Prentsa idatzia
Gaztezulo

Hamar urte daramatzate gazteen kezka eta interesen inguruko aldizkaria kaleratzen. Hasiera haietan lanari ilusio handiarekin, baina betiko legez, ezjakintasunez ekin ziotela oroitzen dute Gaztezuloko kideek. Urte berezia izan du aldizkariak hamargarren hau, eta saria urtea borobiltzeko gailurra izan dela diote. Euskal prentsari dagokionean, garrantzitsuena osasuntsu ikustea dela azaldu dute; horretarako gaur egun dauden komunikabideak ongi mantendu eta berriak sortzea izango litzateke onena.

Zenbait erakundek diru laguntzetan egindako murrizketa handiak ustekabean harrapatu du aldizkaria, horrek urtea aldrebestu eta gogorra bihurtu du, baina zorionez aurrera ateratzea lortu dute. Gaztezulok ondorengoa azaldu dio Argiari: “Gurea moduko hedabideentzat oso garrantzitsuak dira Foru Aldundia bezalako erakundeen laguntzak”. Gaztezuloko zuzendari Rafa Perezek dio Internet erabakigarria izango dela etorkizunean. Beste hamar urte barru Interneten euren presentzia handiagoa izan behar lukeela diote; dena den, aldizkariak sexuaz edo musikaz informazioa ematen jarraituko du.


Telebista
Orain

Artisten bizitza ezagutarazteko saioak, kultura jendearengana iristeko modu berria azaldu dio telebistari. Protagonista bakarrak herritar arruntak dira, eta aldi berean artista txikiak ere badira. Euren bizitzetako ekintza garrantzitsuen lan prozesuak grabatu eta esperientziaren berri ematea du helburu saioak. ETB3ko arduradun Iñako Gurrutxagak Argiari azaldu dionez, proiektua ikusi zutenean interesgarria iruditu zitzaien eta horren aldeko apustu argia egin zuten, telebistara produktu guztiz berritzailea eraman asmoz.

Egunero, goizaldeko 00:30ean emititzen duten 15 minutu inguruko saioa da Orain eta jendeak harrera ona egin dio. Kaleko jendea protagonista izateak ematen dio xarma; jende ezagunaz gain alternatiboaren egunerokotasunak ere tokia duela adierazi dio Argiari Debolex film ekoizpen-etxeko arduradun Natxo Eskobarrek: “Jendeak oso gauza interesgarriak egiten ditu eta horiek azaltzen saiatzen gara”.

Sortzaileek diote “Interneteko sare sozialetatik, atsegin dut fenomenotik” hartu zutela ideia. Interneteko feedback hori telebistara eraman nahi izan dute, alegia, jendearen erantzuna une berean lortzea.

Irratia
Ekaitz Perfektua

Astelehenetik ostegunera eta igandetan Euskadi Gaztean Fermin Etxegoienen gidaritzapean egiten den irratsaioa da Ekaitz Perfektua. Garai guztietako musikaz gozatzeko aukera eskaintzen du saioak eta gainera, irailaz geroztik igandetan saio monografikoak egiten jarraitzeaz gain, historiako 100 disko onenen zerrenda osatzen ari da Etxegoien: “Urtetan mugarri izan diren disko eta inpaktua eragin duten horien inguruan aritu naiz”. Euskal musikaz galdetzean, “super komunikazioaren” garaian bizi garen arren, sortzen den musika askoz modu isolatuagoan agertzen dela dio saioaren gidariak.

80ko hamarkadan herri musika modernoak, beste arlo askotan bezala, sekulako goraldia izan zuen; musika kalean pizten ari zen, gazte giro komunitarioari esker. Hori guztia denborarekin desegin egin da neurri handi batean eta musikarekin ere antzeko zerbait gertatu da. Etxegoienek ondorengoa dio egungo egoeraz: “Musika erabat arrunt bilakatu da eta musikaren zentzu kontrakulturala ere bigundu egin da”. Halere, bere burua identifikatzeko ispiluaren beharra duela eta, uste du jendeak euskal musikari inoiz ez diola bizkarrik emango. Bide horretan irratiaren laguntza garrantzitsua dela azpimarratu du Etxegoienek. Izan ere, irratiko errepikapenen poderioz, entzuleen gustuetan eta aukeretan eragiten da.

Internet
Ahotsak.com

2002. urtean sortu zen proiektuak Euskal Herriko ahozko ondarea eta herri hizkerak bildu eta hedatu nahi ditu. Horretarako, euskara betidanik erabili duen adineko jendea elkarrizketatzen ari dira. 2008an abian jarritako webguneak atal ugari ditu eta baita beste elkarte batzuetatik lortutako audioak ere. Baina gaur egun 2-4 minutu inguruko pasarteak dituzten bideoak dira funtsa. Etorkizunean era ezberdinetako edukiak gehitzeko asmoa dute.

Duela urte batzuk erakunde publikoek proiektuarekiko apustu garrantzitsua egin zuten. Lortutako diru laguntzek aurrera egin ahal izateko indarra eman dietela dio Aintzane Agirrebeña webguneko langileak: “Aurretik testigantza gutxiago lortzen genituen eta askoz mantsoago zihoan dena. Gure elkarrizketatuak 80 urtetik gorako euskaldunak direla kontuan hartuta presazko lana zen”. Elkarrizketatutako pertsonen komunikatzeko modu nagusia ahozkoa izan da, ahozkotasun horrek indarra galdu duela dirudi, eta komunikazio eredu hori berreskuratzeko eta testigantzak entzun, ikusi eta biltzeko sortutako webgunea da ahotsak.com.

Publizitatea
Nik ere euskaraz

Donostiako Euskararen Udal Patronatuak gazteen artean euskararen erabilera sustatzeko egin duen argazki mosaikoaren kanpaina da, webgunearen bitartez berarekiko atxikimendua adierazten duten pertsonen argazkiekin osaturikoa. Proiektua sortu zen unean iritzi kontrajarriak egon ziren; baikorrenek 5.000 parte hartzaile izatea espero zuten, eta ezkorrenek berriz, zenbaki hori urruti ikusten zuten. Emaitzek hasierako kopurua motz geratu zela erakutsi dute: 9.000 argazki igo dituzte, bakarkakoak, zein taldekakoak gehituta, 14.000 pertsona inguru izan dira gutxi gorabehera.

Hainbesteko inplikazioren sekretua erabakia jendearen esku uztea izan daitekeela dio Udal Patronatuak, Nik ere euskaraz izenak hori azaltzen baitu. Ez da inongo inposizioa, norbere nahia edo izaera azaltzen du eta: “Azken finean zuk erabakitzen duzula dirudi, hau da, jendearen esku uzten da erabakia eta agian hori erabakigarria izan da”. Hasierako booma pasa zen arren, webgunearekin jarraitzeko asmoa dute eta baita etorkizunean sentsibilizazio kanpaina gehiago egitekoa ere. Datozen ekimenez galdetzean honakoa azaldu diote Argiari: “Oraindik ez dakigu nondik joko dugun, baina horrelako harrera izatea da gustatuko litzaigukeena”.