ANOETAKO PROPOSAMENA dela eta, Arnaldo Otegi, Joseba Permach eta Joseba Alvarez epaituko dituzte ostegunean Espainiako Auzitegi Nazionalean. Egun berean, Eusko Jaurlaritzak biktimen memoria omenduko du, Espainiako Estatuaren ehunka biktima bazterrean utzita. Aste honetan ekin dio Lopez lehendakariak –ezker abertzalea kanpoan utziz– bake prozesuaz jarduteko alderdien errondari.

Aste honetan, halaber, Brian Currinek ETArekin hitz egingo duen nazioarteko boskotearen zeregina azalduko dio euskal gizarteari, argi utziz ez dela erakunde armatuarekin bilduko honek Bruselako Adierazpenari baietza eman arte. Bitartean, PSE-PPren gobernu itunaren jarraipen batzordeak ezker abertzalea eta PSE-EEren arteko bileren ika-mikaz jardungo du, Jesus Egigurenen bidea pertsonalizatuz eta gutxietsiz, baina sozialista eta ezker abertzalekoen kontaktuen ateak ezin itxiz.


2004ko azaroan aurkeztu zuen Batasunak Anoetako Proposamena eta han irudikatu zen lehenbiziz zerbait berria egosten ari zela ezker abertzalean. Aurrera begira bide soilik politikoak erabili behar zirela azpimarratzeaz gain, ENAMek lehenbiziz onartzen zuen negoziaketa batean gai politikoak alderdien mahaian ebatsiko zirela eta ETAk eta Gobernuak gai “teknikoez” jardungo zutela, hau da, nagusiki preso, errefuxiatu, arma eta gisakoez. Gero Loiolako prozesuan eskema ez zen bete, baina hazia ereinda zegoen.

ANOETAKOAREN ONDOREN, zalaparta handia eragin zuen ETAren 106. Zutabe-k. Bertan, beste gauza askoren artean, erakunde armatuak segurtasun indarren aurkako mehatxuak berresten zituen eta zerga iraultzailea ordaintzen ez zutenei ere mezu bera luzatzen zien. Bere edukian argi ikusten zen Belodromoko ekitaldia baino lehenago idatzia zegoela, baina Espainiako hedabide zenbaitek azpimarratu zuen ETAk Batasunaren ekimena baliogabetu nahi zuela horrekin.

Zelanbait, ekitaldiak gizartean eta alderdien aldetik izandako harrera ona desegin gura zen, zer eta gutxi gorabehera adieraziz Batasunak bakea nahi zuela, baina ETAk ez, eta honek gauzak bere lekuan jartzen zituela Zutabe harekin. Gaur egun, orduan Batasunaren eta ETAren nahiak oso garbi bereizten zituztenek, Otegi ETAren aginduetara ari zela azpimarratzen dute Auzitegi Nazionaleko epaiketan.

Jesus Egiguren eta Arnaldo Otegiren elkarrizketak giltzarri izan ziren Anoetako Proposamenera iristeko eta esperantza handiarekin hartu ziren euskal gizartean, horren adibide ugari dira hemeroteketan. Patxi Lopez berak ere, nahikoa ez zela adierazi zuen, baina urratsa zela onartuz; Jose Luis Rodriguez Zapaterok geroan ibili ahal izateko zirrikituaren ideia azpimarratu zuen. Egun Patxi Lopezen Gobernuaren sailburu den Gemma Zabaletak orduan Argiari adierazitakoak laburbiltzen du orduan Belodromokoari egin zitzaion harreraren giroaz: “Nik ere Anoetako proposa-
menaren alde egiten dut”.

PATXI LOPEZEN GOBERNUAK ordu zailak bizi ditu, PPren presioa eta Madrilen PSOE ematen ari den urratsen artean kateatua. Bi norabideko urratsak Ferrazekoak: batetik, EAJrekin lotutako akordioak eta, bestetik, ezker abertzalearekin zeharka daramatzan ustezko kontaktuak.

EAJren babesari esker, 2012ra arteko arnasa lortu du Zapaterok eta tarte horretan bake prozesuan bideratu beharreko urratsak ondo doitzeko denbora hartu, jakinik gai hau giltzarri izan litekeela inkesten norabidea aldatzeko. Ez dirudi alor ekonomikoak asko lagunduko dionik, eta bake prozesua dela eta, PPren presioa ere itogarria bihur liteke. 2006ko esperientzia hor dago. Baina asmatuz gero eta 2012rako ETA jadanik ez dela jardun armatura itzuliko garbi bistaratzen bada, Raxoi garaitzeko zirrikitu bat zabalik geratuko zaio.

PSOEk edozein modutan izango du gaitza 2012an, baina Espainiako gobernuburuak nekez ahaztuko ditu 2004an Moncloa zapaldu aurreko egunak. Inork ez duen txakur handirik emango bere alde, baina Aznarrek 11-Mko atentatuez egindako kudeaketa baldarrak gobernuko lehendakaritzan jarri zuen. Historia ez dela errepikatzen diote, baina badaezpada...