2010eko ekainean sortu zen taldea, eta geroztik 18 aldiz aritu dira Euskal Herriko eszenatokietan. Urte hartan Alegian ospatu zen Musikaz Blai! festa aitzakia hartuta, 90eko hamarkadan herria astintzen zuen Ziklox Garaialde taldea gonbidatu zuten festaren arduradunek, berriz elkartu eta zuzenean jo zezan. Taldeak baietz, baina kontzertua jende gehiagorekin egitea gustatuko litzaiekeela. Herrian bazeuden gitarra, baxu eta bateria-jotzaileak, hiru musikari gaztek baiezkoa eman zieten eta orduan etorri zen ideia berritzailearen sorrera.

Zerbait berezia egin nahi zuten eta herritarren parte hartzea sustatu nahi zutenez, izena ematen zuen pertsona bakoitzak Ziklox Garaialderekin kontzertuan abesti bat kantatzea otu zitzaien. Zortzi pertsonak eskaini zuten euren burua abeslari moduan, pixkanaka herriko jendea animatuz joan da, eta gaur egun 30etik gora abeslari ditu taldeak, horren ondorioz autobusetan eta furgonetatan egiten dituzte asteburuetako bidaiak. Kontzertuetan txandatuz aritzen dira abeslariak, instrumentu-jotzaileak dira emanaldi guztietan oinarri moduan mantentzen diren bakarrak.

“Ni herriko Gaztetxearen 25. urteurreneko kontzertuan egon nintzen eta harrituta geratu nintzen. Pentsatu nuen, ‘a ze inbidia! Ni ere animatuko naiz, aizu!’”, dio urteurrenaz geroztik taldeko partaide den Zuhaitz Iglesiasek. Julen Goikoetxea bateria-jotzaileak dio hori dela bera gehien harritu duena, jendea hain erraz animatzea. Tabernan zerrenda jarri eta bi egunetan betetzen omen da. “Azken finean, bat animatuta beste bat animatzen da, eta horrela herritar asko elkartu dira, pilota berehala handitu da”. Adin-tartea ere harrigarria da, 18 urtetik 48 urtera bitarteko abeslariak elkartzen ditu taldeak, eta horrek herritarren arteko harremana indartu duela uste dute kideek. “Horren ondorioz kontzertuetan publiko moduan izaten dugun jendearen adin-tartea ere oso zabala izaten da. Gure seme-alabak ere gerturatzen dira, baita laster bilobak ere”, dio Txarli Gesteirak.

Ikusleen parte-hartzea sustatuz

Arratsaldetik joaten dira kontzertua izango duten herrira; beraz, gauerako lotura moduko bat sortzen da herritarren eta taldekideen artean, eta kontzertua nolakoa izango den jakinik, interesa pizten zaio jendeari. “Nik uste dut herrietaraino joan, abestu, eta itzultzeko soilik, ez genukeela hau egingo. Aurretik eta ondoren sortzen den harreman horregatik egiten dugu batez ere”, dio abeslarietako bat den Amaia Goikoetxeak.

Normalean herrietara joaten direnean jendeak oso ongi erantzuten du, kalean jakiten dute Alegiatik 30 lagun doazela eta ikustera azaltzen dira, jakin-min hutsez bada ere. Eurek eta ikusleek ondo pasatzea helburu hartuta egiten dituzte kontzertuak, “beraz, kalitatea ez da izugarria izaten baina oso ongi pasatzeko parada izaten dugu guztiok, guretzat hori da garrantzitsuena”, dio Julen Goikoetxeak. Gainera, publikoan dagoen jendea parte-hartzera animatzen dute eta erantzuna ona izaten da. “Festa bat izaten da, kontzertu bat da eta musika da, bai, baina batez ere festa da”, gaineratu du Gesteirak. Azken kontzertuetan eszenatoki azpian jendeari begira abestien zerrenda jartzen dute aldez aurretik zein abesti joko dituzten jakinarazteko eta gustatzen zaizkien kantetan geratzera animatzeko.

Harremana indartu asmoz, Internetera ere egin dute salto, wwww.manillar.es bloga sortuta, bertan kontzertuen berri ematen dute. Horrez gain, badute twitter kontua ere www.twitter.com/Manillares, azken urteetan sare sozialek duten garrantziak bultzatu omen ditu horretara.

Entseguak ere festarako aitzakia

Entsegu oso bereziak izaten dituzte Manillareseko partaideek. Abendura bitartean bakoitzak bere abestia ikasi behar duenez saio luzeak egiten dituzte, astean sei ordu inguru pasatzen dituzte, oinarrizko gauzak zehazteko. Hortik aurrera, urte osoan abeslari bakoitzak kanta bera kantatuko duenez, kontzertuaren aurreko astean geratzen dira abestiei azken ukituak emateko. Entseguetan ere publikoa izaten dute; Alegiako Kultur Etxean elkartzen dira eta herritarrak berehala hurbiltzen dira musika soinua entzuten dutenean. Jendearen txaloekin asko animatzen direla nabarmendu dute taldekideek.

Hori bai, gazteak animatzea falta zaiela uste dute, 18 urtetik gorakoak direlako guztiak, eta 16 urte ingurukoak ere elkartzea gustatuko litzaieke. “Honek horrela jarraituz gero, edozer pasa liteke” dio bateria-jotzaileak. Taldeak izan duen garapenean oinarritzen da hori azaltzeko, hasieran espero zuten kontzertu bakar horren ostean etorri diren 18ak, eta hasieran izena eman zuten zortzi abeslari horiek egun 30 direla kontutan izanik.