Nafarroako Aurrezki Kutxaren, CANen, bulego bat aurten ikusten duena harritu egingo da. Ez dauka zerikusirik gainerako bankuek oraindik ere eusten dioten finantza bulegoaren ereduarekin. CANen bulego berriotan nahasturik aurkituko ditugu ume batzuk jolasean, gazte bat Interneten, jubilaturen bat egunkariak irakurtzen edo kafea doan hartzen, musikari bat abesten… Dena doan, hainbat bezerok bankuko gorabeherak egiten dituzten bitartean. “Iraultza” da, publizitatean bertan eurek dioten moduan. Finantza negozioa egiteko era berria da eta, banketxe nafarrak ematen dituen datuen arabera, emaitza ekonomikoak ederki hobetu ditu. Bulego horiek Cancha izena dute.

Canchak gainerako erakundeetako bulegoen aldean beste era batera daude diseinatuta. Barruan altzariek ludotekaren antza daukate banku bulegoarena baino. Leku zabalagoak, atseginagoak eta informalagoak dira eta merkataritza jarduerak jendearentzako ordutegian programatzen diren ekintza ludiko-kulturalekin nahasten dira. Canchatan sartzeko ez da bezero izan behar, ezta finantza-konturik egin behar ere. Ez dago leku finkorik, ezta Kutxako zatian ere, eta bulegoko langileak hara sartu direnak aisialdi edo kultura-ekintzetarako partean ere hartuko ditu. Bulego berriaren zati nagusian mahai txikiak daude, umeentzako liburu eta margoekin, haurrek jolasteko, Interneterako sarbide batzuk eta eguneko prentsa, baita doako kafea ere.

2010erako bulego guztiak ancha izango dira

CANek %50 azkartu eta handitu du hedapenerako plana. 2008 amaierarako 437 Canchatara heltzeko asmoa dute. Horietatik %60 Nafarroatik kanpora egongo dira. 2008 amaierarako, CAN orain arte egon ez den lekuetan ezarriko da. Zehatzago, 14 Cancha irekiko ditu Levanten, bost Asturiasen, hiru Andaluzian eta hiru Galizian. Eremu geografiko berrietan irekitzeaz gainera, CAN hazi egingo da dagoeneko badagoen lekuetan. EAEn adibidez, 78ra helduko dira; Madrilen zazpi Cancha berri egongo dira, 63 guztira; Katalunian 14 berri izango dira, guztira 43 izateko; Aragoin beste bostekin 20 izango dira, eta Errioxan bat gehiago, 17 guztira. Horrez gain, Nafarroako Kutxak hiru bulego dauzka Guadalajaran, bi Burgosen eta bat Valladoliden.

Canchak 2006ko irailean hasi ziren irekitzen, beraz, urtebete baino gehiagoko bizia eta esperientzia daukate dagoeneko. Arduradunak pozik daude bulegoen kudeaketa eredu berriarekin, eta “gizarte bankuaren” estilo berria dela diote, eurak aitzindari direla. Emaitza ekonomikoen ikuspegitik, CANek esperientzia eta negozio ona izan dela uste du. Lehenengo sei hilabeteetan, negozioa %52 igo duela dio CANek, bulegoen eredu berria hedatzean. Negozioa, gaineratzen dutenez, oso orekatua izan da administratutako baliabideen eta kredituen artean, azken horiek bolumen osoaren %55 dira eta.

Vialogos sarearen ostean,Cantera plana

CAN beti izan da aitzindaria negozioa egiteko modu berrietan. Espainiar Estatuko Aurrezki Kutxen Vialogos sarea sortzeko bultzatzailea izan zen. Aurten, 2007an, 2007-2010 urteetarako Cantera izeneko plan estrategikoarekin hasi du urtea. Plan horrek 600 milioi euroko inbertsioa dakar, eta bulego guztiak bezeroaren kudeaketaren ardatz bihurtu ditu: “Zeuk aukeratzen duzu, zeuk erabakiko duzu” programa. Ekimen berria da, hau ere aitzindaria. Horren bidez 450.000 bezerok Gizarte Ekintzarako gastua zertara bideratu aukeratu ahal izan dute, eta 290.000 bezerok 1.300 proposamenen artean programa jakin bat aukeratu ahal izan dute.

Nazioarteko hedapena

Bost bulegoko sarea du Londres, New Jersey, Errumania, Txekiar Errepublika eta Polonian, inbertsioen sustapen eta aholkularitzarako VialEste eta VialAmerica elkarteek bideratua. Hungariako HBW Express erosteko aukera ere sinatu du. Horrez gain, Wachovia Bankek CANeko bazkide diren enpresen eskura jartzen ditu Estatu Batuetan dituen 3.100 bulegoak. Halaber, CECAk Paris, Brusela, Frankfurt eta Ginebran dituen bulegoetan lan egiten du banku nafarrak. Enpresei nazioartean zabaltzen laguntzen dien sarearen bidez ere eskaintzen ditu zerbitzuak. Sare hori 2.300 korrespontsaliak osatzen dute eta 110 herrialdetara iristen da. Gainera, Asiako inportazioetarako dokumentu- kredituak egiten dituen elkartea du eratua Hong Kongen.