Hasieran erraz irabazten zenituzten ligak, orain, berriz...

Inoiz ez da erraza izan. Bestela zergatik ez du talde bakar batek ere guk lortu duguna lortu?

Orain esango didazu besteak kanpoko jendea hasi direla fitxatzen...

Bada, egia da azken urteotan atzerritar asko etorri direla, baina fitxa dezatela nahi dutena. Onenak Euskal Herrian gaudela dudarik ez daukat.

Tira, zuek ere fitxatu duzue inoiz gipuzkoarren bat...

Baten bat bai, eta falta direnak! Zer edo zergatik etorriko dira...

Dena den, neskak zarete Athleticek berriz gabarra ateratzeko aukera bakarra.

Jende askok zuk bezala pentsatuko du, baina nahiko erratuta zaudete. Ziur nago mutilek laster aterako dutela berriz.

Ez ote da lehenago herdoilduko!

Bai nesken, bai mutilen taldeei esker, Athleticen zaleek behintzat badute zerekin poztu. Athleticekoa izatea soilik bada pozik egoteko nahikoa arrazoi.

Aizu, sakrilegio handia da Kopa oraindik irabazi ez izana...

Horri ez nioke sakrilegio deituko, gehienbat monarkia ez zaidalako gustatzen.

Zure curriculumean dio Athleticera heldu zinela Leioatik 2002an. Leioa osoa heldu zen Athleticera 2002an.

Leioan geneukan onena talde osoa zelako: jokalariak, teknikariak, zuzendaritza. Hala ere, bizpahiru jokalari garrantzitsu fitxatu genituen.

Eta kasu etorkizunari: emakumeen futbolean ere, Barça eta Madrilen hegemonia aurki.

Ez dut uste, Madrili ez zaio emakumezkoen taldea interesatzen. Hala izango balitz ere, euskal taldeek ez genieke hegemonia lortzen utziko.

Atzelari guztiek duzue gogor fama, Athleticekoek zer esanik ez. Hainbesterako al da?

Badakizu, batzuek egiten dute lana, eta beste batzuentzat da fama.

Galderak erantzuten behintzat, finagoa zara.

Benetan nolakoa naizen jakin nahi izanez gero, etorri partidu bat ikustera!

Jokalari bizitza amaitzean, zer, entrenatzaile agian, neba bezala?

Neba bezala zaila izango da, erreferentziatzat daukat eta. Baina saiatu, saiatuko naiz...