Udaberria lanpetua heldu zaigu. EH Bairen kanpaina abian dugu, ezkerreko alderdi politiko abertzaleak ados jarri baitira Akitaniako hauteskundeetan, hautetsirik lortzeko aukera baztertu badute ere. Zertarako aurkeztu, gisa guztiz hautetsirik ez bada lortzen? Horra betiko galdera. Funtsik gabekoa, argi baita Frantziako Gobernuak prestatu dituen Estatuko erreformetan ez diela herritarrei politikan eragiteko aukerarik eman nahi. Xede horretan, instituzioak herritarrengandik urruntzen ditu eta euskaldunon kasuan, instituzioetan itoak, ezabatuak izateko arrisku larrian gaude. Ondorioz, hitza emateko aukera guztiak hartu behar ditugu, gure burua erakutsi eta demokraziaren zapaltze urrats guztiak salatu.

Azken urteetako lanari Estatuak inongo begirunerik izan ez dionik, bi kontsulta antolatuko dira hauteskunde ofizialen ondoan. AHTri buruzkoa eta Batera plataformak euskal instituzioari buruzko iritziaren galdeketa. Horrek militanteen sekulako elkarlana eskatzen du, zainketa zorrotza beharko baita emaitzak seriosak izan daitezen. Abertzale guztien elkarlana eta laguntza beharko dituzte bi kontsulta horiek. Erran nahi baita, AB, Batasuna, EA eta EAJko militanteak horretan ariko direla. Hau baikorra da, orain arte EAJ erraxago ikusi baitugu loturak egiten eskuineko frantses alderdiekin ezker abertzalearekin baino. Alderdietatik kanpo dauden  abertzaleentzat ere berri ona da, askok elkarlan hori aldarrikatzen baitute.

Politika orainaren kudeaketa omen da. Segur da oraina okupatua dugula eta borondate guztien laguntza eskatzen duela une honek. Horrek balio du erakusteko proposamenak egiten dituztenak abertzaleak direla eta gure proiektuak aitzina eramateko elkartu behar dugula. Balladur-en erreformak mapatik ezabatu nahi gaitu, Frantziako Estatuaren proiektuetan tokirik ez baita euskaldunentzat. Adibidez, departamenduan aurkezten den Alain Lamassoure Sohütako ikastolara joan da harro-harro prentsarekin, euskararekiko duen interesa erakusteko. UMPrekin aurkezten da Lamassoure Euskal Herrian. Frantsesa Estatuko hizkuntza bakar bezala bozkarazi zuena Toubon legearen bitartez.  Europan euskal gatazkaren bukaerako mozioaren aurka ere bozkatu zuena! Desagertzea, Frantziako Estatuak ez digu beste gerorik proposatzen. Berdin zaio Lamassoureri. Jendeak ahanzten baitu eta politikari mota horrek ez du lotsarik.

Euskaldunen artean, Euskal Herriaz pentsatzen hasi behar dugu politikan. Independentziarako bidea da gure aukera.