Datu estatistiko eta makroekonomikoek benetako egoera sozioekonomikoa ezkutatzen dute beti. Espainiako Estatuko presidenteak esan du Espainiako ekonomia munduko lehenengo postuetan dagoela eta %3,7 hazten segiko duela. Euskal Autonomia Erkidegoko eta Nafarroako Gobernuek segurtatu dute bertako ekonomiek hazten jarraituko dutela, Espainiakoa baino gehiago ere bai. Ez digute esan ordea, soldatek ia ez dutela gora egin eta erosketa-saskiak gora eta gora egiten duela. Enplegua prekarioa da. Etxebizitza izugarri garestia. Hipotekak gazteak hiltzen ditu. Hamarnaka mila pentsiodun hala moduz bizi da... Diotenez, euskaldunen pentsioen batez bestekoa 838,85 eurokoa da, nahiz eta milaka asko diren hori baino askoz gehiago irabazten dutenak, 2.600 eurora arte, eta beste milaka asko dira batez bestekoa baino gutxiago jasotzen dutenak, 338,84 eta 606,06 euro artean. Batez besteko soldata 900 euroren inguruan ibiliko da, nahiz eta hamarnaka mila lagun diren gutxieneko soldatara (570,6 euro) iristen ez direnak edo 1.000 eurora heltzen ez direnak. Beste askok 1.000 eurotik gora irabazten dute. Enpresariak eta bankariak albo batera utzita, horietako batzuk dira gure zergekin ordaintzen diegun politikariak. Hegoaldeko alkate eta lau hiriburutako diputatu batzuk 7.000 eurotik gora ere irabazten dute hilero. Esate baterako, Bilboko alkate Iñaki Azkunak 92.873 euro gordin jasotzen ditu urtean eta Gipuzkoako ahaldun nagusi Markel Olanok 97.861 euro.

Horrela, datu makroekonomikoak eta estatistikoak azaltzea egoera sozioekonomikoa manipulatzea da.