloseko erakundea. Epaiketak, sustengu kanpainak edota Lurramaren sortzea, gorabehera ainitz izan ditu hogei urtez.
Giza-katea antolatu du Subflubiala ez! plataformak eta hitzordua Artaza-Romo Institutuan jarri du gaurko 18:00etan. Bizkaiko Foru Aldundiak Ingurumen Inpaktuaren Adierazpena (IIA) aldatzea du helburu eta horrelakorik ez du onartzen plataformak.
Europan kutsadura maila aztertzen aritzen den Toxicowatch erakundeak egindako ikerketaren emaitzak dira. Erraustegia martxan jarri aurretik egin zituzten lehen azterketak, eta ondoren 2024ra arteko laginak aztertu dituzte. Iazko laginen emaitzak dira honakoak.
Elkarteko Andoni Burguetek nabarmendu du espetxean dauden presoek egindako delitu gehienek behar sozioekonomikoekin lotura dutela.
Gergely Gulyas Hungariako Presidentetza ministroak eman du erabakiaren berri, Hagako auzitegiak atxilotze agindua ezarrita dion Benjamin Netanyahu Israelgo lehen ministroa herrialdera heldu den egun berean. Israelgo armadak Gazako eremu gehiago hartzeko asmoa duela... [+]