Dani Blanco
Kontraera harrapatu nau idazteko gonbitak, gogorik gabe, nire gogo falta baino ez balitz! Nik uste halaxe sentitzen garela, okerreko hanka aurrean dugula eta pausoa ezin zuzendurik, gure Euskal Herri anormal hau normaltasun bidean ikusi nahi genukeen independentista euskaltzaleok.
Ander Iturriotzek dioen bezala, era adierazgarrian, egun ETA estatuaren edo bi estatuen joko zikin antidemokratiko guztia garbitzen duen makina bat da, tresna ezin hobea demokrazia hitz iruzurtiaz beren buruak jazteko, eta beraz haiei interesatzen zaie gutxienik erakunde gaizki armatua desagertzea.
Hego Euskal Herriko erakunde politikoetara begira jartzen bagara, hautetsi abertzaleak begira ikusten ditugu, alderdi espainolistek zer egingo, baietz PPk gobernatu EAEn ere Nafarroan bezalatsu, ehun eguneko konfiantza behintzat eman egin beharko zaio gobernu berriari; gainera orain lehentasuna krisi globalari ematen zaion tokiko erantzunak du... Alderdien Legea indargabetzeko estrategia, presoen afera, politika espainolista era bateratuan deslegitimatzeko mugimenduak, ez du ematen horiek lehentasun dituztenik, eta horiek aintzat hartu gabe, abertzaleak espainolismoaren eztialdiaren ikusle zozo bihurtzeko peril handitan.
Friboloegia izango naiz, baina krisiarena nago etorri zaigun bezala joango zaigula. Baliabideez ahulenei kalte handia eginik, baina oharkabean etorri zaigun bezala, joan ere antzera egingo zaigu, hemengo erakundeen eragina erabakigarri gertatu barik, hortxe nonbait.
Eta beti lehentasuna bestek du: krisiak, Europak, ez gure arazo nazionalak, ez gure hizkuntzak ere. Beti kontraera. EAEko gobernu berriko lau kontseilarik euskaraz egin dute zin beren kargua, eta batek euskaraz eta erdaraz. Horrek zer esan nahi du bost kontseilari horiek oso aintzat hartzen dutela euskara eta beren ardurapeko sailetan euskarari lehentasuna emango diotela edo gutxienez bi hizkuntzak berdin tratatuko dituztela ala itxura egin nahi dutela, herritarrek euskararen aurkakotzat jo ez ditzaten? Aurrekoek ere euskararen kontuan itxura eta hipokresiatik gehiago zuten, eta hauek gutxiago izango dira itxurakerian eta hipokresian?
Gu Lizarra-Garazi garaian sentitu ginen erara, eta hara itzuli nahi, jakina. Baina orain krisia gainditzea da garrantzizkoena, eta Europako hauteskundeak gainean ditugu. Espainolismoa eztitan, alderdi abertzaleak noraezean, eta herritarrok nekeak, axolagabeziak eta aisenahiak jota, gure Euskal Herri gutxi euskaldun eta gutxi burujabean. Kontraera!