Petrolioaren ordezko, gas naturalaren eta energia nuklearraren alde egin dute gobernu gehienek. Gas naturala hartzen du trantsizio energia gisa Eusko Jaurlaritzaren 3E-2010ak ere, energia berriztagarriak masiboki erabiltzera pasatzeko gero. Horrela, 2010erako energia eskari osoaren %52 gasak hornitzea aurrikusten du estrategiak. Baina Roberto Bermejok argudiatzen du, trantsiziorako ere ez dela egokia: «Konplexua da banatzeko -gasoduktu luzeak eraiki behar dira, itsasoa ontziz pasa ondoren regasifikazio plantak behar dira...- eta urte asko beharko ditu sistemak egokitzeko. Gainera, gasak ere petrolioak bezala, produkzio gaitasun gorenaren data jarria du: 2020a». Energia nuklearraren eragozpenak, ondoko koadroan dituzue.

Bestalde, naturak bere muga jarri izanak, erabili arren baliabidea agortzen ez duten energia berriztagarrietara ere begira jarri ditu orain arte hauekiko konfiantzarik izan ez duten gobernuak. Esaterako, Europako Batasunak Energia Berriztagarrien Liburu Zurian dioenez, plan eta estrategia batzuk aurreikusten ditu energia berriztagarriak eskariaren %6 asetzetik %12ra iristeko 2010ean. Jaurlaritzaren estrategiak ere kopuru bera erdiestea du helburu. Baina gurean Nafarroa dago aurreratuen: 2010erako energia berriztagarriekin lortu dezake bere kontsumo elektriko osoa asetzea.

Tokian tokiko energia lantzeak dependentzia energetikoa gutxitzen du, eta prezioak kontrolatzeko aukera ematen du. Energia berriztagarriak errentagarri ote diren galdetzerakoan, pentsa liteke ohiko energia motak baino errentagarriago badirela, azken hauek eragiten duten kaltea ere kontuan hartuz gero, hori ere ordaintzen dugu-eta: aldaketa klimatikoa ordaintzen ari gara, ez bizitzekin bakarrik, baita galera ekonomiko handiekin ere.

Energia berriztagarrietan, eolikoa da garatuen dagoena: Europan Alemania da puntakoa (urtean 8.750 MW ekoizten ditu), eta Espainia (3.660 MW) bigarren. Berau da egun erregai fosilik gabe energia ekoizteko modurik merkeena.

Eguzki energian ere Alemania da lider Europan -Europako eguzki energiaren %62 bertan ekoizten da-. Eta kontuan hartzeko eredua da hau, Alemaniak gure eguzki orduen erdia baitu. Aldiz, eta diferentzia handiz, Japonia da munduan puntakoena. Eguzki energia gaur egun garestia izateaz gain, bere errendimendua oraindik mugatua da. Baina iraultza teknologikoaren atarian dagoela iragarrita dago eta garai honen bukaerarako lehiakorra izango dela. Greenpeaceren azken txostenaren arabera, eguzki energia termikoa da etorkizuneko energia -eguzki plaken bidez ura berotzen duen sistema-. EAEk ere sobera eguzki energia baduela dio txostenak, 2050eko gure energia beharrak asetzeko.

Hidrogenoaren teknologia ere garatuko dela espero da, eta horrek energiaren panorama erabat aldatuko luke: hidrogenoa ez da energia iturri, energia eramalea baizik. Beraz, energia erabili behar da hidrogenoa lortzeko. Behin hidrogenoa lortuta, hidrogeno hori, erabiltzera ain ohituta gauden pila modukoan gorde daiteke. Teknologia hau garatuz gero, bera litzateke etorkizuneko erregaia kotxe, etxe eta industrientzat. Kotxe etxe indartsuenek 2.000 milioi dolar inbertitu dituzte hidrogenozko ibilgailuak sortzeko. Bigarren bidea hidrogeno nukleoak batzea litzateke, baina hau lortzeko oso hurrun dago.

Biomasak ere aukera handiak ematen ditu. Materia organiko dena, izan landareena zein animaliena, da biomasa eta hauetatik ia dena erabili daiteke erregai gisa. Gaur egun Europako Batasunean ekoiztutako energia berriztagarrien %58 egurretik dator. Biogas edo biokonbustiblez (biodiesel edo bioetanol) dabiltzan automobilak badira merkatuan baina hauen garapena oso mantso doa.

Badago zer garatua, noizko egongo diren prest izango da kontua.