Bilboko Metropoliko Lurralde Planaren eta Gernikako eta Markinako eskualdeen hedatze planaren arabera, Bizkaiko itsasertzean 38.000 etxebizitza eraikitzea aurreikusita dago datozen zortzi urteetan, batik bat Getxon eta Bakion. Bizkaiko itsasertzeko udalek, horretarako, urbanismo planak aldatu egin beharko dituzte. Dirudienez, erakunde publikoek urbanizazioak egiteari utzi eta etxebizitza blokeen guneak eraiki nahi dituzte.

Ildo horretan, deigarria da lehengo eta oraingo eragiketen inguruko espekulazio beldurrak eta susmoak EAJren gertuko eta berezko instantziek zabaldu dituztela. Eta deigarria da, hain zuzen EAJ delako Eusko Jaurlaritzan agintean dagoen alderdia, eta horretaz gain, alderdi horrek kontrolatzen dituelako Bizkaiko eta Gipuzkoako Aldundiak, eta orobat obrak egiten ari diren udal asko.

Irakurleak nahi duen eran epaitu dezan, erreportaje honetan hitzez hitz jasoko ditugu prentsan oro har eta nazionalisten sektore kritikoaren hurbileko web orri batean argitaratu diren beldur eta susmo horien zenbait adibide. Nori edo nortzuei buruz ari dira hedabide horien bidez jendaurrean zabaldu diren beldurrak eta susmoak? Etorkizuneko zenbait hirigintza lanen aurretik egindako eragiketa batzuetan, zenbait pertsonaren izenak ere eman dituzte jakitera. Beste batzuetan, berriz, iradoki egin dituzte. Epai ditzala irakurleak.

Fertiberia, Iurbentia, Befesa

Izaro News web orrialdeak, EAJren alde kritikoaren hurbilekoak, hirigintza arloko ustezko zenbait espekulazio eta ustelkeria kasu azaleratu ditu, eta EAJren zenbait kide horietan nahasita daudela jakinarazi du. Ildo horretan, web orri horrek jakinarazi zuen “Fertiberiaren hirigintza-zartada Barakaldon” izeneko kasuan, José Olazaran “EAJren EBBren burukide ohiak” parte hartu zuela, Fertiberiaren lursailak erosi zituen eraikuntza-enpresaren aholkulari gisa. “Olazaran EAJren zuzendaritzatik kaleratu zuten negozioetan eta jardun politikoan ari zelako; ez dakigu jardun politikoan baino negozioetan aritzen zen gehiago, ezta politika negozioetarako baliatzen zuen ere”. Hala jakinarazi zuen Juan de Etxanok, web orrialde horretan idatzi ohi duen idazleak.

Enpresa horrek, lehen Sefanitro zenak, 1996. urtean erosi zituen lursailak, 1,5 milioi euroren truke. 1999an Barakaldoko udalak birkalifikatu egin zituen. Hirigintza-enpresen talde batek eskuratu du lursaila eta 240 milioi euroren truke 2.000 etxebizitza eraikiko ditu. Hirigintza arloko talde hori “Iurbentia Propiedad Inmobiliaria SA” da, eta hain zuzen lehen aipaturiko EAJren burukide ohia talde horretako aholkularietako bat da. Web orrialde horren arabera, “aipaturiko enpresak 680 milioi euro fakturatuko ditu proiektu horrekin eta denbora gutxiren buruan beste 42.000 metro koadro lur eskuratzeko asmoa du, Fertiberiaren lantegiko lurretatik gertu. Egun Befesaren planta batek okupatzen du aipaturiko lursail hori, baina enpresa horren jarduna 2007an amaituko da”.

Alonsoren hirigintza kudeaketa Gasteizen

PP gutxiengoan egon da agintean Gasteizko udalbatzan eta joan den urte amaieran hirigintza arloko ustezko bi eskandalutan nahasi zen, biak ere familia bakarreko etxebizitzen promozio kontuak ziren... gertaturikoa ikertzen ari dira orain. Ibaiondo auzoan, Opacua eraikuntza-enpresak 54.000 euro garestitu zituen udal lurretan eraikitako 24 txalet bioklimatiko. Eta Ali herrian, hirigintza zinegotzia zen Jorge Ibarrondo popularrak baimena eman zion Salgado Iglesias markari zazpi txalet eraikitzeko, aurkako hainbat txosten tekniko jaso arren. Jose Mardones, Lasarte, Villa Vergara, Cruz Roja eta Cervantes hegoaldea ere susmagarriak dira zenbait txaletetan ustez Aliko Udalak lagunduta egindako hirigintza gorabeherengatik.