Beharbada zuek ere ikusiko zenuten Fuck Off erraldoia Londreseko Harrod’s merkatalgunerik komertzialenean, eraikinak besteko garaiera zuten letretan idatzia. Prentsan agertu ziren ekintza zuzenaren irudiak. Eguberri garaia, ikustekoa zen merkatal zentroaren argiteria, bertatik mezu txolinen bat igortzeko prest: Merry Christmas, Happy 2011... antzeko zerbait. Bertako langile ohi batek ordea, mendeku hartzea lortu zuen: kontrol aretoa barrutik itxi eta 10.000 bonbilatxoek osatzen zuten mezua nahierara aldatu zuen: Fuck Off, izorra zaitezte, zoazte denok pikutara.

Gosaritan ikusi nuen argazkia, sareko prentsari ohiko errepasoa ematen ari. Kafearekikoak egin eta irri gaixto bat erne zitzaidan, hitzekin adierazi beharko banu “Onnna!” esan nahiko lukeena, gutxienez hiru n-rekin. Bai, Fuck Off! Paris eta Madrilgo iturriko urak berdez tindatzea baino ekintza eraginkorragoa, inondik ere. Gutako norbaiti Gran Víako Schweppeseko iragarki sonatuan halakorik idaztea otu izan balitzaio? Santiago Segura bertatik zintzilikatzea baino deigarriagoa litzateke, benetako Diadelabestia: sutan jarriko lirateke Moncloako piztia denak. Baina betikoa, sofaren erosotasunetik erraza da esatea. Fuck Off, hasteko halakorik egiteko ausardiarik ez dugun koldarroi.

Afera da albisteak hausnarrerako bazka eman zidala. Kafeinak mailegatzen digun irudimen gehiagarri hori alde nuen, beraz laster nintzen eldarnio bizian. “Zenbat langabetu dauzkagu?” –egin nuen nire baitarako–. “Gutxi ez”, erantzun gure aitak, zehaztasun harrigarriz. Bada, horiekin guztiekin gogoratu nintzen, eta oldoztu beharbada hamarkada abiatzeko ez litzatekeela iraultza molde txarra izango: bakoitzak zinpeko zaintzaile bat bost minutuz bahitu eta “gure” makrosaltokietan Fuck Off! erraldoiak idaztea, ohiko lelo digitalak ezabatuta.

Laster pasa zitzaizkidan, baina, momentuko ameskeriak zein kafeinaren ondorioak. Cantonáren porrotaz gogoratu nintzen. Eta ondoren bisitatu nituen webguneetan iragarki piloa zabaldu zitzaizkidan, pantaila osora zabaldu ere: Papá Noel eta bere ho-ho-ho gogaikarria ez bazen, Olentzero agertzen zitzaidan, BBKren logotipoa zakuan... Fuck Off, Fuck Off eta Fuck Off.
Laburbilduz: oldarkor xamar ekin diodala urteari, horrek zer esan nahi duen oso ondo ez badakit ere. Ea eusten diodan. Bai, badakit esperantzarako orena dena, ortzemugak ditugula begietan eta abar... Baina erreserban osti-txar apur bat gordetzea ez zait gaizki etorriko. Pasa den urtea luze joan da eta honek ere antzeko egunak dauzkala diotso bankuko egutegiak.