Jonathan cook kazetaria da Nazareth herrian bizi dena. 1965ean sorturiko ingelesa, 2001etik bizi da Israel barruko palestinarren hiriburuan, free-lance moduan argitaratuz lanak munduko hedabide askotan. Liburu garrantzitsuak ere baditu plazaratuak, azkena Disappearing Palestine: Israel’s experiments in human despair (Palestina desagertaraztea: Israelen esperimentuak gizakien etsipenarekin).

Joan den abenduan Cookek sinatutako honako artikulua azaldu zen: “Jesus erreklutatu dute: God TVk Israeli laguntzen dio beduinoak menperatzen”. Kronika berari Alternet gunean honako izenburua ezarri diote: “Nola konbentzitu dituen God TV telebistak bere jarraitzaile ebanjelikoak Israelgo basamortuaren erdian milioi erdi zuhaitz landatzeko”.

Duela hamarkada gutxi kristau tradizionalistek judua etsaitzat zeukaten. Gure elizetan otoitz egiten zen Jainkoak judu zitalak bide onera bihur zitzan. Gaztelaniazko formula zen: “Por la conversión de los pérfidos judíos”. Orain, ordea, zital, desleial eta salduak musulmanak ei dira, eta kristau kontserbadoreak eskutik helduta dabiltza judu sionista gogorrenekin. Horren adibidea da Jonathan Cookek kontatu duena.

Israelen mugen barruan dagoen Negev basarmartuaren hiri nagusi Beershevatik kilometro gutxira honela dioen afitxa aurki daiteke bide bazterrean: “Jainkoaren Telebistaren Basoa. God TVren eskuzabaltasunari esker, milioi bat zuhaitz landare dago prest Israelgo lurretan aldatzeko eta Negeveraino ura eramateko bitartekoak ere bai”.

Opari horren laguntzaz dagoeneko landatu du milioi erdia baino gehiago Jewish National Fund erakundeak, Israelen basoak eta herri berriak –juduz osatuak, noski– sustatzen dituen nazioarteko erakunde sionistak.

God TV edo Jainkoaren Telebista kristau ebanjelikoek duela 15 urte sortu zuten Britainia Handian eta geroztik sekulako indarra hartu du. 2007an egoitza nagusia Jerusalemera eramanik, gaur munduan 500 milioi jenderengana iristen dela aldarrikatzen du. Satelite bidez barreiatzen du kristau ebanjelikoen mezua bost kontinenteetara.

Kristauok sinesten dute palestinarrei beren betiko lurrak kendu eta haietan juduak bizitzen jartzeak azkartu egingo duela Jesus bigarrenez munduratzeko egunaren etorrera. Nazaretheko Jesus profetaren bigarren etorrera azken aldian gero eta gehiago aipatzen den kontua da, XXI. mende hasierako krisi anizkoitzak erlijioen irakurketa apokaliptikoei loraldi berria ekarri dielako. Israelgo instituzioen eta kristau eliza ebangeliko batzuen arteko elkarlana bide beretik sendotu da.

Baina Beershevaren kasuan juduek zanpatu behar dituztenak ez dira palestinarrak, beduinoak baizik. Magreb eta Ekialde Hurbil osoan barrena kokaturik bizi dira Erdi Aroan Arabiar penintsulatik barreiatu ziren tribu beduinoak, duela gutxi arte basamortuetan eta abeltzaintzari emanak. Israelen ez dira 100.000 jendetara iristen... eta hala ere gehiegi dira, nonbait, Negeveko desertuan herri eta etxalde berriak eraikitzeko asmoak dituzten sionistentzako

Giristino sionistak

God TVaren sortzaile Rory Alec-ek bere jainkoaren deia jaso omen zuen Israelen inbertitu zezan: “Pranta ezazu lurra nire Semearen itzulerarako”. Alecek zorrotz kunplitu du agindua, martxan jarriz “Erein hazia Jainkoarentzako” kanpaina. Argudio eztabaidaezin bat dauka horretarako: “Nik esaten dizuet Jesus laister itzuliko dela!”. Milioika dira munduan hori sinetsita bizi direnak.

Arazoa da haziok erein eta landareok aldatzekotan, lur haietatik fueratu behar direla hamabost mende edo gehiago bertan daramaten artzain beduinoak. Horrela, Al-Arakib herrixka bederatzi aldiz birrindu dute polizia eta ofiziale israeldarrek, bertako 350 herritarrak bortxaz eramanez Rahat herri berrira.

Antzeko operazioak burutzen dituzte egunero agintari juduek, Negeveko herri txikietan bizi diren 90.000 beduinoen kontra. Hauek ahal bezala egiten diete aurre txikizioei. Jonathan Cookek esplikatu duenez, “beduinoek aurre egiten diete, kexu baitira haientzako eraiki diren auzo berriak hiri-erreserbak direla, ekonomia mailan bezala egitura sozialean gizarteak zokoratuta bizimodu tristea baizik eskaintzen ez dutenak”.

Negev Coexistence Forum erakundetik beduinoen eskubideen alde saiatzen den Haia Noach-ek esan dio kazetariari: “Al-Arakibeko jendeok ez dute alde egin nahi, herria askotan txikitu dieten arren. Baina agintariek landatzen badute basoa hemen, herritarrek ez dute itzultzeko aukerarik izanen”.

Bestalde, beduinoak ohartzen dira beren lurretan baso berriak landatzea lehen urratsa dela, ondoren datozela judu komunitateen auzo eta herri berriak, legez aitortuak ez izan arren Tel Aviveko gobernuak babestu eta sustatzen dituenak.

Gaia Israelgo auzitegietan ere badago. Beduinoek eta beren aldekoek lortu nahi dute alde batetik beren herrixkekin egiten duten txikizioa geldiaraztea, eta bestetik azken urteotan sortu diren bizileku ilegalak batera edo bestera legeztatzea.

Beduino gazte asko sortu da haien gurasoak bortxaz eramanda sartu zituzten auzoetan. Eta hauetan bizimodu duina eduki ezin delakoan, asko berriro itzuli dira gurasoen lurretara. Eraikuntza ilegalak egin dituzten juduen alderantziz, beduinook oso zail daukate berenak legeztatzea.

Palestinarrei egunero egiten zaien lur ebasketak komunikabideetan oihartzun handirik izaten ez badu, beduinoen kontrako erasoez kasik ez da iristen informaziorik. Jonathan Cookena bezalako artikulu batekin gaiari hari-muturra aurkitu eta Interneten galdezka hasiz gero, orduan bai irakur daitezke albisteak. Bedouin-Jewish Justice in Israel gunean, adibidez, judu moderatuak saiatzen dira herritarron eskubideak defenditzen, auzitegietan bezala kalean defendituz eta informazioa zabalduz.

Aurrez aurre dauzkate Israelgo estatuaren aparatuak, mundu mailako judu erakunde nagusiak, eta hori guztia gutxi balitz, orain munduko kristau fundamentalistak. God TV katean ari direnak bezalako ebanjelikoak omen dira gogorrenetakoak beduinoekin eta batik bat palestinarrekin juduek inolako konponketarik lortu ez dezaten.

AEBetan Christians United for Israel (CUFI) erakundea lobbygintzan ari da Israelen alde. Ez dio axola CIFI fundatu zuen John Hagee artzainak duela hamabost urte esan bazuen Hitlerrek Jainkoari lan zikina egin ziola, zeharka juduak Israela bideratu zituelako. Berdin dio, baldin eta urtean milaka turista kristau eramaten baldin baditu Lurralde Saindura. Sionismo kristaua ere bada.