Hamabost urte Urruña eta Goierriko ikastolen arteko harremana sortu zela, Urruñan ikastola berria eraikitzeko. Hamabost urte ekipa osoak lan eta lan aritzen direla, laguntza ederra ekartzen zaiola ikastolako ibilmoldeari, ekintzak antolatzen direla haurrekin.

Gehienetan Hazia elkarteak Herriko Etxearen aldetik trabak eta zailtasunak ezagutu ditu, kantaldiaren errezibitzeko. Urtero tira-birak gainditu behar izan dira euskal kultura eta ikastolak ez baitira ulertuak izan hautetsi mundu hertsi horretan.
Haatik, ikastola handitzen doa, txikia gelditu da. Hautetsi nagusiek euskararen aldeko hitz handiak erabiltzen dituzte, erabat aldekoak direla! Alta, errealitatea bestelakoa da. Paskal Indo bera, Parisko arduradunekin bildu ondoren itzuli zaigu berriarekin, irakasle postuak kentzeko bidean daudela Hezkunde Nazionaletik. Horrek beharretan utziko gaitu, ikastolen eraikitzeko, irakasleen ordaintzeko, haurrentzako ekintza dinamikaren bultzatzeko, euskararen indartzeko ikastolan.

Horretan gaude, ikastolen laguntzeko lana ez da gelditzen. Hor dago, hain era naturalean askotan anitzek ez dutela ikusten ere! Laguntza gehiago eskertuko litzatekeela ere beharrak ez baitira txikitu, botere publikoek ez baikaituzte laguntzen euskararen egoeraren heinaren araberako neurriekin. Bai, ikastolek laguntza behar dute gure haurren geroa euskalduna izan dadin, gure haurrek beren geroa euskaraz izanen dela erabaki dezaten. Erakutsi behar diegu bide ona dela, gustura eramaten dugula euskaldunak izaten jarraitu nahi dugulako, euskararen mundua gurea delako eta maite dugulako.

Hazia elkarteak Goierriko ikastolarekin antolatutako kantaldia paregabea izan da, hor ikusi baititugu euskararekiko konpromisoa aspalditik hartu dutenak eta bihotzez daramatenak. Benito ikusi dugu, Benito urte luzeetan egoera latzak ere jasangarriagoak izaten lagundu diguna, hor ere emozioak azalarazi dizkigu; harekin bere musikari guztiek! Urruñako publikoa irabazi du eta herritarrak ikastolarengana hurbildu. Beñat, gure “artista” kantaldi honen bultzatzaile nekaezina, beste askoren ondoan. Denak tokikoak, itzalean ari direnak, ikastolaren alde, geroa hortik iraganen baita.
Bukatzeko Pirritx, Porrotx eta Marimotots, urte guztian bizitza alaitzen digutenak eta urtarrilaren 2an bi emanaldi eskainiko dituztenak gure ikastolen alde.

Euskararen munduak asko ematen digu eta horrela jarraituko du, hau baita bidea, elkarlana eta gehienetan musu-truk edo ia-ia. Hau da bidea, loturak sortzen dituena, kentzen ahal ez digutena, gure haurrei poza, plazerra ematen diena.