Ezetz, ez dela hemen iraultza demokratikorik egon, espainiar konstituzionalismoak hedabideetan behin eta berriz agertzen duen bezala; dagoen gobernu aldaketa ez dela oinarritzen gizarte aldaketa eta errealitate berri baten guraritik, errealitatea desitsuratzeko egindako amarrukeria politikotik baizik (eta zeharka bada ere, abertzaletasunak akordioetara iristeko duen ezintasunetik ere bai). PSE-EEk eta PPk botuen %43 dute, abertzale bozkatu zutenek botuen %57 (baliogabetuak barne). Ez ditut irakurleak jadanik ezagutzen dituen argudioak errepikatuko, baina berriz ere argi uztea komeni da. Gera dadila argi idatzia, etorkizunean historiaren interpretazioak bestelako ikuspegi zirrikituak ere izan ditzan. Iñaki Egaña historialariak berriki idatzitako artikulu batean dioen moduan, “dagoeneko begi bistakoa ezkutatzen bada, zer gertatuko da bi hamarkada geroago historialaria legealdi honen hastapena interpretatzen hasten denean?”.

“Biolentziaren atzean dagoen ideologia” deslegitimatuko dela dio PSE-EEko lehendakari Jesus Egigurenek, gobernu berriaren berrikuntza nagusi gisa. Eta ez zait bururatzen zein ideologiari egiten dion erreferentzia, ideologia abertzaleari ez bada. ETAren totalitarismoaz ere asko hitz egiten da, eta hori ote den ere pentsatu dut, baina hori ez da berez ideologia bat eta baztertu dut. “Biolentziaren atzean” dagoena borrokatu, “biolentziaren munduari” aurre egiteko. Alderdien Legeak ekarritako ezker abertzalearen zukutzearen areagotzeaz ari dela pentsa liteke, baina oraingoan legez kanpoko ezker abertzaleaz gain, beste erakunde batzuk ere ukitzeko, EITB bera esate baterako. Adibidez, tertulietatik Batasunaren munduko iritziak ezabatzen badira, pertsona eta ikuspegi politiko hori kolpatzeaz gain, medioa bera kolpatzen baita.

Iruñeko liburutegietan Gara eta Berria ez hartzeko Yolanda Barcinak emandako agindua ere, finean, deslegitimazioaren upel horretatik hartutako erabakia da. Ekonomia krisiaren argudioa ezin da baldarragoa izan: ez dago sosik, beraz, Nafarroako eta Estatuko komunikabide garrantzitsuenak bakarrik hartuko dira. Krisiak aurrera jarraituko duela ezagun da eta honen aurrean protekzionismoak indartzeko joera duela ere bai. Ez litzateke harritzekoa, beraz, laster Nafarroako liburuak bakarrik erosiko direla iragartzea.

Zorionez, liburutegietako arduradunek protesta egin dute, erabakia liburuen munduak babestu behar duen pluralismoaren aurkako neurritzat joz. Sarko-k 600 milioi euro bideratuko ditu Frantzian krisian dagoen prentsa mundua laguntzeko. Besteak beste, 18 urte egiten duten gazteei urtebetez Frantziako edozein egunkariren harpidetza ordainduko die bere Gobernuak. Nafarroako euskarazko komunikabideentzat 9.000 euroko –ez da zerorik falta– dirulaguntza dago bideratua Nafarroako Gobernutik. Korrika ospatzeko antolatu nahi zen festa ere debekatu egin zuen iragan larunbatean Iruñeko Udalak. Nagusitasun erabatekoak (UPN-PSN) ematen duen baldarkeria osoz. Hauek argi dute biolentziaren atzean dagoen ideologia zein den. EAEn ikusi behar orain.